Кофе багаар ажиллах уур амьсгалыг сайжруулна
Кофенд агуулагддаг гол бодис болох кофеин олон тооны эерэг өөрчлөлтүүдийг үзүүлдэг гэдэг нь нууц биш болсон. Тэгвэл АНУ-ын хэсэг эрдэмтэд кофены шинэ эерэг шинж чанарыг олжээ. Энэ ундааг уусан хүмүүс багаар ажиллахдаа эрч хүчтэй болж, анхаарал нь илүү төвлөрдөг байна. Охайогийн их сургуулийн судлаачид кофе багийн ажиллагаа болон хамтдаа шийдвэр гаргахад хэрхэн нөлөөлдгийг судалжээ.
Тэд 100 гаруй оюутнуудыг оролцуулсан хоёр ч туршилтыг хийсэн байна. Эхний туршилтад оролцогчид бусдыгаа үнэлж дүгнэх ёстой болов. Туршилт эхлэхээс өмнө аяга кофе уусан оюутнууд найз нөхөд болон хамтран ажиллагсдаа сайнаар хэлж байсан гэнэ. Удаах туршилтад оролцогчдыг хоёр бүлэгт хуваажээ. Эхний бүлэгт багтсан оюутнуудад кофеинтэй кофе, үлдсэнд нь кофеингүйг санал болгов.
Тэгтэл кофеинтэй кофе ууж байсан залуус багийнхаа бусад гишүүдийг өндрөөр үнэлж, дүгнэж байсан гэнэ. Дээр нь кофеинтэй кофе уусан оюутнуудын анхаарал илүү төвлөрсөн байна. Тэгэхээр кофе багийн уур амьсгалыг сайжруулах талтай юм.
Эх сурвалж www.wikimon.mn
URL:
