Б.Дэлгэрсайханд “бурантаглуулсан” Т.Энхтүвшин дарга

Тойргоос сонгогдсон гишүүд УИХ-ын танхимаас аймаг бүү хэл сум багийг удирддаг жишиг нэгэнт тогтожээ. Арай л хэний хүү хэнтэй гэр бүл болохыг заах нь халаг болсон байна. Энэ тухай ч орон нутгаас мэдээлэл ирүүлж, халагласаар. Өнгөрөгч 2012 оны сонгуульд пропорцониаль буюу томсгосон тойргоор өрсөлдөж байснаа 2016 онд ухарч, мажоритар буюу жижиг тойрогт өрсөлдсөн нь ийнхүү сонгогчдынхоо хөнжлийг хүртэл сөхөн үзэхэд илүү нөлөөлж байгаа бололтой. Тойргоос сонгогдсон гишүүд аймгийнхаа удирдлагуудад өөрийн хүнээ томилоод зогсохгүй, аймгийн хэлтэс, газар агентлаг, сумын дарга нарыг хүртэл өөрийнхөө хүнийг томилохыг шахдаг үзэгдэл бий болоод уджээ.

Тиймээс өөрийн толгойгүй, УИХ-ын гишүүний үгээр ажлаа явуулдаг Засаг дарга нар цөөнгүй байгааг эх сурвалж хэллээ. Тэдний нэг нь монголын тэргүүн баячуудын нэг УИХ-ын гишүүн Б.Дэлгэрсайхан аж. Түүний томилж орхисон Дорноговь аймгийн Засаг дарга Т.Энхтүвшин яг л утсан хүүхэлдэй шиг Б.Дэлгэрсайханы дохио зангаагаар ажиллаж байдаг тухай эх сурвалж хэллээ. Т.Энхтүвшин даргад өөрийн мэдэж хийсэн томилгоо гэж бараг л үгүй юм байна. Бүх томилгоог Б.Дэлгэрсайхан гишүүн Төрийн ордноос хийдэг тухай ч дурдаад авсан. Чухам хэн хэнийг ямар замаар хэрхэн яаж томилсныг хэн мэдлээ.

Дорноговьчууд маань ийнхүү гишүүнээр бурантаглуулсан нэг муу ат шиг ажлаа хийж байгаад л хамаг учир бий. Т.Энхтүвшингийн хувьд нас залуу, ажлын дадлага туршлагаар ч тэгтлээ хүний дор орохгүй нөхөр хэмэн нутгийнхан хэлсэн. Гэвч залуу хүний шинжгүй, бусдаар хөтлүүлэн яваад нь дорноговьчууд халаглах төдийгүй Б.Дэлгэрсайхан гишүүнд ч таагүй хандаж эхэлжээ. Арга ч үгүй биз, Хууль тогтоох дээд байгууллагын тахимд хууль хэлэлцэж, улс орны өмнө тулгамдсан асуудал шийдэж байх ёстой хүн биз ээ. Хамгийн наад зах нь бүс нутгийн эдийн засгийн хөгжил гэх мэтээр асуудал тавьж, шийдэж байх ёстой гишүүн маань ийнхүү аймгийн, сумын дарга томилж, газар хэлтэстэй зууралдаж байгаад сонгогч олон харамсаж байна. Уг нь аймгийн Засаг даргыг Иргэдийн хурлын олонхийн саналаар тодруулаад Монгол Улсын Ерөнхий сайд батламжилдаг хууль дүрэмтэй. Гэтэл Дорноговь аймгийн Засаг даргыг Ерөнхий сайд бус Б.Дэлгэрсайхан гишүүн батламжилсан мэт аашилж байгааг юу гэж үзэх вэ.

Засаг дарга Энхтүвшин ийнхүү бусдад бурантаглуулж явахаар өөрийнхөөрөө бодлого шийдвэрээ гаргаад Гүйцэтгэх засаглалынхаа тэргүүний өгсөн жанжин шугамаар ажлаа хиймээр байна. Үүнээс гадна Т.Энхтүвшин дарга аймгийнхаа МАН-ын хороог хооронд нь хагалан буталгаж, хоёр хуваасан гэж намын гишүүд нь ярьж байна. Үүнээс болж саяхан болж өнгөрсөн Ерөнхийлөгчийн сонгуулиар МАН-аас нэр дэвшигч түүхэндээ анх удаа Дорноговь аймагт ялалт хүлээсэн. Ерөнхийлөгчийн сонгуулийн түүхэнд Дорноговь аймаг МАН-аас нэр дэвшигчид байнга 60-аас дээш хувийн санал өгч ирсэн гэдгийг ч ард олон мэдэж буй. Харин энэ удаад МАН-аас нэр дэвшигч М.Энхболд түүхэндээ анх удаа ялагдал хүлээсэн нь аймгийн МАН-ын хороо ард иргэддээ хэрхэн хүрч ажиллаж байгааг хэлж өгч байна.

Т.Энхтүвшин дарга бусдаар бурантаглуулж, МАН-ын хороог дунд нь хагалаад байх юм бол айсуй 2020 онд Дорноговь аймагт МАН ялагдал хүлээх нь дамжиггүй. Саяхны болж өнгөрсөн Ерөнхийлөгчийн сонгуулиар ч ялагдлын хөрсөө усжуулаад бордчихлоо. Өдгөө энэ хөрсөн дээрээ тариа будааныхаа үрийг лавтай суулгасан бололтой. Энэ тариа будааны үр соёолоод ирэхийн цагт тасдах арга хэмжээ авахгүй бол айсуй сонгуулиар ямар ургац хураах нь ч тодорхой болж байна. Тасдаж байна гээд хүнд харагдах хэсгийг тасдан жүжиг тавих юм бол тасдуулсан үр дахиад л соёолно. Тэгэхээр бүр үр үндсээр нь ухаж авах хэрэг гарна. Тэгэхийн тулд Дорноговь аймагт, аймгийн МАН-д шинэчлэл хийх цаг нь болсон. Шинэчлэлийг заавал дарга цэрэг сольж огцоруулснаар болохгүй байх. Гэхдээ Энхтүвшин мэт бусдаар бурантаглуулсан нөхдийг зайлуулж байж л эрүүл болж таарна. Тэгэхгүй бол нэгэнт бий болсон хөрсөн дээр ялагдлын үр соёолон ургасаар байх болно. Толгойг нь ишийг нь хэчнээн тасдаад ч нэмэргүй.

Аливаа намын ялагдал яах аргагүй өдгөө Дорноговь аймагт болж буй процессоос болдгийг хаа хаанаа мэдэх болсон буй заа. Энэ завхарсан хэлхээг таслаж, бага дээр нь эрүүлжүүлж байхгүй бол намын үнэт зүйл, гишүүдийн итгэл саармагжих буурах нь улам л их болдог шүү дээ.

Эх сурвалж: Шуурхай.мн Х.Баатар