Илбэчин С.Билэгт: Манай Монголд удахгүй мундаг илбэчид гарч ирнэ

“Авьяаслаг Монголчууд” шоу нэвтрүүлгийн гуравдугаар улирлын дугаар амжилттай явагдаж өндөрлөлөө. Гурван сарын турш үзэгчдэд хүрсэн тус шоуны энэ удаагийн ялагчаар илбэчин С.Билэгт шалгарсан бөгөөд тэрээр “Хамгийн түрүүнд намайг төрүүлж өсгөсөн аав ээждээ, маш их баярлалаа. Та хоёртоо хайртай шүү. Хүү нь чадлаа. Сэтгэл сайхан байна. Хожсон мөнгөө сайн үйл хийхэд зарцуулах болно. Тэгэхдээ бүгдийг нь ил тод хийх болно. Намайг дэмжсэн бүх Монголчууддаа баярлалаа. Дэлхийн хүн болж  өөрийгөө харуулах болно” хэмээжээ.

Шоуны эхний шатанд “Алтан баззер”-ийн эзэн болж хагас финалд шууд орох эрхтэй болсон тэрээр дэлхийн хэмжээний хүн болохоор тус тэмцээнд оролцож буйгаа илэрхийлж байсан удаатай. Үүндээ нэг алхам ойртсон тэрээр анх “Хөзрийн хаан” киног үзээд илбэнд эргэлт буцалтгүй дурласан бөгөөд “Илбийг би өөрөө сурсан. Ямар нэгэн багшгүй. Хүүхэд байхад Дэвид Коперфилдийн илбийн нэвтрүүлэг гарна бас “Хөзрийн хаан” кино надад маш их сэдэл өгдөг байсан. Хөзрийн хааныг харахаар хөзрийг ингэж дэлгээд л, цацаад, нэг гараасаа нөгөө гар луугаа шүүрээд л. Тэрийг харчхаад би хамгийн анх хөзөр холихыг оролдож эхэлсэн. Хөзөр холиод эхэлсэн чинь нэг мэдсэн илбийн нууцуудыг нь хараад тайлаад эхэлсэн. Өө энэ чинь ийм юм байна, ямар амархан юм бэ гээд туршаад ирсэн чинь миний гарт амархан орчихсон. Тэгээд л цаашдаа илбүүдийг сурахад амархан байсан.

Нэг мэдсэн чинь аймар их илбэ мэддэг болчихсон байсан. “Тэгээд л илбэ намайг сонгосон” гэдэг үгийг гаргасан. Хүмүүс одооноос л илбийг ойлгож эхэлж байна. 2015 онд би “Илбэ намайг сонгосон” гээд нэвтрүүлэг “Mongol HD” дээр хийсэн ш д. Тэр үед аймар хэцүү байсан. Хүмүүст илбэ үзүүлэх гээд очиход бүгд үргээд зугтаадаг, сайн ойлгодоггүй байсан. Дийлэнх хүмүүс миний нууцыг худлаа тайлдаг. Тэрэнд бусад хүмүүс итгэчихдэг. Наана нь ямар их бэлтгэл, хөдөлмөр байгааг хүмүүс ойлгодоггүй. Би эх орноо төлөөлж гадны тэмцээнүүдэд оролцоно. Би онгирч байгаа юм биш. Гадныхан бэлэн материал, төхөөрөмжүүд хэрэглээд энд тэнд илбэ үзүүлээд яваад байдаг. Тэрийг нь худалдаалдаг. Манай Монголд удахгүй мундаг илбэчид гарч ирнэ. Манайд бол жинхэнэ чадвараараа сурч байна” хэмээсэн байна.

Б.Болор

Эх сурвалж: Factnews.mn