Урлагийнхан буруугүй

Ерөнхийлөгчийн сонгуулийн санал хураалт дуусч дахин санал хураалт болох нь нэгэнт тодорхой боллоо. Харин энэ сонгуулийн үеэр нэр дэвшигчдээс дутахгүй баалуулсан хүмүүс бол урлагийнхан. Тэднийг үзэл бодлоо худалдаа энээ тэрээ гэсэн зэвтэй үгээр өнөөх “мэргэн цагаан ард”-ууд нь хайр гамгүй сүлбэв.

Гэвч ганц л зүйлийг ойлгох хэрэгтэй. Ямар ч хүн илүү үнийн санал хэлсэнд нь бараагаа зарна, үйлчилгээ үзүүлнэ. Талхчин, янхан байсан ч энэ үйлчилнэ. Харин урлагийнхан бол үнэндээ сонгуулийн үеэр зүгээр л ажлаа хийж, үндсэн ажлынхаа хажуугаар “халтуур” гэсэн халтар үгээр тодорхойлдог нэмэлт орлого олсон л төдий. Өнөөх нэмэлт орлого нь тэгээд тендэрээс хуссан, ард түмнээсээ хулгайлсан, газар зарсан улстөрчдийн мөнгөний хажууд шүлс төдий л. Яг үүгээр нь далимдуулж “саналаа худалдсан” гэдэг бол худлаа. Бүгд санал өгөхдөө өөрсдийн итгэл үнэмшилээ дагаад дугуйлдаг. Үүнийг санал өгч үзсэн хүн болгон уг нь мэднэ. Гэвч өнөөдөр мэддэгээ мэдэхийг л хүсэхгүй байгаа юм. Зах зээлийн нийгэмд шилжсэн энэ 30 шахам жилийн туршид соён гэгээрүүлэх ажлаа урлагийнхан зуун хувь биш юмаа гэхэд 70, 80-аас дээш хувьтай хийсээр байгаа. Хийсээр ч байна гэдэгт нь итгэдэг. Харин улстөрчид өнгөрсөн хугацаанд ард түмнээ сайхан амьдруулах, улс орноо хөгжүүлэх үндсэн үүрэг, зорилтоо хэр биелүүлснийг олон түмэн мэднэ. Тиймээс улстөрийн элдэв хар хэрүүлдээ урлаг, соёлынхоноо дахин бүү хутгаасай, тэд зөвхөн ажлаа хийж байгаа гэдгийг нь ойлгоосой гэж хүсч байна.

Эцэст нь хэлэхэд Урлагийнхан ямар ч буруугүй.

Т.Дархан