Гэр хорооллын гудамж халтиргаатай, гэрэлтүүлэггүй, золбин нохдоор дүүрэн байна
Нийслэлийн удирдах ажилтны шуурхай хуралдаан өчигдөр боллоо.
Хуралдаанаар байгууллага аж ахуйн нэгжүүдэд ойр орчмынхоо халтиргаа гулгаа, хогоо цэвэрлэх зэрэг ажлыг зохион байгуулахыг хотын ерөнхий менежер Ч.Бат үүрэг болгосны дагуу холбогдох мэргэжилтнүүд ажлын хэрэгжилтийг шалгаж, гарсан зөрчил дутагдлын талаар танилцууллаа.
Шалгалтын дүнг Нийслэлийн Засаг даргын Тамгын газрын Шинжилгээ үнэлгээний хэлтсийн дарга Ш.Наран танилцуулсан юм. Байгууллага, аж ахуйн нэгжүүд ойр орчмынхоо цас, мөсийг бүрэн цэвэрлээгүй байсан нь шалгалтаар илэрчээ. Мөн дүүргүүдийн удирдлагуудад даруй анхаарах шаардлагатай бэрхшээлүүд тулгарч байсан аж.
Тухайлбал өнгөрсөн сард нийслэлийн хэмжээнд халтиргааны улмаас 227 хүн бэртсэн байв. Мөн гэр хорооллын гудамжуудаар золбин нохой их байгаагаас болж өнгөрсөн сард 160 хүн нохойд уруулж, эмнэлэгт хүргэгдсэн хэмээн цагдаагийн байгууллагаас мэдээлсэн байна.
Шалгалтын явцад илэрсэн бас нэг чухал асуудал нь гэр хорооллын гудамжнуудын гэрэлтүүлэг. Цахилгааны шон дээр гэрэл суурилуулсан ч тэр нь асдаггүй байна. Яагаад гэрлүүд асдаггүй талаар холбогдох байгууллагын ажилтнуудаас тодруулахад гэрлээ жаахан орой асаана гэсэн хариуг хэлж байсан гэнэ.
Үнэлгээний дагуу Нийслэлийн захирагчийн ажлын албаны Орчны бохирдол хот нийтийн аж ахуйн хэлтсийн дарга Л.Баатарцогт ойрын өдрүүдийн ажлын явц, үр дүнгийн талаар танилцууллаа. Тэрбээр “Байгууллага, аж ахуйн нэгжүүд ойр орчмынхоо цас, мөсийг цэвэрлэх ёстой гэсэн тогтоол гарснаас хойш явган замын цас цэвэрлэгээний ажил үр дүнгээ үзүүлж байгаа” гэсэн юм.
Мөн дүүрэг бүрт замын цас хайлуулах давс худалдаж авахад зориулан 8-10 сая, мөн хог цэвэрлэхэд зориулж, 10 сая төгрөгийг төсөвлөсөн байна. ОХУ-аас 270 тонн хайлуулах бодис хот руу ачигдсан нь энэ сарын 25-нд ирэх аж. Тиймээс энэ өвлийн материал нөөцийн хувьд дутагдах зүйлгүй болсон гэв. Харин орон сууцны хорооллуудын доторх зам талбай эзэнгүйдэж байгаа боловч ирэх оноос дүүргүүдийн ТҮК-иудтай хамтран бүсчилсэн байдлаар анхааралдаа авч ажиллах гэнэ.
Гэр хорооллын дундуур энэ жил нэлээд зам тавигдсан ч улсын комисст хүлээлгэж өгөөгүй байгаа болохоор хүлээлгэн өгсний дараа Захирагчийн ажлын алба хариуцан ажиллана гэдгээ хэллээ.
Нийслэлийн хэвлэл мэдээллийн албанаас “Нийслэлийн удирдлагуудад хэвлэл мэдээлэлтэй анхаарал сэрэмжтэй, зөв зүйтэй харьцаж байхыг анхааруулсан юм. Тус албанаас энэ онд 459 мэдээллийг ОНМХ-ээр нэгдсэн журмаар нэвтрүүлсэн байна. Өдөр тутмын сонин хэвлэлд нийслэлийн удирдлагуудтай холбоотой 2411 мэдээлэл хэвлэгдсэн бол телевизүүдээр1992 мэдээлэл цацагджээ. Харин сонинд өгсөн мэдээллүүдээс 98 мэдээ нийтлэл нь нийслэлийнхнийг шүүмжилсэн өнгө аястай байсан бол 27 нь дүүргүүдийн Засаг дарга нарын буруу ташаа үйл ажиллагаатай холбоотой байжээ.
Нийслэлийнхний хийж бүтээсэн ажил нь хийгээгүй болж харагддаг харин хийгээгүй ажил нь хийсэн болж харагддаг болжээ гэдгийг ч хэлж байв. Энэ өвөл халтиргаа гулгаа, гэр хорооллуудад хог их байгаагаас болж нийслэлийн удирдлагуудыг муу, сайнаар их бичих нь ойлгомжтой. Тиймээс нийслэлийн удирдлагууд хэвлэл мэдээллийн байгууллагуудтай нэлээд анхааралтай зөв зүйтэй хандах хэрэгтэй хэмээн анхааруулсан.
Хуралдааны төгсгөлд нийслэлийн Засаг дарга бөгөөд Улаанбаатар хотын захирагч Г.Мөнхбаяр Захирагчийн ажлын албаныханд хэд хэдэн анхаарах шаардлагатай асуудлыг хэлсэн юм.
Тэрбээр Л.Баатарцогт даргын ажлын явцын талаар мэдээлснийг нийгмийн бодит байдалтай нийцэхгүй байна гэв. Түүнчлэн “Нийтийн эзэмшлийн зам талбайн урсгал зардал, гэр хороолол, нийтийн эзэмшлийн зам талбайн гэрэлтүүлэгт шаардлагатай урсгал зардлыг нэмэгдүүлэх боломжийг бүрдүүлж өгөөд байхад тооцоо судалгааг нь гаргаад ажиллаж чадахгүй байна” хэмээн анхааруулж байлаа.
Мөн “Нийтийн тээврийн газрын хамт олонд санхүүгийн хувьд ямар нэгэн хүндрэлтэй асуудал байхгүй болсон учир иргэдийн хүсч буй, боловсон үйлчилгээ, үйл ажиллагааны хариуцлагад нь хяналт тавьж ажиллах нь зүйтэй” хэмээсэн юм.
URL:
