“Саусгоби сэндс” компани улсад төлөх төлбөрөө барагдуулжээ

“Саусгоби сэндс” компани шүүхийн шийдвэрийн дагуу 35.3 тэрбум төгрөгийн өрөө бүрэн төлж барагдуулсан тухай тус компанийн гүйцэтгэх захирал Ч.Мөнхбат ЗГХЭГ- ын дэд дарга У.Бямбасүрэнтэй уулзах үеэрээ танилцуулжээ. Монгол Улсын Засгийн газраас 2016 онд “Саусгоби сэндс” ХХК-ийн улсын төсөвт төлөх 35.5 тэрбум төгрөгийн талаар авах арга хэмжээний тухай тогтоол гаргасан байдаг. Тогтоолд улсад төлөх 35.3 тэрбум төгрөгөөс 15-ыг нь 2016, 2017 онд тэнцүү хуваан төлөх, үлдэх 20.3 тэрбум төгрөгийг Тавантолгой уурхайд ажил гүйцэтгэх замаар төлж барагдуулах үүргийг өгсөн байна. Шүүхийн шийдвэр болоод Засгийн газрын тогтоолыг товлосон хугацаанд нь бүрэн биелүүллээ гэж тус компанийн гүйцэтгэх захирал онцолсон байна.

Компани дампуурлын ирмэгт тулсан хүнд үед Засгийн газар хувийн хэвшлээ дэмжих шийдвэр гаргасан нь тус компанийг 400 гаруй ажилчдаа цалин, орлоготой нь авч үлдэх нөхцөлийг бүрдүүлжээ. ЗГХЭГ-ын дэд дарга У.Бямбасүрэн татвар төлөгч томоохон аж ахуйн нэгжийн нэг “Саусгоби сэндс” компани үйл ажиллагаагаа хэвийн явуулах чадвартай болж, хүнд үеэ давж улсын төсөв болон орон нутгийн хөгжилд хувь нэмрээ оруулдаг нийгмийн хариуцлагатай компани хэвээр үлдсэнд талархаж байгаагаа хэлсэн байна. Тус компани энэ онд 5.5 сая тонн нүүрс экспортод гаргахахаас 800 мянган тонн- ыг нь баяжуулж гаргахаар төлөвлөжээ. Түүнчлэн оюутны сургалтын тэтгэлэг олгох, жижиг, дунд аж ахуйн нэгжийг дэмжих, байгаль орчны нөхөн сэргээлт хийх зэргээр орон нутгийн хөгжилд дэмжлэг үзүүлж ажиллаж байгаа юм байна.

Б.Саруул UNEN