Архангай аймгийн Өндөр-Улаан суманд эсгийний үйлдвэр ашиглалтанд оров

Архангай аймгийн Өндөр -Улаан сумын сумын уугуул Г.Ариунбаатар, М.Мөнхбаяр нар хамтран тус үйлдвэрийн үйл ажиллагааг эхлүүлсэн аж.  Тэд үйлдвэрийн тоног төхөөрөмжөө 25 сая төгрөгөөр авсан бөгөөд эсгий үйлдвэрлэлээ эхлүүлэхээр сумын сум хөгжүүлэх сангаас 10 сая төгрөгийн зээл авчээ.

Тэд өөрсдөөсөө гадна хоёр ч хүнийг ажлын байраар хангаж байгаа. “Эсгий 5м20см-ийн урттай, чанар сайтай ба нэг бүрийн үнэ нь 47,000 төгрөг. Сум орон нутагт борлуулалт сайн. Цаашид энэ хэвээр үргэлжилбэл үйлдвэртээ ажилчин нэмж авна” хэмээн залуус ярьж байна. Г.Ариунбаатар, М.Мөнхбаяр нар эсгийний үйлдвэрлэлээ тогтмолжуулах үүднээс төлөөлөгчийн эрх авч малчдаас хонины ноосыг зах зээлийн үнээр авдаг байна. Өнөөдрийн байдлаар өдөрт 10 эсгий гаргах хүчин чадалтай ч ноосны хэмжээнээс хамааран 3-4 эсгий хийж байгаа аж. Цаашид ч нэмэгдүүлнэ гэж байна.