Хятад газрын тосгүй хоцорлоо

АНУ хоёр орны худалдааны дайны хүрээнд  Хятадад  түүхий газрын тос нийлүүлэхээ бүрэн зогсоолоо гэж хятадын хөлөг онгоцны тээврийн China Merchants Energy Shipping (CMES) компаний ерөнхийлөгч Се Чуньлин Гонконгт жил бүр болдог энэ салбарын дээд хэмжээний уулзалт дээр мэдэгдсэнийг “Reuters” агентлаг дамжууллаа.

“Бид АНУ-аас Хятад руу түүхий газрын тос зөөдөг үндсэн тээвэрлэгчид. Худалдааны дайн эхэлтэл бүх зүйл сайхан байсан, харин одоо бүгд зогслоо” гэж тэр тэмдэглээд энэ бол хөлөг онгоцны тээврийн ажиллагаанд маш муу зүйл гэсэн байна.

АНУ-аас хятадад нийлүүлдэг газрын тос наймдугаар сард 9.7 сая баррель байснаа есдүгээр сард 0.6 сая болтол буурсан гэдгийг “Reuters” дурджээ. Оны эхнээс хятадад нийлүүлдэг газрын тосны хэмжээ хэлбэлзсээр байсан ч 4.4 сая баррелээс бууж байгаагүй юм.

2018 оны эхнээс хоёр тал янз бүрийн барааныхаа татварыг нэмэгдүүлснээс үүдээд  АНУ, Хятадын хооронд худалдааны дайн болж  эхэлсэн. Трамп болохоор, Бээжинг шударга бус “тоглож” зарим бараагаа ховордуулж хоёр талын худалдааны тэнцлийг алдагдуулж байна хэмээн  буруутгаж  байгаа юм. Дараа нь тэр бас худалдааны дайнд Хятад яллаа ч гэсэн АНУ-ын эдийн засгийн хөгжлийг гүйцэж чадахгүй гэж мэдэгдсэн.

Харин “Bloomberg” энэ худалдааны дайны дүнд хятадын дотоодын нийт бүтээгдхүүний өсөлт 1990 оноос хойш хамгийн бага буюу ердөө 6.6 хувь болно гэж дүгнэж байна.