Ноён Трипл дабл эргэн ирлээ

Үндэсний сагсан бөмбөгийн холбооны өрнөд бүсийн шилдэг багуудын нэг Оклахома Сити Тандер багийн лидер Рассель Уэстбрукийн Трипл Даблийн тоо ахин нэгээр ахилаа.
Оклахома Сити Тандер баг өчигдөр Кливленд Кавальерс багийн эсрэг тоглож, 100-83 харьцаагаар хожсон тоглолтонд Рассель Уэстбрук 23 оноо, 19 самбараас бөмбөг авалт, 15 ашигтай дамжуулалт хийж, карьерийнхаа 107 дахь Трипл Даблаа хийсэн байна. Мөн энэ улирлын 3 дахь тохиол нь болжээ.
19 удаа самбараас бөмбөг авсан үзүүлэлт нь мөн түүний замналын оргил амжилт байв.
107 удаа Трипл дабл хийснээр Рассель Уэстбрук бүх цаг үеийн 3-р байрт бичигдэж эхэллээ. Түүний өмнө агуу Оскар Робертсоны 181, Мэжик Жонсоны 138 удаа Трипл дабл хийсэн амжилт бичигдэж байна.