ХОГ ХАЯГДЛЫН ЦОГЦ МЕНЕЖМЕНТ, БАЙГАЛЬ ОРЧИНД ЭЭЛТЭЙ ПРАКТИК НЭВТРҮҮЛЭХ ТАЛААР СУРГАГЧ БАГШ БЭЛТГЭХ СУРГАЛТ БОЛЛОО

НҮБ-ын Аж үйлдвэрийн хөгжлийн газар, Даян дэлхийн байгаль орчны сангаас Удаан задардаг органик бохирдуулагчийн Стокольмын конвенцийн хүрээнд хэрэгжүүлж байгаа “Хог хаягдлын ил шаталтын үйл ажиллагаанд боломжит арга, технологи, байгаль орчинд ээлтэй практик нэвтрүүлэх бүсийн төсөл”-ийн Удирдах зөвлөлийн III хуралдаан болон “Хог хаягдлын цогц менежментийг хэрэгжүүлэх арга зүй” сэдэвт сургагч багш бэлтгэх сургалт Филлипин улсын Манила хотод 2018 оны 02-р сарын 27-ноос 03 дугаар сарын 02-ны хооронд зохион байгуулагдлаа.

Удирдах зөвлөлийн хурал болон сургалтанд Байгаль орчин, аялал жуулчлалын яамны Хүрээлэн буй орчин, байгалийн нөөцийн удирдлагын газрын дарга Г.Нямдаваа, Улаанбаатар хотын Захиагчийн албаны Тохижилт хог хаягдлын удирдлагын хэлтсийн ахлах мэргэжилтэн С.Аригун, Улаанбаатар хотын Хот тохижилтийн газрын орлогч дарга С.Батбаатар болон төслийн зохицуулагч Б.Дэлгэрбаяр нар оролцож байна.

Энэхүү хурлаар бүсийн төслийн хүрээнд 2017 онд хэрэгжүүлсэн ажлуудыг хэлэлцсэн бөгөөд Монгол Улсын хувьд 2017 онд төлөвлөж, хийж хэрэгжүүлсэн ажлыг бүрэн хангалттай гэж дүгнэсэн бөгөөд 2018 онд бүсийн төслийн хүрээнд хэрэгжүүлэх ажлуудыг хэлэлцэн баталлаа.

Ил шаталтын үйл ажиллагаанд Боломжит арга технологи болон байгаль орчинд ээлтэй практик, үйл ажиллагаа нэвтрүүлэх замаар зориудын бусаар үүсдэг Удаан задардаг органик бохирдуулагчийн ялгарлыг бууруулах, хог хаягдлын үр ашигтай менежментийн систем бий болгох сургалтыг зохион байгуулж байгаа бөгөөд энэхүү сургалтаар хог хаягдлын ил шаталтын үйл ажиллагаанаас үүсэх удаан задардаг органик бохирдуулагчийн эх үүсвэрүүд болон хүний эрүүл мэнд, байгаль орчинд үзүүлэх нөлөөлөл, хог хаягдлын цогц менежментийг хэрэгжүүлэх арга зүй, хог хаягдлыг боловсруулах технологи, хог хаягдлын ил шаталтыг бууруулах арга, технологи, хог хаягдлын менежментэд хамгийн боломжит арга, технологи, байгаль орчинд ээлтэй практик үйл ажиллагаа нэвтрүүлэх арга зүй, ил шаталтаас үүсэх удаан задардаг органик бохирдуулагчийг тооцох аргачлалын талаар оролцогчдод мэдлэг олгох юм.