С.Баярцогт, Б.Бямбасайхан нарыг дахин нэг сар хорино

С.Баярцогт, Б.Бямбасайхан нарыг үргэлжлүүлэн хорих эсэх тухай шүүх хурал өнөөдөр болж байгаа талаар бид мэдээлсэн. Тэднийг өмнө нь нэг сараар баривчлах хорих шийдвэр гарч, үүнийг дахин 15 хоногоор сунгаж байсан. Тэгвэл энэ удаад мөн Баянзүрх, Сүхбаатар, Чингэлтэй дүүргийн Эрүүгийн хэргийн анхан шатны шүүхээс тэднийг нэг сараар үргэлжлүүлэн хорих шийдвэр гаргасан байна. Ингээд Баянзүрх, Сүхбаатар, Чингэлтэй дүүргийн Эрүүгийн хэргийн анхан шатны шүүхээс ирүүлсэн албан ёсны мэдээллийг хүргэж байна.

С.Баярцогт, Б.Бямбасайхан нарын таслан сэргийлэх арга хэмжээний талаарх мэдээлэл:

Нийслэлийн прокурорын газраас С.Баярцогт, Б.Бямбасайхан нарын цагдан хорих таслан сэргийлэх арга хэмжээний хугацаа дуусч байгаатай холбоотой цагдан хорих таслан сэргийлэх арга хэмжээний хугацааг дахин сунгуулах талаарх саналуудыг ирүүлсэнийг Чингэлтэй дүүргийн Эрүүгийн хэргийн анхан шатны шүүх хүлээн авч:

Хэрэг хэрэг хянан шийдвэрлэх тухай хуулийн 14.10 дугаар зүйлийн 2-д заасан үндэслэлээр

С.Баярцогт, Б.Бямбасайхан нарын цагдан хорих таслан сэргийлэх арга хэмжээг 2018.05.15-ны өдрөөс эхлэн 1 сарын хугацаагаар тус тус сунгаж шийдвэрлэсэн болно.

 Баянзүрх, Сүхбаатар, Чингэлтэй дүүргийн Эрүүгийн хэргийн анхан шатны шүүхийн Тамгын газар