​‘Магнай трейд’, ‘М-ойл’-ын шатахуун хуурамч болохыг шинжилгээгээр тогтоолоо

Хуурамч шатахуун худалдаалж байгаа талаар Монголын шатахуун хэрэглэгчдийн холбооноос мэдээлэл хийлээ.   

Монголын шатахуун хэрэглэгчдийн холбооны тэргүүн О.Бямбадэлгэр ”Хуурамч шатахуун буюу нефтийн нэмэлт бүтээгдэхүүнээр нэрэх буюу холих аргаар гаргаж ирсэн авто бензин болон дизелийн түлш  худалдаалж байна. Шатахууны дээжээс авч лабораториар шинжлүүлтэл хуурамч гэдэг нь нотлогдсон. Тухайлбал, ‘Магнай трейд’, ‘М-ойл’-ын шатахуун хуурамч болохыг  Иргэний нисэхийн газрын төв лаборатори,  Амбер ХХК, мөн олон улсын лабораторын шинжилгээгээр тогтоолоо.

 Хуурамч шатахуун, дизелийн түлш үйлдвэрлэж байгаа компани нь “Трафигура”. Энэ компани Монголд үйл ажиллагаагаа эрхлээд “Транс Гайд” гэдэг компанийн агуулахад нефтийн нэмэлт бүтээгдэхүүнийг холиод “Хар мөрөн импекс”, “Ай Си Ай Си” зэрэг компаниар дамуулан жижиглэнгээр худалдаалж, үүнийг ‘Магнай трейд’, ‘М-ойл’ гэх зэрэг компаниуд зөөвөрлөж байна.  Энэ асуудлыг харьяа яам болон холбогдох Мэргэжлийн хяналтын ерөнхий газар бүгд хүлээн зөвшөөрсөн ч хуурамч шатахууны урсгалыг зогсоохгүй, одоог хүртэл ямар нэг арга хэмжээ авахгүй байна.

2013 онд Засгийн газар авто бензийн хомсдолтой холбогдуулаад маш олон арга хэмжээ авсан. Түүний нэг нь бол Засгийн газрын 112 дугаар тогтоол буюу  авто бензинийн татварын хэмжээг тэглэсэн явдал юм. Үүнээс үүдэн хуурамч бензин, нефтийн бүтээгдэхүүнийг хянах боломжгүй болсон нь хууль бус үйлдлийг бий болгох эрх зүйн орчныг бүрдүүлж байна” гэлээ.

Түүнчлэн Монголын шатахуун хэрэглэгчдийн холбооноос шатахууны үнэ нэмсэн асуудлаар аж ахуй нэгжүүдэд болон түлшний бодлогыг зохицуулдаг Үнийн зөвлөлд шаардлага хүргүүлэх болсноо мэдэгдлээ.