Автобусны буудлууд эзэнгүйдэж, тоногдож дуусчээ
НИТХ-ын ээлжит хуралдаан өчигдөр боллоо.
Энэхүү хуралдаанаар Нийтийн зорчигч тээврийн 51 автобусны буудлыг дүүргийн өмчид шилжүүлэх тухай, “Баянхошуу-Ус” нийслэлийн өмчит үйлдвэрийн газрын талаар авах арга хэмжээний тухай, Тогтоолд өөрчлөлт оруулах тухай зэрэг асуудлыг хэлэлцлээ.
Нийтийн зорчигч тээврийн 51 автобусны буудлыг дүүргийн өмчид шилжүүлэх талаар Нийслэлийн өмчийн харилцааны газар танилцуулсан юм. “Худалдаа хөгжлийн банк”, Нийслэлийн захирагчийн ажлын алба, Нийтийн тээврийн газрын хамтарсан гэрээгээр тус банк нь саравч, сандал, хогийн сав, зогсоолын нэг чиглэлийн зураглал бүхий гэрэлтүүлэгтэй, мэдээллийн самбартай 100 автобусны буудлыг өөрийн хөрөнгөөр барьж ашиглалтад оруулж, хоёр жилийн хугацаанд бүрэн бүтэн байдлыг хариуцан ажиллах үүрэг хүлээсэн аж.
Тиймээс Нийтийн тээврийн газар, “Худалдаа хөгжлийн банк”-ныхан хамтран автобусны буудлуудад шалгалт хийсэн байна. Гэтэл иргэд сандал, саравч мэдээллийн самбарыг эвдэж, сүйтгэх зэргээр хайр гамгүй хандаж, эзэнгүйдэх хандлагатай болжээ. Тиймээс дүүргүүдийн Засаг даргын Тамгын газруудад хүлээлгэн өгөх саналыг оруулж хэлэлцүүлсэн юм.
Харин НИТХ-ын тэргүүлэгчдийн хувьд “Нийслэлд сандал, самбар гэрэлтүүлэгтэй, бүрэн бүтэн байдлыг хангасан автобусны буудал байхгүй гэхэд хилсдэхгүй. Дүүргүүд ийм автобусны буудлыг хүлээж аваад дараа нь хэн хариуцлага үүрэх вэ, бүрэн бус буудлуудыг дүүргүүд хүлээж авахгүй гэвэл яах ёстой вэ, “Худалдаа хөгжлийн банк”-ны гэрээний хугацаа дуусаагүй байна. Үүний шалтгаан нь юу байна” гэх зэрэг асуултыг тавьж байв.
Хариуд нь мэргэжилтнүүд “Эзэнтэй болгохгүй бол автобусны буудлууд тоногдож дуусах нь” гэв. Мөн “Худалдаа хөгжлийн банк”-ны рекламыг байнга тавиад, цаг үеийн сурталчилгаа тавихгүй байх нь иргэдийн эрх ашигт нийцэхгүй байна” хэмээн хариулж байлаа.
Энэ асуудлаар Захирагчийн ажлын албаныхан “Автобусны буудлыг нийслэлийн өмчид шилжүүлэн, хүлээлгэж өгөх саналыг “Худалдаа хөгжлийн банк”-нынхан тавьсан. Автобусны тэр олон буудлыг хүлээж авна гэдэг хүндрэлтэй байсан учир дүүргүүдэд хариуцуулах саналыг оруулсан. Гэхдээ гэрээт хугацаа дууссаны дараа бүрэн бүтнээр нь дүүргүүд хүлээж аваад тухайн дүүрэг рекламаа байрлуулж, олсон орлогоороо автобусны буудлаа цэвэрлэж, засах, ажлын байр бий болгон ашиглах нь зүйтэй гэсэн саналыг өмчийн харилцааны газарт тавьсан” гэв.
Ингээд эцэст нь НИТХ-ын тэргүүлэгчид ажлын хэсгийнхэнд гэрээгээ шинэчлээд, автобусны буудлын бүрэн бүтэн байдлыг хангаж, Нийтийн тээврийн газарт хүлээлгэн өгсний дараа энэхүү асуудлыг дахин хэлэлцэх нь зүйтэй гээд буцаалаа.
Үүний дараа НИТХ-ын тэргүүлэгчдийн ээлжит хуралдаанаар оруулсан Тогтоолд өөрчлөлт оруулах тухай асуудлыг хэлэлцсэн юм. Энэхүү асуудлыг Нийслэлийн газрын албаны дарга Ц.Сандуй танилцууллаа.
Тэнгис кино театрын урд талбай 1500 м.кв хэмжээтэй аж. Түүний 360 м.кв талбайд нь хүүхэд залуучуудад зориулж, Чингэлтэй дүүргийн номын санг барихаар төлөвлөн тэргүүлэгчдээр батлуулахаар санал оруулав.
Ц.Сандуй дарга “Чингэлтэй дүүргийнхний хүсэлтийн дагуу номын сан барих оюунлаг ажлыг хийе гэж зориод ажиллаж байна. 360 м.кв талбайд зөвхөн номын сан барихаар зургийг нь гаргасан” гэв. Энэхүү ажлыг хурлын тэргүүлэгчид оюунлаг, хүүхэд залуучуудыг цагаа зөв өнгөрүүлэхэд нэн чухал ажил байна хэмээгээд 100 хувийн дэмжлэгтэйгээр баталсан юм.
URL:
