В.ПУТИНЫГ хамгийн туршлагатай УЛС ТӨРЧ гэж үзэж байна

ОХУ-ын Ерөнхийлөгч Владимир Путин болон өөрийгөө НҮБ-ын Ерөнхий Ассамблей дахь хамгийн туршлагатай улс төрчид гэж үзэж байгаагаа Туркийн Ерөнхийлөгч Режеп Тайип Эрдоган “TRT” телевизэд ярилцлага өгөхдөө хэлжээ.

“Одоогоор НҮБ-ын Ерөнхий ассамблейд үнэхээр туршлагатай хоёр улс төрч байгаа нь ерөнхийлөгч В.Путин, бид хоёр. Өөр туршлагатай хэн нэгэн байж магадгүй хэдий ч одоохондоо санаанд орохгүй байна. В.Путин бид хоёр хоёул өмнө нь ерөнхий сайдын албан тушаалыг хашиж үзсэн билээ. Бид олон зүйлд хүрч байсан хэдий ч бидний өмнө өөр хийх олон зүйл байна” гэж Эрдоган ярьжээ.

Түүнчлэн тэрбээр В.Путинтай тогтоосон онцгой харилцаа болон хоёр улсын ГХЯ хоорондын нягт харилцаа холбоо нь Сирийн асуудлаархи хамтын ажиллагаанд ахиц дэвшил авчрахад тус болсон гэж үзэж байгаагаа онцлон тэмдэглэжээ.