УБТЗ-аар тээвэрлэж буй ачааны хэмжээ өссөөр байна

“УБТЗ” ХНН нь Монгол улсын нийгэм эдийн засгийн хөгжилд жинтэй хувь нэмрээ оруулж байдаг тээврийн салбарын тэргүүлэгч байгууллага бөгөөд тээврийн үр ашгийг дээшлүүлэх зорилтоо амжилттай хэрэгжүүлсээр байна. Тус нийгэмлэг нь өнгөрсөн онд 22,8 сая тонн ачаа тээвэрлэж түүхэндээ байгаагүй амжилт гаргасан бол энэ жил 25 сая тонн ачаа тээвэрлэх өндөр зорилттой ажиллаж байна. Энэ оны эхний 3 сарын байдлаар  “УБТЗ” ХНН  6 сая 173 мянган тонн ачаа тээвэрлэжээ.

 

Үүнээс  697,0 мянган тонн импортын ачаа тээвэрлэсэн нь өнгөрсөн оны мөн үеэс 72,2% өссөн байна.  Мөн 2 сая 242 мянган тонн экспортын ачаа тээвэрлэсэн нь өнгөрсөн оны мөн үеэс 45% өсчээ. Харин 2 сая 444,7 мянган тонн  орон нутгийн ачаа тээвэрлэсэн нь өнгөрсөн оныхоос 6,5 % өссөн үзүүлэлттэй байна.  “УБТЗ” ХНН Ази- Европыг холбосон хамгийн дөт замаар ачаа тээвэрлэдэг бөгөөд  Казахстан улсаар дамжин өнгөрдөг коридороос 513 км, Транс Манжуурын коридороос 748 км-ийн дөт юм.

Энэхүү давуу байдлаа “УБТЗ” ХНН  ашиглаж чадсаны үр дүнд  Монгол улсын нутгаар дамжин өнгөрөх транзит тээврийн хэмжээ өнгөрсөн оноос эхлэн огцом тасралтгүй өсөж байгаа юм.  УБТЗ-аар тээвэрлэсэн дамжин өнгөрөх ачааны хэмжээ энэ оны эхний 3 сарын байдлаар 789,3 мянган тонн болсон нь өнгөрсөн оныхоос 45,2 хувиар илүү өссөн байна. Энэ нь БНХАУ-аас ОХУ-ын чиглэлд ачааны хэмжээ 73,2%, ОХУ-аас БНХАУ-ын чиглэлд 36,9% тус тус өссөн гэсэн үг.

Өнгөрсөн оны эхний улиралд манай улсын нутгаар дамжин өнгөрсөн транзит чингэлгийн галт тэрэгний тоо 62 байсан бол энэ оны эхний 3 сарын байдлаар 228-д хүрсэн нь томоохон ололт юм. Энэ онд транзит чингэлгийн галт тэрэгний тоог ноднингоос 2 дахин өсгөж 1000-д хүргэхээр “УБТЗ” ХНН шамдан ажиллаж байна.

Замын ажлын үндсэн үзүүлэлтүүдийн нэг болох ачилтын хэмжээ 4 сая 686,6 мянган тонн-д хүрсэн нь өмнөх оноос 23,3% илүү байна.

Хойт, өмнөд хилээр ачаатай хүлээн авсан вагоны тоо хоногт 408 вагон хүрсэн нь  өнгөрсөн онтой харьцуулахад 161 вагоноор илүү байна. Мөн хоёр хөршийн холбогдох албаныханд ачаатай хүлээлгэн өгсөн вагоны тоо хоногт 631 вагон байгаа нь өнгөрсөн оны мөн үеэс  50,7 хувиар өсжээ.

“УБТЗ” ХНН-ийн тээврийн үзүүлэлтүүд ийнхүү бүхэлдээ өссөн байгаа нь энэ жил тус нийгэмлэг өмнөө тавьсан зорилтоо биелүүлж, манай улсын эдийн засгийн өсөлт улам нэмэгдэх сайхан төлөвийг харуулж байна.

                                                                        Мэдээллийн эх сурвалж: “УБТЗ” ХНН