Б.Дэлгэрсайханы эзэмшлийн хоёр компани тусгай зөвшөөрөлгүй талбайгаас төмөр олборлож байна гэв

УИХ-ын гишүүн Б.Дэлгэрсайханы “Болд төмөр Ерөө гол” компани хууль бус үйлдлийн талаар геологич мэргэжилтэй иргэн Б.Батсайхан өнөөдөр хэвлэлийнхэнд хандлаа.

Тэрбээр хандах болсон шалтгаан нь Дээд шүүхийн шийдвэрээр тусгай зөвшөөрөл нь цуцлагдсан  талбайгаас төмөр олборлож байгаа талаар мэдээлэв.

Тодруулбал, АМГТГ-ын Геологи уул уурхайн кадастрын хэлтсийн даргын 2009 оны аравдугаар сарын 02-ны өдрийн 780 дугаар шийдвэрээр “Эй Ар Ай Ти” ХХК-ний эзэмшиж байсан 1948,57 га талбай бүхий 10885 А тоот ашигт малтмалын ашиглалтын тусгай зөвшөөрлийг хүчингүй болгосон байдаг.

Харин дээрх дарга шүүхийн шийдвэрээр тусгай зөвшөөрөл нь хүчингүй болсон талбайд сонгон шалгаруулалт явуулахгүйгээр Б.Дэлгэрсайханы хамаарал бүхий “Миллениум диггерс” ХХК-д XV-15192 тоот хайгуулын тусгай зөвшөөрөл олгож, хууль дүрэм зөрчжээ.

Ийнхүү АМГТГ гурван шатны шүүхийн шийдвэрийг биелүүлэхгүй, хүчингүй болгосон хайгуулын талбайгаас хууль бусаар хэсэгчилэн шилжүүлж авч, өнөөдөр төмрийн олборлолт явуулж байна.

Иргэн Б.Батсайханы ярьснаар “Гурван талбайд хайгуулын тусгай зөвшөөрөл хуурамчаар бичиж олгосон тул өнөөдөр уг тайлбайнуудад “Инфинитиспэйс” ХХК, болон “Болд төмөр Ерөө гол” компаниуд хууль бусаар ашигт малтмалын ашиглалт, олборлолтын үйл ажиллагаагаа явуулж байна. Ямар ч хууль ёсны шийдвэр байхгүй. Зүгээр хоосон цулгай талбайг ашигт малтмалын тусгай зөвшөөрөл болгоод өгчихсөн байгаа нь ямар шударга явдал вэ.

Энэ талбайгаас жилд 3 мянган тонн төмөр экспортлож байна. Энэ талбайгаас хууль бусаар гарч байгаа төмрийн хүдрийг хэн шалгаж зогсоох юм бэ. Эсвэл ингээд бүгдээрээ нүдээ аниад чимээгүй байж, байгалийн баялагаа хэн нэгний эрх дарх мэдэлтэй хүнд алдаад, харьд гаргаад дуусах юмуу.

Дахиад хэлье энэ хоёр компани бол УИХ-ын гишүүн Б.Дэлгэрсайханы хамаарал бүхий компани юм шүү. Шүүхийн шийдвэрээр хүчингүй болгосон тусгай талбайгаас төмөр олборлож байгаа нь ариун явдал уу. Тиймээс энэ асуудлыг хууль хяналтынхан анхааралдаа авна биз дээ. Би ч ҮХЦ-д хандсан” гэв.

Эх сурвалж: olloo.mn