Бичил уурхай эрхлэгчдийн талаарх төслийг хэлэлцэхийг хойшлуулав

УИХ-ын чуулганы нэгдсэн хуралдаан эхэллээ. УИХ-ын дарга хэлэлцэх асуудлыг танилцуулсны дараагаар гишүүд горимын санал гаргав. Өнөөдрийн хуралдаанаас  Бичил уурхай эрхлэгч иргэдийн талаар авах арга хэмжээнийн тухай УИХ-ын тогтоолын төслийг хойшлуулах саналыг гишүүн А.Сүхбат гаргалаа. Уг тогтоолын төслөөр бичил уурхай эрхлэгчдийг хууль эрхзүйн орчныг сайжруулах, мэргэжил сургалтад хамруулах  зэргийг тусгасан байлаа. “Бичил уурхай эрхлэгчдэд хөдөлмөр хамгаалал байхгүй, ашиг багатай, амь нас нь аюултай нөхцөлд ажилладаг.  Бичил уурхай эрхлэгчид  бол уурхайн үлдэгдэл дээр нь ажиллаж байгаа хүмүүс. Амьжиргаагаа аваад явж байгаа хүмүүсийн аюулгүй байдалд анхаарч, хууль эрхзүйн орчныг нь бүрдүүлж өгөх ёстой” гэсэн байр суурийг илэрхийлж байв.

Санал хураалтаар гишүүн  А.Сүхбатын  горимын санал гаргасан боловч дэмжигдсэнгүй. Дараагаар нь Б.Энх-Амгалан гишүүн мөн уг асуудлыг хойшлуулах санал гаргалаа. Уг хуулийн төслийг хэлэлцэх нь зүйтэй ч  хөдөлмөр хамгаалал, иргэдийн эрүүл мэнд, ус, ой хамгаалалын олон асуудал бичил уурхайн эргэн тойронд яригдана гэдгийг хэлсэн юм. Тиймээс дахин Бичил уурхай эрхлэгч иргэдийн талаар авах арга хэмжээнийн тухай УИХ-ын тогтоолын төслийг өнөөдрийн хуралдааны хэлэлцэх асуудлаас хойшлуулах санал хураалт явууллаа. Гишүүдийн 68.6 хувийн саналаар уг асуудлыг өнөөдрийн хэлэлцэх асуудлын жагсаалтаас хаслаа.

Ингээд “Төсвийн тогтвортой байдлын зөвлөлийн дүрэм батлах тухай” Монгол Улсын Их Хурлын тогтоолын төслийг хэлэлцэж эхэллээ.

Н.Энх

http://www.shuud.mn/content/read/492202.htm