АНУ-ын хоригоос үл хамааран Энэтхэг улс Иранаас газрын тос худалдан авна
Хэдийгээр АНУ хориг тавьж байгаа боловч Энэтхэгийн компаниуд 11 дүгээр сарын 4-нөөс хойш ч гэсэн Иранаас түүхий газрын тос худалдан авсаар байх болно. Энэ тухай Энэтхэгийн Газрын тосны сайд Дхармендра Прадхан мэдэгдлээ.
“Бидэнд улс орныхоо хэрэгцээг хангах нь чухал байна. Манай зарим компаниуд 11 дүгээр сард худалдан авах газрын тосныхоо хэмжээг хэдийнэ тохиролцсон” гэж тэрбээр Шинэ Дели хотод болсон Эрчим хүчний чуулга уулзалтын үеэр хэлсэн байна.
“Дэлхийн улс орнуудын удирдагчид бидний хэрэгцээ шаардлагыг ойлгоно гэж найдаж байна” хэмээн сайд хэлжээ.
11 дүгээр сарын 4-нөөс эхлэн Иранаас газрын тос худалдан авахаа бүрмөсөн зогсоохыг АНУ-ын зүгээс Энэтхэгийн талд ятгаж байгаа юм. Харин Ираны газрын тосны импорт зогсох аваас улс орны дотоодод нэг торх газрын тосны үнэ 6 ам.доллароор өснө гэж Энэтхэгийн тал болгоомжилж байгаа ажээ.
Энэ оны 7 дугаар сарын байдлаар, Иран улс нь Энэтхэгт газрын тос нийлүүлэх талаар Иракийн дараа орох хоёр дахь том нийлүүлэгч болсон байна. Мөн сард Энэтхэг улс Иранаас өдөрт 768 мянган торх газрын тос худалдан авсан бөгөөд 2019 оны 3 дугаар сард уг хэмжээг 2 дахин нэмэгдүүлэхээр төлөвлөж байгаа аж.
Э.Аянзаяа
Эх сурвалж: Монцамэ агентлаг
URL:
