Гүржийн анхны эмэгтэй Ерөнхийлөгч тангарагаа өргөлөө
Өнгөрсөн ням гарагт Гүржийн баруун нутгийн Телави хотод тус улсын анхны эмэгтэй ерөнхийлөгч Саломе Зурабишвили тангараг өргөжээ. Тэрбээр Гүрж улсын тав дахь Ерөнхийлөгч болсон юм.
Тангараг өргөх ёслолын арга хэмжээнд 1800 гаруй хүн оролцсон бөгөөд тэдний дунд 55 улс орон, олон улсын байгууллагын 150 гаруй төлөөлөгч багтаж байв.
1952 онд Францад төрсөн С.Зурабишвили нь 2004-2005 онд Гүржийн Гадаад хэргийн сайдын албыг хашиж байжээ. Түүнчлэн энэ удаагийн сонгуульд нэрээ дэвшүүлэхийн тулд Францын иргэншлээсээ татгалзсан байна.
Өнгөрсөн 10 дугаар сарын 28-нд Гүрж улсад Ерөнхийлөгчийн сонгууль болж, улс төрийн намуудын 19 нэр дэвшигч, бие даасан 6 нэр дэвшигч өрсөлдсөн юм.
Ерөнхийлөгчийг бүх нийтийн сонгуулиар сонгох сүүлийн сонгууль энэ байсан бөгөөд ирэх 2024 онд шинэ Ерөнхийлөгчийг хууль тогтоогчид хийгээд бүс нутгийн төлөөлөл тэргүүтэй 300 төлөөлөгч сонгох ажээ.
Э.Хулан
Эх сурвалж: Монцамэ агентлаг
URL:
