Нийгмийн даатгал төлснөөр ХУУРАМЧ бичилт хийдэг Баянголын экс байцаагчид, виз гаргагчид, орчуулагчидын СҮЛЖЭЭГ илрүүлжээ

Баянгол дүүрэг гэхээр хамгийн түрүүнд С.Эрдэнэ, С.Одонтуяа нар санаанд ордог. Энэ хоёр дүүрэгтээ хязгааргүй хайртайгаа байнга зарладаг. Хууль журмыг ч чанд сахидаг гэдгээ мэдэгдсээр ирсэн. Ингэхээр дүүргийн ажилтнууд нь  ч дутуугүй шудрага баймаар. Тэр тусмаа С.Эрдэнээр овоглох шахсан нийгмийн даатгалынхан дарга шигээ чин шудрага байх ёстой мэт ч үгүй аж. АН-ын үед С.Эрдэнэ нь хамаатан саднаараа дүүргийг дүүргэх шахсан тухай шуугиан дэгдэж байсан. Тэр тусмаа нийгмийн даатгалын хэлтэсд нь бүр ч өөрийх нь хүмүүс байсан биз.  Их хурлын сонгуулийн жилд цагаан сараар ажилтнууд нь хоёр даргынхаа тайланг айлуудаар тараагаад явж байсан гэдэг. Тэгвэл Баянгол дүүргийн НДХ-ийнхэн Солонгосын виз гаргагчид болон солонгос хэлний орчуулагчидтай нэг сүлжээнд орж даатгал төлөөгүй иргэдийг даатгал төлсөнөөр мэдээллийн санд хуурамч бичилт хийдэг байсан нь илэрчээ. Баянгол дүүргийн Нийгмийн даатгалын хэлтэст сүлжээний зохицуулагчаар ажиллаж байсан Б.Базар, тус хэлтсийн байцаагч асан С. Баттөр нар нь 900 мянган төгрөгний хахуулиар БНСУ-ын виз гаргуулах зорилгоор Нийгмийн даатгалын ерөнхий газрын ашигладаг “Шимтгэлийн тооцооны программ”-д нийгмийн даатгал төлж байгаагүй Н.Ганбат, А.Тулгабаатар нарын мэдээллийг нийгмийн даатгал төлж байсан мэтээр нөхөн оруулсан хэрэгт холбогдсон.  Байцаагч нь бичиг баримтыг авч сүлжээний зохицуулагчид өгч тэр нь хуурамч бичилт хийжээ. Хэрэг ингэж эхэлжээ. Тулгабаатар нь Солонгос гарсан ахынхаа араас очих хүсэлтэй байсанд ах нь виз найдвартай гаргадаг гэх Т.Ууганбаатарыг зааж өгчээ. Уулзахад  гурван сая сая төгрөг, гэрлэлтийн баталгаа, 4 хувь цээж зураг, цагдаагийн газрын тодорхойлолт, гадаад паспортын хамт нэхээд гол нь мөнгөө яаралтай өгч гэжээ. Виз гарахгүй бол яах вэ гэхэд асуудалгүй, чиний өмнө 2-3 хүний виз гараад явсан гэж итгүүлжээ. Мөн  нийгмийн даатгал төлдөг эсэхийг асуугаад нийгмийн даатгалынхаа дэвтэрийг авч ир, чамайг нийгмийн даатгалаар гаргана гэсэн гэнэ. Ингээд машинаа зарж хоёр сая төгрөгийг Ууганбаатарын дансанд шилжүүлжээ. Мөн дүүгийнхээ газрыг барьцаалж зээл аваад нэг саяыг шилжүүлсэн байна. Удалгүй Ууганбаатар залгаж Сүхбаатар дүүргийн НДХ-д очиж хурууны хээгээр нийгмийн даатгал төлсөн лавлагаа гарах эсхийг шалга гэжээ. Хэлсэнийх нь дагуу гарван удаа очиж шалгахад гарсангүй. Дөрөвдэх удаагаа очиж шалгахад “Байкал интернэншел” компаниас 2014 оны 1-р сараас  2016 оны 2-р сар хүртэл  нийгмийн даатгал төлсөн  гэх лавлагаа гарчээ. Лавлагаагаа аваад Ууганбаатард аваачиж өгсөн аж. Гэтэл виз нь гарсангүй. Виз хүссэн өргөдөл нь тодорхойгүй мөн явах зорилго ч нь бүрхэг гэсэн татгалзсан хариу ирэхэд нь Ууганбаатараас мөнгөө нэхсэнд өгөхгүй гэжээ. Ингээд хэрэг дэгджээ.  Цагдаагийнхан мөрдөн  виз гаргагчид болон орчуулагчдаар дамжсаар бүхэл бүтэн сүлжээ ажиллаж байсныг илрүүлжээ. Ууганбаатарын найз бүсгүй нь солонгос хэлний орчуулагч гэнэ. Тэрээр мөн орчуулга хийдэг Болормаа гэдэг эмэгтэйг таньдаг байжээ. Тэрээр таван сая төгрөгөө  байршуулж чадахгүй бол нийгмийн даатгал төлөөгүй хүнийг төлсөн болгож хурууны хээгээр лавлагаа хийж өгдөг хүн байгаа, нэг хүнийг 1,6 сая төгрөгөөр хийж өгнө, хийлгэх хүн байна уу гэж асуусан гэнэ. Ууганбаатар нь найз бүсгүйн хамт ярьж байгаад арван жилийнхээ ангийн найзынхаа ахын материалыг мөнгийн хамт өгөхөд ердөө долоо хоногийн дараа лавлагаа нь гарч улмаар Солонгос явсан гэнэ. Ингээд найдвартай гэдэгт нь итгэжээ. Харин Болормаа нь үүнийг үгүйсгэжээ. Эсрэгээрээ Оюунчимэг нь өөрөө  нийгмийн даатгалд таньдаг хүн байгаа эсэхийг нь асууж хүмүүс нийгмийн даатгалаа янзлуулаад Солонгос явж болдог тухай ярьжээ. Энэ үед хажууд нь сууж байсан хамт ажилладаг эх бэлтгэгч Мөнхдөл  инээжээ. “Чамд таньдаг хүн байгаа юм уу” гэхэд “яахав асуугаад өгье л дөө” гэжээ. Ингээд хэд  хоногийн дараа  болох юм шиг байна, нэг хүнийг сая төгрөгөөр хийнэ гэхэд Болормаа нь Оюунчимэгтээ  дамжуулж хэлжээ. Гэхдээ үнэ ханшийг нь хэлсэнгүй. Хэдээр хийхийг нь асуухад 1,6 сая төгрөгөөр гэжээ. Удалгүй Оюунчимэг нь Ганбат гэдэг хүний материалыг 1,6 сая төгрөгийн хамт авчирч өгөхөд Мөнхдөлд нэг саяыг өгчээ. Тулгабаатарын материалыг 1,5 сая төгрөгийн хамт өгөхөд цаашаа 1,2 саяыг л өгсөн гэнэ. Орчуулагчид эх бэлтгэгч нар нь “Альфа” бизнес төвд байрладаг байжээ. Мөнхдөл нь Баянгол дүүргийн НДХ-ийн байцаагчаар ажиллаж байсан С.Баттөртэй 10 жилийн ангийн найзууд гэнэ. Тэрээр Болормаагаас 2,2 сая төгрөг авсан ч ангийн найздаа 1,8 сая төгрөг өгчээ. Тэр мөнгийг байцаагч сүлжээний зохицуулагч хоёр “шудрагаар” тэнцүү хувааж авчээ. Тэд  “Байкал интернэншел”, “Баянхангай мөрөн”, “ТЭБА” компаний нэрээр нийгмийн даатгал төлсөн хуурамч бичилт хийжээ. Голдуу үйл ажиллагаа явуулдаггүй, Х тайлан гаргадаг компаниудыг сонгож авдаг байсан гэнэ.