Зузаан түрийвчтэй ч оюун санааны хувьд гуйлгачин хэсгээ бид элит гэдэг

Зохиолч Б.Наминчимэдтэй ярилцлаа.

20 боть роман бичнэ гэдэг миний хувьд боломжгүй, бас солиотой явдал

- Саяхан хэвлүүлсэн “Аугаа эрин: Хөх илдний очис” роман тань уншигчдын төдийгүй мэргэжлийнхний ч анхаарлыг татаж байна. Энэ романаа бичих санаа хэзээ гарав?

- 2004 онд “Хубилайн сүйдсэн флот буюу Шулмын салхи” нэртэй түүх, уран сайхны нийтлэл бичсэн юм. АНУ-ын баруун эргийн Элээд амьдардаг танил маань тэр нийтлэлийг уншаад “Үүгээр кино хийвэл маш сайхан кино болох нь ээ. Өнөөдөр Холливүүд сэдвийн өлсгөлөнд гүн орсон. Ойр хавийн хамаг сэдвүүдээ мөлжөөд дуусаж байна. Харин чи энэ нийтлэлээ кино зохиол болговол надад Холливүүдэд таньдаг найруулагч бий. Би үзүүлье. Бүтэж ч юу магад” гэсэн юм. Тэгээд урам ороод кино зохиол бичих гэж тэр үед оролдсон. Бүр Холливүүдийн Кино зохиолчдын гарын авлага гэдэг хоёр хуруу зузаан номыг хүртэл олж аваад уншсан.

Гэвч би чадаагүй. Түүх, уран сайхны нийтлэл бичих нэг хэрэг, харин тэр том үйл явдлыг ул суурьтай, итгэл үнэмш бичнэ гэдэг тун амаргүй болохыг ойлгосон юм. Наад зах нь гэхэд тэр цагийн монгол далайчдын зэвсэглэл, хүнс юу байсан юм, ямар дохио зангаа хэрэглэдэг байсан бэ, япон дайчид яаж жагсдаг, солонгос хийгээд Сүн улсын дайчид ямар хувцастай байсан гэх мэтээс эхлээд Их Монгол улс, Япон, Солонгос, Хятадын Сүн гэх мэт зүүн болон зүүн өмнө Азийн улс орнуудын улс төр, цэргийн ажиллагаа ямар байсан гэх мэт маш олон зүйлийн талаар үнэхээр мэдлэг дутуу байгаагаа ухаарсан. Зүгээр нэг юм бичээд гаргаж болно л доо. Гэхдээ л ийм том түүхэн үйл явдлын тухай тийм нимгэн мэдлэгээр, бас хөнгөн хуумгай бичнэ гэдэг бол тэр их түүхээ зүгээр л үл хүндэтгэсэн төдийгүй доромжилж буйтай адилхан зүйл болно.

Тэгээд зогсохгүй Японд манай их цэрэг дайран орсон тэрхүү үйл явдал нь Юань гүрний гадаад бодлого төдийгүй XIII зуунд ялан мандсан Их Монгол гүрний язгуур үзэл санаатай гарцаагүй холбоотой болохыг ойлгосон. Тэгэхээр зөвхөн ганц тэр үйл явдлыг таслан үзүүлэхэд ч ихээхэн учир дутагдалтай болж байгаа юм. Тэгээд судалгаа хийж эхэлсэн.

10 гаруй жил өөрийн хэр хэмжээндээ судалж, сонирхож уншсаны үр дүнд ер нь Их Монгол гүрний мөн чанар нь нэг тийм юм байна, түүнийг харуулахын тулд бүр Хамаг Монголын үеэс буюу өнөөх “Одтой тэнгэр орчиж, Олон улс хямралдаж” байсан хүнд хэцүү цаг үеэс эхлүүлэх хэрэгтэй юм байна гэсэн итгэл үнэмшилтэй болсон юм.

Хэдий өнөө миний судалсан, уншсан маань чамлалтай ч одоо хойш тавилгүй, бас өөрийгөө гололгүй бичих цаг болсон гэж үзээд өнгөрсөн намар суусан даа.

- Та яг романаа хэдэн сар, жил сууж бичив? Таныг 10 жил бичсэн гэж дуулсан.

Хэдий арав гаруй жил бодож, эрж хайж, төлөвлөж, янз бүрийн дүр цээжин цаанаа төсөөлж явсан ч яг бичих нь өнгөрсөн оны 10 сарын сүүлээр суугаад энэ оны 1 сарын сүүлээр дууссан. Гурван сар гаруй хугацаа юм уу даа. Түүнээс биш 2004 оноос хойш тасралтгүй бичээд байсан гэсэн үг биш шүү дээ. Ер аливаа зохиол бүтээл гэдэг бол уран бүтээлчийн тэр зохиолыг бичих үе хүртэл хураасан мэдлэг, амьдралын туршлага, ур чадвар, өөр юу байдаг билээ, тэр бүхний үр жимс нь. Хэрвээ 10 орчимхон жилийн туршлага, мэдлэгээр бичиж буй бол харин ч бага хугацаа, олигтой ч бүтээл туурвил гарах нь юу л бол. Тэгээд ч энэ их үйл явдлын тухай тийм хөнгөн гоомой хандаж боломгүй дээ.

- “Аугаа эрин” нэгдүгээр дэвтэр гэсэн байна лээ. Цаашдаа үргэлжилнэ гэсэн үг үү?

- Үргэлжилнэ. Миний төсөөлж буйгаар 1170-аад оноос 1280-аад он хүртлэх 108 орчим жилийн хугацаанд Евразид өрнөсөн тэр их үйл явдлын тухай тодорхой хэмжээгээр илэрхийлэх учир нэг хоёр ботид багтах боломжгүй юм. Юутай ч 5 боть болох болов уу. Гэхдээ эхнийхээ ботид хичээгээд хичээгээд дөрөвхөн жилийн үйл явдлыг багтаав. Энэ янзаар бол 5 биш 20 гаруй боть болж ч мэднэ.

- Тэгэхээр бид 20 боть роман уншиж магадгүй нь ээ?

- Өө, надад бол тийм бодол огтхон ч алга. 20 боть роман бичнэ гэдэг миний хувьд боломжгүй, бас солиотой явдал. Яаж ийгээд 5 орчим ботид багтаахгүй бол болохгүй. Их сайндаа 8 боть болно. Нэг зохиол бичих гээд хамаг амьдралаа зориулчихна гэж юу байх вэ? Надад өөр бичихээр сэдэв, санаа бишгүй байна. Бас дээр нь цаг хугацааны хувьд ч боломжгүй. Би роман бичих гээд 30 жил нухсан Гончаров биш шүү дээ… Надад тийм тэсвэр тэвчээр болоод боломж нөхцөл огтхон нь ч байхгүй.

- Та дараагийнхаа ботиудыг хэдийд уншигчдын гар дээр тавихаар бодож байна вэ? Уншигчид нэлээд нэхэж, үгүйлж байгаа нь анзаарагддаг.

- Бас л хэцүү асуулт байна. Уг нь би энэ наадмын өмнө 2-р ботио, шинэ жилээс өмнө 3-ыг нь, ирэх онд үлдсэн 2 ботийг нь биччихнэ гэсэн бодолтой байсан. Гэвч аж ахуйн ажилтай зууралдсаар байгаад 3, 4, 5 гэсэн гурван сарыг алдчихлаа. Ийн цаг хугацаа алдах хэрээр цээжин цаана байж ядсан харуусал халаглал төрж буйг мэдэрдэг. Гээд яахав. Юутай ч энэ ойр зуурын ахуй амьдралын жижиг сажиг асуудлыг цэгцэлж авахгүй бол бас тухтай бичиж чадахгүй шүү дээ. Гэхдээ хэдий 3 сар алдсан ч ямар нэгэн саад садаа л тохиолдохгүй бол энэ ондоо багтааж 2 болон 3-р ботиудыг биччихнэ гэсэн итгэл бол байна.

.

ҮНДЭСТЭН ОЙ САНАМЖАА АЛДАХ АЮУЛЫГ БИД АЛХАМ ТУТАМДАА САНАЖ БАЙХ ЁСТОЙ

.

- Түүхэн уран сайхны бичлэгийн хөгжлийн эрин үе ирж байна гэж судлаачид ярих болов. Энэ талаарх таны бодол? Та ч бас тийм түүхэн нийтлэлүүд цөөнгүй бичсэн санагдана. “Бат, Сүбээдэй нар Дорнод Европт”, ”Айн-Жалудын домог”

“Шулмын салхи буюу Хубилайн сүйдсэн флот” зэрэг цөөнгүй нийтлэлүүдийг тань уншигчид сайн мэднэ.

- Яах аргагүй түүхийг уран сайхны нийтлэл хэлбэрээр илэрхийлдэг туурвилзүйн хүчирхэг урсгал түрээд ороод ирлээ. Түүх дангаараа уншигчдад хүрэх нь бага, цөөхөн мэргэжлийнхэн л уншина. Харин түүхийн тэр олон баримт, логик, үзэл санааг уран сайхнаар, гэхдээ түүхэн гольдрилоос нь гаргалгүй, гажуулалгүй бичих аваас маш олон уншигчдад хүрч байна. Уншигчид ч дан уран зохиол, эсвэл дан түүх уншихаас илүүгээр тийм төрлийн бүтээлд татагдах болсон нь анзаарагддаг.

Ийм төрлийн нэг том төлөөлөл бол монголчууд бидний сайн мэдэх Жак Уэтерфорд байна. Хэдий түүх судалгаа талаасаа учиргүй өндөр түвшний биш ч жирийн уншигчдад түүхийг хүүрнэн хүргэж чадаж байгаа амжилтаараа маргашгүй юм.

- Манай түүхчид, судлаачдаас Жек Уэтерфордын номонд шүүмжлэлтэй хандаж буй нь бас хааяа сонсогддог?

Түүхийн зарим гаргалгаатай нь санал нийлэхгүй тал бий. Гэхдээ монголчуудын хувьд Жак Уэтерфордод бидний түүхийг дэлхий дахинд хамгийн үр бүтээлтэй хүргэн эерэгээр сурталчилж чадсанд талархах ёстой. “Өнөөгийн ертөнцийг үндэслэгч Эзэн Чингис хаан” ном нь л гэхэд 36 оронд, хэдэн сая хувиар хэвлэгдсэн. Энэ ном бүхний цаана монголын түүхийн сурталчилгаа, мэдлэг, мэдээлэл түгэж байгаа. Хамгийн гол нь Жек монголын түүхийг маш эерэг талаас нь харж, тайлж, монгол хүний зүрх сэтгэлээр бичсэн. Манай түүхийн талаар бичсэн гадны эрдэмтэн судлаачдын үнэмлэхүй олонхид нь дутагддаг нэг зүйл бол Монголын түүхэнд их харь хөндий хандаж, бидний сэтгэлгээ, ахуй соёлын онцлог байдлыг огт үл анзааран өнгөрдөг явдал юм. Харин Жекийн хувьд эсрэгээрээ. Монголын төр ч түүний гавьяа зүтгэлийг үнэлж одонгоор шагнасан.

Түүхийг уран сайхны нийтлэл хэлбэрээр сонирхолтой бичих нь ямар их үр дүнтэй болохын тод жишээ энэ. Харин манай түүхчид эрж олсон арвин баялаг, нэн сонирхолтой баримтуудаа эгэл жирийн уншигчдад хүргэх талаар учир дутагдалтай. Гэтэл авьяастай сэтгүүлч, зохиолчдод нь түүхэн мэдлэг илэрхий дутдаг. Тэгэхээр би түүхчдэд Жекээс үлгэр аваасай, зохиолчдод түүхээ сайн судлаасай л гэмээр…

- Манай түүхэн зохиол бичиж буй зохиолчдын түүхийн судалгаа хэр далайцтай байдаг вэ?

- Далайцтай судалгаа хийж бичдэг зохиолчид манайд бий шүү дээ. Б.Ринчен гуайн “Заан Залуудай”-г уншихад л мэдэгдэнэ. Бид тэр чулуун зэвсгийн үед аялаад ирсэн мэт болно. Мөн “Зүрхний хилэн”, “Манан будан” зэрэг олон түүхэн роман бичсэн Ж.Пүрэв гуайн судалгаа нөр их болох нь анзаарагддаг. Т.Мандир ахын судалгаа ч бас нясуун, гайхаж алмайрмаар шүү.

- Та уран зохиолын түүхэн танин мэдэхүйн ач холбогдлын тухайд юу хэлэх вэ?

- Зарим тохиолдолд мэргэжлийн түүх бичлэгээс ч илүүгээр тухай цаг үеийг түүхэн зохиол тодорхойлох нь бий. Марксыг эдийн засгийн засаглалын мөн чанарыг нээсэн алдарт “Капитал”-аа бичихэд нь тухайн үеийн толгой эдийн засагч Прудоноос илүүгээр Бальзакийн нийгмийн романууд тус болсон тухай дурссан байдаг. Дундад зууны Европын сэтгэлгээний маш өвөрмөц онцлог, хандлагыг “Дон Кихот”-оос л харахаас биш ямар нэгэн түүхийн судалгааны бүтээлээс олж харахад бэрх.

Эртний Мисирийн түүхийг түүхийн сурах бичгээс илүүгээр Пруссын цуврал роман барим тавим өгүүлж магадгүй. Ромын хүчирхэг гүрэн мөхөн унасан шалтгааныг Синкевичийн роман илүү тодорхой харуулдаг, Парисийн коммуны гал бадарсан урианы цаана юу болсныг А.Франсын “Ундаассан бурхад”-аас, Туркийн эзэмшлийн үеийн Балканы хойгийн ард түмний амьдралын нарийн ширийнийг Иво Андричийн “Дарина голын гүүр”-ээс мэдэж болох шүү дээ. (Энд зөвхөн сонгодог зохиолуудын тухай яриа юм. Түүнээс биш түүхэн зохиол бүхэн танин мэдэхүйн хувьд ийм өндөр түвшинийх байдаггүй. )

- С. Молор-Эрдэнэ филисофич “Чингис хаан Монголд юу ч бүтээгээгүй…” гэлээ. Ер нь Монголын түүхийг гадаадад төдийгүй дотооддоо ч үгүйсгэх хүн байдаг?

- С. Молор-Эрдэнэ докторын хувьд ямар санаагаар тэгж хэлснийг мэдэхгүй юм. Огт мэдэхгүйдээ тэгж хэлсэн гэдэгт эргэлзэж байна. Зориудаар өдөөж, цочоон сэрээх гэсэн ч байж магадгүй. Түүнээс тийм энгийн зүйлийг мэдэхгүй баймааргүй.

Ер нь монголынхоо түүхийг үгүйсгэдэг, ерөөсөө түүх хэрэггүй гэж үздэг, зөвхөн эдүгээ цаг үеэс, өнөөдрөөс л маргааш эхэлнэ гэж ойлгодог харалган байдал манай залуучуудын дунд үзэгдэл хэмжээнд харагдаад байна. Бидний үндэстэн уг язгуураа онож мэдэхгүй бол хаана ч хүрэхгүй. Хөгжих ч үгүй. Үүнийг хэрхэн яаж ойлгуулахыг би мэдэхгүй байна. Харалган мэдлэггүй байдал нь хөөргөн дэвэргэнтэй нийлэхээрээ жинхэнэ төөрөгдөл, туйлшрал болох юм. Зарим нь бүр зориудаар ч монголын түүх, өв соёл руу нулимж байна. Харамсалтай л…

- Түүх өв соёлоо танин мэдэхийн ач холбогдлын талаар та залууст хандаж юу хэлэх вэ?

- Олон учир шалтгаан бий. Юуны өмнө үндэстэн өөрийнхөө онцлогийг хадгалсан тусгаар улс байхын нэг тулгуур багана нь түүх соёл. Түүх соёл, өв үгүй бол бид нэг л мэдэхэд харийн соёлд автаж, харийн бодлогын золиос болж, үндэстэн мөхнө. Тийм гашуун явдал дэлхийн түүхэнд цөөнгүй байсан. Бидэнд ч нэг бус удаа туршиж байв. Манж болоод хятадууд монголчуудын түүх, өв соёлыг баллуурдаж, түүхэн санамжыг нь устгахын тулд хэдэн зууны туршид холын хараатай хорон бодлого явуулж ирсэн байдаг. Өгөөдэй хааны цэцэглүүлсэн Хархорин хотыг хятадууд эзэлж аваад бүтэн тоосго ч үлдээгээгүй нураасан. Хархорины номын сан хэдэн сар шатсан юм гэнэ билээ. Мин улсын эхэн үед Монгол үсэгтэй ном бүхнийг шатааж байлаа.

Манжууд монголын айл өрх бүрээр явж, уг удам, түүх соёлын ном судрыг хураан авч, оронд нь бурхны шашны ном түгээсэн. Асар их зүйл хураасан гэдэг. Алтан ургийн өрх бүрд Монголын Нууц Товчоо байсан гэдэг. Тэгээд хураан авсныгаа шатаасан. Энэ бүхний үр дүнд бид өнөө хүртэл Монгол бичгээрээ бичсэн Монголын Нууц Товчооны эхгүй сууж байгаа шүү дээ. Азаар хятад үсгээр галиглаад бичсэн тулдаа нэг эх бүрэн эхээрээ үлдэж. Сүйтгэгчид хятад бичгээр бичсэн тэр эхийг анзаараагүй хэрэг.

Хожимхон социалист үзэл суртлын дор ч манай өв соёлд их хэмжээгээр халдсан. Өнөөдөр ч ардчиллын далбаан дор харийн олон янзын соёл ямар ч хяналтгүйгээр орж ирж буй нь манай өв соёл, уламжлалт сэтгэлгээнд маш ноцтой гамшиг болж байна. Өнөөдөр мэдсэн мэдээгүй, санаатай санаагүйгээр “Монголын түүх гэж байхгүй”, “Өнгөрсөндөө битгий амьдар, зөвхөн ирээдүйгээ хар”, “Ирээдүйгүй хүмүүс л өнгөрсөнөө ярьдаг” гэх мэт тархи угаалтын илрэлүүд их сонсогдож байгаа нь тэр бүхний л үр дүн шүү дээ.

Ингээд ирэхээрээ л осолтой болоод ирж байгаа юм. Зомби болгож, далд колоничлолдоо халуун зэвсэг хэрэглэхгүйгээр дагуулан авдаг арга технологи өнөөдөр дэлхийн олон оронд ил далд хэрэгжиж байгаа. Тэр ч манайд ороод ирсэн. Гитлерийн герман Оросыг эзэлсний дараа ямар улс орон болгох вэ гэдгээ тодорхойлсон “Ост” хэмээх төлөвлөгөөг бид мэднэ шүү дээ. Ард иргэдийг зүгээр л сэтгэх чадваргүй, ухааран тунгаах боломжгүй хямдхан ажиллах ажлын мал болгох зорилго тавьж байсан. Өнөөдөр ч тийм зорилго нэг бус их гүрнүүдэд бий, түүнээ ч ардчилал, хүний эрхийн далбаан дор бидэн дээр туршиж хэрэгжүүлж байгаа. Үр дүн нь илэрхий анзаарагдаад байдаг юм.

Хятад манжууд ямар ч бодлогогүйгээр манай өв соёл руу дайраад байсан хэрэг биш шүү дээ. Биднийг уг язгуураас нь салгаж, дуулгавартай боол болгох гэсэн л зорилгоор тийн үйлдэж байсан гэдгийг огтхон ч мартаж болохгүй. Ой санамжаа алдаагүй байгаа хүн өөрийгөө хэн болохоо мэдэж, өөрийн онцгой оршихуйгаа хамгаалж чаддаг, харин ой санамжаа алдах аваас хэн хүний тоглоом, боол, хямд хөлсний ажиллах хүч, зомби болдог лугаа адил ой санамжаа алдсан үндэстэн ч мөн адил. Бид энэ аюулыг мөч тутамдаа санаж байх ёстой юм.

Мөн ирээдүйн хөгжлөө зөв оновчтой төлөвлөх, хөгжлийнхөө гарцыг олоход бидний тэр түүх, өв соёл нэг нэн чухал тулгуур болдог гэдгийг ч мартаж болохгүй юм. Энэ талаар яривал олон зүйлийг хэлэх болно.

Ядахнаа нь энэ орой бүр ТВ-ээр гардаг Солонгосын олон ангит түүхэн кинонууд нэгийг хэлнэ дээ.

- Тэдгээр солонгос сериалууд чухам юуг хэлдэг вэ?

- Хэрвээ үздэг бол тэдгээр цувралуудад өнөөгийн солонгосын өвөг дээдэс бол баатар зоригтой, яруу алдартай, шударга үнэнч, дайнд ялагддаггүй гайхалтай ард түмэн байжээ гэсэн ойлголт төрнө. Тэд энэ мессежээрээ хойч үеийнхнийхээ өөртөө итгэх итгэлийг хөгжөөж, урам зоригийг нь бадрааж, нийгэмд эв нэгдлийн уур амьсгалыг түгээгээд зогсохгүй дэлхий дахинд үндэстнээ сурталчилж байна. Хятадууд, казакууд ийм киног олноор нь хийдэг. Сүүлийн үед оросууд социализмын үед хийж байсан эх оронч баатарлаг түүхээ харуулсан кинонуудаа дахин шинээр хийгээд эхэллээ. Бизнес талаас харахад нэг хэрэг, нөгөө талаас үндэстний хөгжлийн томоохон бодлого, бас зөн юм. Хүүхэд залуус, хойч үе нь өвөг дээдсээ хүндэлдэггүй, тэднийхээ бахдам үйлсээр бахархдаггүй, үлгэр дуурайлал авдаггүй үндэстэн бол ямар ч ирээдүйгүй болсон, мөхлийнхөө ирмэг дээр ирсэн л гэсэн үг.

Гэтэл бид чинь асар баялаг түүх, өв соёлтой ард түмэн шүү дээ.

Нөгөө талаар бид Монголын бахархам түүх гэхээр л зөвхөн байлдаж, ялснаа л ярьдаг. Гэтэл тэр ялалт, тэмцэл бүхний цаана байдаг үзэл санаа, соёл, ёс суртахуун, үнэт зүйл, шударга ёсны тухай бид тэр бүр ярьдаггүй, бичдэг ч үгүй. Гэтэл түүхэн үйл явдал гэдэг зүгээр нэг үйл явдал төдий биш шүү дээ. Тэр бүхний цаана асар их оюун санаа, сэтгэл зүй, ёс суртхууны өрнөл, тэмцэл, дайн болж байдаг. Бид түүхээсээ тэр талыг нь маш бага сөхөн харж байна. Тиймээс л түүх бол хэрэггүй юм гэсэн гэнэн хөөргөн дүгнэлт гарах нэг шалтгаан нь энэ байж магадгүй.

.

АРИГБӨХ ХААНЫ ХЭЛМЭГДЭЛ 800 ЖИЛ ҮРГЭЛЖИЛЖ БАЙГАА

.

- Аригбөх хааныг Их Монгол Улсын тав дахь их хаан гэж ярьдаг, хүлээн зөвшөөрдөг иргэд бий. Та Аригбөх хааны тухай ном бичсэн хүн, ямар бодолтой явдаг вэ?

- Аригбөх хаан бол Мөнх хааны дараа Их хуралдайгаар сонгогдсон дэлхийн Эзэнт их гүрний хууль ёсны сүүлчийн хаан юм. Түүнээс хойш Юань, Ил хаант улс, Цагаадай, Хайдугийн улс, Алтан ордны улс гэх мэт тус тусдаа улс болчихсон. Хэдий Хубилай хааныг зарим хаант улсууд хүлээн зөвшөөрөх байдалтай байсан ч тэр нь ёс төдий байв. Өөрөөр хэлбэл дэлхий нийтийг хамарсан Эзэнт их гүрний шинж чанараа алдчихсан гэсэн үг юм.

Аригбөхийг хууль ёсны хаан байсныг батлах олон баталгаа байдаг. Тийм атал өнөөдөр ч Аригбөх хааныг Чингис хаанаас Лигдэн хутагт хаан хүртэлх жагсаалтад багтаадаггүй. Монголын албан ёсны түүхийн сурах бичгүүдэд ч хаан байсан гэж бичдэггүй. Хэдхэн сар хаан сууринд суусан хүмүүс цөөнгүй. Тэдний хажууд Аригбөх өвөг Чингис хааныхаа Хасбуу тамгыг өвөртлөөд, Их цагаан сүлдийг нь өргөж, зарлиг тушаалаа гаргаж, зоос дэлдүүлж, хэдий ээдрээтэй ч хууль ёсны засаглалаа дөрвөн жил хэрэгжүүлж ирсэн хаан шүү дээ. Тиймээс би л хувьд Аригбөх хааныг 800 гаруй жил хэлмэгдэж яваа гэж ойлгодог. Тэр итгэл үнэмшлийн үүднээс л тэр номоо бичсэн

.

-Аригбөхийг хаан гэж хүлээн зөвшөөрөх нь Хубилай хааныг хаан биш гэж үзэж байгаа хэрэг биш үү?

- Үгүй юм. Хубилай хаан Монголын болоод Хятадын түүхэнд, бүр дэлхийн түүхэнд ч баллуурдахын аргагүй том ул мөрөө үлдээсэн их хаан. Чингис хааны дараа Хубилай хааныг дэлхий дахин мэддэг. Аригбөхийг хаан гэдгийг хүлээн зөвшөөрөх төдийгөөр бүдгэрээд алга болчих хэмжээний хаан биш. Энд нэгийг нь нөгөөгөөр үгүйсгэдэг, баллуурдан алга болгох гэдэг туйлшралаас ангидаар харах, үнэлж дүгнэх хэрэгтэй юм.

Түүхэн үйл явдлыг дарааллаар нь харах аваас Хубилай хаан болохдоо яах аргагүй Их засаг хууль зөрчсөн. Ингэхэд Аригбөхийг хаан ширээнд залсан Алтангорхины их хуралдайгаас хойш дахиж хэзээ ч их хуралдай болоогүй юм шүү дээ. Их засаг хууль үйлчлэхгүй болсон гэсэн үг. Ингээд дөрвөн жил ах, дүү хоёр дайтсны дараа Аригбөх хаан бууж өгөхдөө хаан төрийн эрх хэмжээг бүрэн тодорхойлдог хасбуу тамга, хар, цагаан сүлд бусад эд зүйлсийг ахдаа аваачиж өгсөн. Ингэснээр Хубилай хаан хууль ёсны эрхээ баталгаажуулсан хэрэг. Тэр завсар Их гүрэн задарч, хэд хэдэн улс болон хуваагдсан эргэлт буцалтгүй үйл явдал өрнөсөн. Нэг жарны турш юунд ч торохгүй ялан дийлж мандан бадарч явсан монголчуудын тэр их сүр хүчийг ямар ч үндэстэн сөрөн зогсоох чадваргүй байлаа. Гагцхүү монголчуудад өөрсдөд нь л тэр их хүчний оргилолтыг зогсоох хүчин нуугдаж байжээ. Түүхэн эрх тийн өрнөсөн хэрэг. Тэгээд Аригбөхийг хаан сууринд суусан 1260 оноос Их эзэнт гүрний газар бүр салан тусгаарлах үйл явц өрнөж, монголын дэлхийг хамарсан иргэний дайн эхэлсэн. Тийм л түүхэн их эргэлтийн золиос болсон хүн юм, Аригбөх хаан бол. Золиосонд Аригбөх өртөж, Хубилай үлдсэн хэрэг. Ах дүү хоёрын хэн нэг нь золиосонд явахаас аргагүй тийм цаг үе байжээ.

Нэг бодлын их эмгэнэлтэй, бас бахархам түүх. Ер нь Аригбөхийг зүй ёсны хаан байсан гэдгийг батлах хэд хэдэн гаргалгаа, баримтууд байдаг. Тэр бүхнийг яривал урт яриа болно.

-Зүчи, Тулуйн удмынхан нийлж, Бат хаан удирдаад төрийн эргэлт хийж Мөнх хааныг ширээнд залснаар Өгөдэйн удмаас, Тулуйнханд төрийн эрх шилжсэн, ордны эргэлт болсон гэж боддог. Уг нь Өгөдэй хаан ширээнд суухдаа өөрийнх нь удмаас “Өвсөнд боовч үнээ, өөхөнд ороовч нохой идэхгүй” хүн гарсан ч хаан болох ёстой гэсэн ам өчиг авсан гэж гардаг даа?

-Өгөдэй хаан “Миний үр удмаас өөхөнд ороовч нохой тоож шиншлэхгүй, өвсөнд ороовч үхэр тоож долоохгүй хүн төрсөн ч хаан ширээнд залж байх ёстой” гэж гэрээслэх хэмжээний тэнэг мунхаг хүн байгаагүй. Энэ бол санаатай болон санамсаргүй төөрөгдөл. Ер нь Монголчууд өмнө нь ч ураг удмынхаа аль сайныг сонгон хаанд өргөмжилдөг уламжлал байсан. Хабул хаан ширээ залгах хүүгээ байсаар байхад авга ахынхаа хүү Амбагайд хаан ширээг залгамжлуулсан. Амбагай хаан цэцэн мэргэн ухаантай, эвийг эрэмлэдэг хүн байжээ. Амбагай сэцэн хаан ч бас тэнгэр болохдоо өөрийнхөө хүүхдүүдэд биш Хабул хааны хүү Хотулад хаан төрөө залгамжлуулсан. Энэ нь ямар ч бай хамаагүй миний л үр удам хаан ор суух ёстой гэж дайрдаггүй, төр ёсоо дээдэлсэн, улс гүрнийхээ ирээдүй хойчийг бодсон их ухаан юм.

Өгөдэй хааныг нас барсны дараа хатан Дөргэнэ эрх мэдэлд дурлаж, бас үр удамдаа хаан ширээг авч үлдэх гэж дөрвөн жил Их хуралдай зарлаагүй, хаан эрхийг мэдэж байв. Тэр хооронд төрийн сүр хүч унаж, чадамж буурч, янз бүрийн овлигогүй зальтай улс Монголын төрд олноороо шургалж, Их Монгол гудайх эхлэл тэр үед тавигдсан л даа. Чухам Гүегийн хатан Огул Хаймишийн дараа л хаан ширээ Өгөдэйн удмаас Тулуйн удам руу шилжсэн. Хэдий наанаа Их хуралдайгаар мэт боловч үнэн хэрэг дээрээ төрийн эргэлтийн шинжтэй үйл явдал болсон. Төрийн эргэлт хийхээс аргагүй нөхцөл байдлыг үүтгэсэн явдал ч үнэхээр болсон хэрэг шүү дээ.

- Мөнх хааны дараа төрсөн хоёр дүү нь хаан ширээ булаацалдаад бүр төр “самарсан” байх. Уг нь Мөнх хаан залгамжлагчаа зарласан бол…

- Мөнх хаан хаан ширээгээ отгон дүү Аригбөхдөө гэрээсэлсэн байх магадлал өндөр байдаг. Сүн улс руу дайтахаар явахдаа ард үлдсэн гал голомтоо Аригбөхөд итгэн үлдээсэн. Мөнх хаан Аригбөх дүүгээ дэргэдээ ойрхон байлгаж, их ч ойр дотно явсан байдаг. Мөнх хааныг нас барсны дараа үр хүүхдүүд нь насанд хүрчихсэн, том хүү Асудай нь цэрэг арми удирдаад явж байв. Өөрөөр хэлбэл хаан ширээнд өрсөлдөх боломжтой гэсэн үг. Гэтэл тэрбээр Аригбөхийн талд тууштай байж, эцсээ хүртэл тулалдсан. Мөнх хааны их хатан Хутугтай ч Аригбөхийг дэмжсэн. Тэгэхээр энд ямар нэгэн хэлхээ холбоо сэжим байгаа.

Нөгөө талаар Мөнх хаан яагаад ч Хубилайд хаан ширээ залгамжлуулахгүй. Тэр хоёрын хооронд маш ноцтой зөрчил байсан. Тэр зөрчил нь даамжраад Хубилайг баривчлах асуудал хүртэл яригдаж байсан үе бий. Тэгэхээр Мөнх хааныг отгон дүү Аригбөхдөө хаан ширээг залгамжлуулах гэрээслэл үлдээсэн, үгүй ядахдаа Хубилайгаас хувь илүүгээр итгэн найдаж байжээ гэж харагддаг юм.

.

ЯГ АДИЛХАН ХАРДАГ БОЛ АМЬДРАЛ СОНИРХОЛГҮЙ…

.

- Зохиолч, яруу найрагч Д.Оюунчимэг та хоёр гэр бүлийн улс. Аюурзана, Өлзийтөгс хоёр номоо харилцан редакторладаг, биесийнхээ уран бүтээлийг үнэлдэг шиг та хоёрын хооронд бас уран бүтээлийн дотно харилцаа байна биз?

- Уран бүтээлчид нэг гэр бүл байхад давуу тал бий. Биесээ ирлэж хурцалдаг, санаа оноогоо хуваалцдаг, сайн муугаа ярилцдаг. Хамгийн сайн зөвлөгч, бас шүүмжлэгч нь байдаг. Заримдаа санаа нийлэхгүй юм ч бий. Уран бүтээлч хүмүүсийн ааш араншинг мэднэ дээ, өөрийнхөөрөө байдаг. Миний “Аугаа эрин” номын хяналтын уншилтыг хийж манай хүн өглөө үдэшгүй л суусан.

- Д.Оюунчимэгийн “Оройн ганц мод” романыг шүүмжлэгч, судлаачид өндөр үнэлсэн. Таны хувьд…

- “Оройн ганц мод”-ыг манай утга зохиолын хүрээний үе үеийнхэн болох Дармын Батбаяр, Ломбын Нямаа, Д.Энхболд, П.Батхуяг, Я. Баяраа гээд цөөнгүй уран бүтээлчид сүрхий үнэлж магтах шиг болсон.

Монголд шинэ тутам гарч байгаа роман болгоныг унших санаа байдаг ч тэр бүр амжихгүй юм. Тэдгээр уншсан сүүл үеийн романуудын хэмжээнд “Оройн ганц мод”-ыг нэлээн гайгүй нь болчихлоо гэж би хувьдаа үнэлсэн. Гэхдээ санаанд хүрэхээргүй юм ч байдаг. Түүнээ ч өөрт нь хэлж, ингэж засмаар, өөрчилмөөр байна гэсэн. Манай хүн заримыг нь засаад, заримыг нь засаагүй өөрийнхөөрөө гаргачихсан нь ч бий. Хүн хүний мэдрэмж өөр. Яг адилхан хардаг бол амьдрал сонирхолгүй шүү дээ.

.

АЛДАР НЭР, ЭРХ ЯМБЫН ТӨЛӨӨ УИХ-ЫН ГИШҮҮН БОЛЖ ИЛЖИРСНЭЭС ЖАЛГАНД ОЧООД ИЛЖИРСЭН НЬ ДЭЭР…

.

-Өнгөрсөн 2016 оны УИХ-ын сонгуульд нутагтаа бие даан нэр дэвшсэн. Ядуу оюутан гэдэг шиг зохиолчдыг ядуу гэсэн тодотгол дагалддаг. Яагаад бие даан нэр дэвшиж, мөнгөөр зоддог хоёр том намын нэр дэвшигчидтэй өрсөлдөх болов?

- Өнөөдрийн улс орны нөхцөл байдал нь эрүүл ухаантай хүнд амар тайван сайхан суух арга их хомс болгож байна. Мөрөөрөө номоо бичээд явж болдог бол сайхан л байхсан. Гудамжаар машин нь багтаж ядаад, өндөр шилэн байшингууд сүндэрлээд, хүмүүсийн өмссөн зүүсэн гялалзаад, гадагшаа дотогшоо яваад болоод байгаа ч цаанаа хөгжлийн баттай суурь бүрэлдэж чадаагүй байна.

Үндэсний бат тогтвортой, бие даасан эдийн засаг алга. Зах зээлийн ЭЗ-т шилжээд хорин хэдэн жил өнгөрсөн атлаа банк санхүүгийн тогтолцоо нь өрөөл татуу, гадаад, дотоод худалдаа нь бусдын хараат, хэт өрөөсгөл эдийн засаг бий болчихлоо.

Манай эдийн засаг бидний идэвх чармайлтаар хөгжихөөс илүүгээр бусдын зангаа дохиогоор өсөж, унаж байна. Унагаахаар нь бид арчаагаа алдаад, энд тэндээс очиж гуйлга гуйдаг, өрд ордог. Эдийн засгийн тусгаар тогтнолын тухай ярихад хэцүү.

Оюун санааны хувьд ч хэцүү. Үндэсний оюун сэтгэлгээний тусгаар байдал маш эмзэг болчихсон. Нэг бус үеийнхнийг харахад харагдах төрх нь монгол, монголоор ярих авч дотоод мөн чанар нь өдрөөс өдөрт монголоосоо алсарч байна уу даа. Бидний өмнө ярьсан үндэснийхээ түүх соёлыг үл мэдэх, үл хүндэтгэх, тэр бүү хэл үгүйсгэдэг явдал нь энэ оюун санааны дархлаа ихэд хэврэг болсны илрэл юм. Хамгаалалт хяналтгүй урсан орж ирж буй даяаршилийн давалгаан дор, хүний эрх, ардчиллын хормой доогуур үндэсний оюун санаа, соёл сэтгэлгээ, ёс зүйн уламжлалт кодыг эвдэж мэдэх зүйлс орж ирж байгаа ноцтой аюул бий.

Дээр нь өнөөгийн монголын нийгэм хагарч болох бүхий л боломжоороо хагарч бутарч байна. Баян ядуугаараа талцав. Ангит нийгмийн шинж төрхүүд илэрхий ажиглагдаж байгаа. Шинэ хуучнаараа, баруун зүүнээрээ, жалга довоороо, улаан цэнхэрээрээ талцаж, хагаралдаж байна. Зүгээр нэг талцал, үзэл бодлын зөрүү төдий биш, бүр бие биесээ үл тэвчих, необольшевик маягийн хийрхэл хэнээрхэлтэй. Энэ хагаралд улс төржилт улам их түлхэц өгч байгаа. Бүр зориудаар нийгэм, ард түмнийг талцуулж хагаралдуулж байж дундаас нь түр зуурын ашиг олдог эдийн засаг, санхүүгийн нам дамжсан бүлэглэлүүд ч бий боллоо. Тэгээд энэ утгагүй явдлаа улс төр хийж байна гэж өөрсдөө ойлгож, олонд сурталчилж байгаа нь бүр ч хэцүү.

Мөн ёсзүй, шударга ёсны дутагдлын гүн шоконд манай нийгэм даяараа орсон. Их ангасан адуу ус ууж чаддаггүй эргүүлж хамраараа гаргаад байдагтай адил бид шударга ёс, ёс зүйн аливаа зөв илрэлд тун их хачирхан гайхаж, гадуурхах байдалтай ханддаг болчихсон нь чухам гүн шоконд орсны илрэл. Гэх мэт санаа сэтгэл зовоосон олон зүйл байна. Энэ бүхнийг харсаар атлаа энэ бусармаг явдал өр цоолохыг хүлээгээд хонь мэт майлж хэвтэнэ гэдэг миний хувьд тэвчимгүй.

Үзгэн зэвсэг барьсан бидний хувьд энэ бүхэнтэй тэмцэх хоёр л зам бий. Нэгд нь бичих. Би хэр чинээгээрээ л бичдэг. Бичиж ч байна. Энэ роман маань ч мөн л адил миний тэмцлийн нэг хэлбэр. Үндэстэн мөн чанараа ухаж, ойлгож, амьдрах зарчим, итгэл үнэмшил, үнэт зүйлсээ романаас маань олж харж, өөртөө итгэж, үндэстнээрээ, өв түүх, дээдсийн их ухаанаараа бахархах сэтгэл нь бадрах аваас миний бичсэн зорилго биеллээ л гэж бодно.

Хоёр дахь зам маань улс орны хөгжлийн бодлого тодорхойлоход шууд оролцох явдал. Ялангуяа үндэсний хөгжлийн болон боловсрол соёлын бодлогын талаар хийж хэрэгжүүлмээр зүйлс нэлээдгүй байдаг. Тэр үүднээс л би өнгөрсөн сонгуульд оролцсон хэрэг. Түүнээс биш эрхэм гишүүн гэдэг алдар нэр, эрх ямбын төлөө явсангүй. Тийм байдлаар тэнд очиж илжирснээс жалганд очоод илжирсэн нь дээр.

- Ерөнхийлөгчийн сонгуульд нэр дэвшигч нь энэ намуудын үнэн нүүр царайг үзүүлж байна. Хэдэн зуун мянган гишүүнтэй АН, МАН-ын нэр дэвшигчийн царайг хар, МАХН-ын нэр дэвшигчийг хар л даа гэж иргэд шүүмжилж байна.

- Манай улс төрийн тогтолцоо дампуурчихсан. Улс төрийн нам жинхэнэ утгаараа байхгүй. Нам гэдэг үзэл санаа, итгэл үнэмшлийн нэгдэл байдаг бол өнөөдөр манайд дунд доод түвшиндээ ажил, албан тушаал, амьжиргааны явцуу эрх ашиг, харанхуй фанатуудын, дээд түвшиндээ нам дамжсан мафийн шинжтэй санхүүгийн бүлэглэлүүдийн тун хачин бүрдэл бүхий нэгдлийг НАМ гэж хэлдэг болсон.

Улс орны хөгжлийн болон хуулийн бодлогыг гаргаж, түүнийг хэрэгжүүлэхэд хяналт тавих учиртай УИХ-ын гишүүнийг сонгохдоо сонгогчдийн маань олонх хэнийг сонговол улс оронд, бидний ирээдүйд хэрэгтэй вэ гэдэг өнцгөөс биш, харин надад ямар ашигтай вэ гэдгээс нь харж сонголтоо хийж байна. Өөрт нь мөнгө өгвөл, өөрт нь болон садан төрөл, найз нөхдөд нь ажил төрөл олдох, эсвэл бизнестээ ямар нэгэн байдлаар дэмжлэг авах, их сайндаа аймаг, сум нь хурдан морьтой болох, ямар нэгэн бүтээн байгуулалт хийх гэх мэт их хачин шалгууртай. Улс төр, сонгуулийн тогтолцоо нь ч хүмүүсийг ийм сонголт хийхээс аргагүй байдалд шахаж, тулгаж, бас тархийг нь угааж, талцуулж байна. Энд ямар нэгэн үзэл санаа, итгэл үнэмшил, бодлогын тухай ярих боломж тун ховор.

Өнөөдөр Ерөнхийлөгчид нэр дэвшигчдийн аль нь сэтгэлд хүрэхгүй байгаа нь тэрхүү манай улс төрийн тогтолцоо хэр зэрэг эвдэрсний, толгой нь уруугаа харчихсаны л илрэл юм.

- Сонгуулиас сонгуулийн хооронд энэ байдал улам даамжирч байгаа. Тэгэхээр яах вэ?

- Тийм, энэ муу явдал улам даамжирч байгаа. Саяхан би Ло.Нямаа багштай ярилцаж суухад багштан тийн хэлж байна билээ. “Их үндэстэнд их сорилт тулгардаг гэдэг. Өнөөдөр бидэнд аргагүй их том сорилт тулгараад байна. Сэхэх үү, мөхөх үү? гэсэн сорилт шүү. Гэхдээ асуудал муу болох хэрээр ард түмэн ухааран сэхээрч, босож ирнэ гэсэн нэг мухар итгэл төрж байгаа” гэсэн. Тэр үнэн. Ягтаа тулж байж л ийм дампуу явж болохгүй юм байна, зарчим, үнэт зүйл, эрхэмлэл гэдэг зүйлээ гаргаж ирэхгүй бол болдоггүй юм байна. Хууль ёсоо дээдэлдэг, ёс журмыг эрхэмлэдэг байхгүй бол болохгүй юм байна гэж нэг голдоо ортлоо ойлгох байх. Нийгмийн тодорхой хэсэг нь тийн ойлгож сэрж чадвал нийгмийн хөгжил зөв тийшээ эргэнэ. Түүнээс биш энэ янзаар дампуу, будлиантай хэвээр явбаас хэрхэх нь нэн тодорхой. Биднийг уруудан доройтсоор сөхрөөд унахыг харж, шүлсээ залгиж суугаа хүчин бэлээхэн бий шүү дээ.

.

БИД ТҮҮХИЙН ИХ ТОХУУРХАЛ ДУНД ХӨВЖ ЯВАА

.

- 1990 оны Ардчилсан хувьсгал үр дүнгээ өгсөнгүй гэж та хэлэх гээд байна аа даа?

- 1990 оны үйл явдлаас улс оронд эерэг өөрчлөлт ирсэн зүйл бишгүй. Гэвч ерөнхий агуулгаараа бол бид их ч алдлаа. Би тэр үед идэр залуу байлаа. Ардчиллыг дэмжиж, талархан хүлээн авч байсан. Олон зүйлийн өөрчлөлтийг хүсэн хүлээж байв. Гэтэл байдал шал эсрэгээрээ эргэсэн.

- Чухам юу эсрэгээрээ эргэсэн бэ?

- 90 онд бид нэг намын дарангуйллаас, намжсан төрөөс салая гэсэн. Үзэл сурталжсан намаас хамаарсан төрийг холбилж чадсан ч түүнээс долоон дор олигархжсан намаас шууд хамааралтай төрийг нэг мэдэхэд бий болгочихсон, түүнийхээ дарангуйлал дор сууж байх нь тэр. Чонын амнаас гараад барын аманд гарсантай адил.

90 онд бид олон ургалч үзлийг эрүүл саруул уралдуульяа гэсэн. Гэтэл өнөөдөр юун олон ургалч үзлийг уралдуулах вэ, санаа бодол нийлээгүйгээ зүгээр л үгийг муугаар харааж зүхэх, өширхөн занах нь их талдаа.

90 онд бид тусгай хангамжийг устгая гэсэн. Гэтэл өнөөдөр манай дээдсийн тусгай хангамжийн дэргэд 90 оны үеийн тусгай хангамж ёстой хүүхэд нохойн тоглоом гэмээр байдалтай.

90 онд бид хэвлэлийн эрх чөлөөтэй болоё гэсэн. Өнөөдөр эрх чөлөөтэй мэт боловч яг үнэндээ тэр эрх чөлөө нь хяналт замбараагүй мэдээллийн бөмбөгдөлт, тархи угаалтаар дүүрээд утга учираа алдсан. Манай ихэнх хэвлэл мэдээллүүд улс төр, санхүүгийн бүлэглэлүүдийн мэдэлд орчихсон. Ямар нэгэн хэвлэлийн эрх, эрх чөлөөний тухай ярих боломжгүй.

90 онд бид хууль, шударга ёсыг бэхжүүлье гэсэн. Өнөөдөр харин ч бүр эсрэгээрээ хуулийг уллан дэвсэлж, шударга ёсыг элэглэн дооглох хэмжээнд хүртлээ уруудлаа.

90 онд бид авилгалыг эцэс болгоё гэсэн. Гэтэл өнөөдөр бүр гааруулж орхисон. Тэр үеийн авилгал шил архи, 45 төгрөгний гутал, халуун сав байсан бол өнөөдөр бүхэл бүтэн уурхайнууд, төрийн яам болж хувирсан.

90 онд бид тусгаар тогтнолоо улам баталгаажуульяа гэсэн. Өнөөдөр харин ч бүр эмзэг хэврэг болж хувирав.

90 онд бид Оросын эдийн засгийн хараат байдлаас гарьяа гэсэн. Гэтэл өнөөдөр бид хятадын эдийн засгийн төдийгүй далд бодлогын бүрэн хараат болов.

Гэх мэт тэр цагт тавьж байсан бараг бүх зорилго эсрэгээрээ эргэсэн шүү дээ. Өөр олныг өгүүлж болно.

Түүхэн аливаа томоохон өөрчлөлт нь анхлан хүсэж байсныхаа таг эсрэг эргэх явдал түүхэнд цөөнгүй давтагддаг. Тийм үзэгдлийг “Түүхэн тохуурхал” хэмээн гүн ухаантан их Хегел тодорхойлсон. Бид тийм л түүхэн тохуурхал дунд хөвж яваа.

- Яагаад ийм юм болчихов оо?

- Дотоод болон гадаадын олон учир шалтгаан бий. Тэр бүгдийг дурдвал амжихгүй биз ээ. Өөрсдөөс маань шалтгаалсан гол зүйл бол бид Үндэсний хөгжлийн тогтвортой бодлого байхгүй, үзэл баримтлал, үнэт зүйлсээ санаатай болон санамсаргүйгээр гээж, бусдын тоглоомонд дүрмийг нь огт мэдэхгүйгээр татагдаж орсон явдал юм. Ингэснээрээ бид сүүлийн 27 жил зөвхөн эдийн засаг л ярьж явсан. Эдийн засгаас гадна нийгмийн харилцааны олон суурь асуудлуудаа давхар авч явах учиртай байсан. Ялангуяа үзэл санаа, итгэл үнэмшил, үнэт зүйл, өв соёл, ёс зүй гэх мэт нийгмийн суурь асуудлуудаа зөнд нь хаячихсан. Эдийн засгийн дэд бүтцээс илүү оюун санааны дэд бүтэц гэж нэн чухал зүйл байдгийг бид мартсан. Түүнгүйгээр нийгмийн хөгжлийн хүчин зүйлс бүрэн төгс хангагддаггүй. Өрөөсгөл, магадгүй өөрийгөө мөхөөж ч мэдэх гаж хөгжил л бий болдог байна. Зөнд нь орхиод зогсохгүй манай люмпин элитүүд оюун санааны хүрээг хамгийн хүчтэй, хамгийн бүдүүлгээр дарангуйлж, уллан гишгэлж, буртаглаж байдаг. Үр дүн нь өнөөдрийн мухардал.

.

ЗУЗААН ТҮРИЙВЧТЭЙ Ч ОЮУН САНААНЫ ХУВЬД ГУЙЛГАЧИН, ЛЮМПИН ХЭСГЭЭ БИД ЭЛИТ ГЭЖ ҮЗДЭГ …

.

- Люмпин элит гэж та хөрөнгөлөг хэсгээ хэлээд байна уу?

- Тийм.

- Яагаад тэр вэ? Билл Гейтс “Чамайг баялагтай болгосон нийгэмд чи буцаагаад өгөх ёстой” гэсэн зарчим барьдаг гэдэг. Тэднийг люмпин гэх нь хэр зохимжтой вэ?

- Билл Гейтсийн хувьд аргагүй үнэн үг шүү. Тэр хүний баримталж байсан зарчим, үйл ажиллагаа чинь огт өөр. Нийгмээ мөлжих биш, улам баяжуулж, хөгжүүлж байна. Харин манай баячууд эсрэгээрээ, “Чамайг баялагтай болгосон нийгмийг дахиад мөлж” гэдэг. Тийм болохоор л тэднийг люмпин элит гээд байгаа хэрэг шүү дээ. Өөрөөр хэлбэл зузаан түрийвчтэй ч оюун санааны хувьд гуйлгачин хэсгийг л люмпин элит гэж нэрлээд буй. Харин харамсалтай нь нийгэм тэднийг үнэхээрийн элит гэж үздэг, даган дуурайдаг. Гашуун эмгэнэл, даажигнал юм даа.

.

ЦАГААЧ ИРГЭДЭЭ МОНГОЛЫН ТӨР СОНГУУЛИЙН ҮЕЭР Л НЭГ САНАХ ЮМ

.

- Цагаачдын тухай таныг хамгийн сайн мэдэх хүний нэг гэлцдэг. Энэ талаар нэг бус нийтлэл бичсэнийг тань уншиж байсан?

- Сайн мэдэх нь ч юу байх вэ, Америкт цагаачлан амьдарч буй монголчуудынхаа дунд хутгалдаж хэдэн жил болсны хувьд цагаачдын зовлон жаргалыг биеэрээ мэдрэх болсон юм. Цагаачлал гэдэг Монголын нийгэмд цоо шинэ үзэгдэл. Түүнийг тойрсон маш олон асуудал байдаг юм билээ. Би тэдгээр иргэддээ зориулж мэдээллийн сонин хэвлэл гаргаж байсны хувьд бусдаас арай түлхүү мэдээлэлтэй болсон байж магадгүй.

- Та Цагаачдын тухай зохиол бичих үү?

- Нэг роман эхлээд дутуу хаясан. Тэрийгээ нэг дуусгадаг л байх даа. Америкт ажиллаж амьдарсан маань надад бас том их сургууль болсон. Тэнд очоод шал угаалаа, пицца зөөлөө, тогооч хийлээ, том машины жолооч, ачигч хүртэл хийлээ. Сонин хэвлэл эрхэлж ч үзэв. Олон ажил хийж, олон хүнтэй уулзаж танилцаад, сайдаж муудаад явах хэрээр зүрх сэтгэлийн туршлага арвиждаг. Тэр бүхэн бэлээхэн түүхий эд, хэрвээ юм болгож чадвал баялаг сайхан баримт материал байна.

-Америкт очсон монголчууд тэнд үлддэг, ирэх дургүй байх шиг санагддаг?

- Манай төрийн томоохон албан тушаалтан гадаадад гарсан хүмүүс эх орноосоо урвасан, тэднийг эргэж ирэхэд хил гааль дээр хатуу чанга шалгаж байх хэрэгтэй гэсэн утгатай үг хэлж байсан. Энэ бол бодит байдлыг огт мэдэхгүй хүний үг юм. Гадаадад буй Монголчуудынхаа дотор нь ороод үзэхэд эх нутгаасаа харьжсан байдал огт үгүй байдаг. Миний мэдэхээр 80 гаруй оронд 100 шахам мянган монголчууд амьдарч байгаа. Хэнд нь ч тэр ялгалгүй Монголоо гэсэн гал халуун зүрх сэтгэл бий. Баяр ёслолын үед “Халуун элгэн нутаг”-аа дуулаад сууж байхдаа нулимс цийлэгнүүлдэггүй монгол хүн ховор. Харьд ажиллаж амьдарч буй монгол иргэдийн тус нэмэр Монгол Улсад үнэлж баршгүй их юм гэдгийг зориуд онцолж хэлмээр байдаг.

- Чухам цагаач монголчуудын ямар ямар тус нэмэр байна вэ?

Гадны ямар ч том хөрөнгө оруулагчаас дутахааргүй хөрөнгө гадаадад байгаа монголчуудаас орж ирдэг. Миний мэдэхээр 2004, 2005 оны үед зөвхөн ганцхан сард л дунджаар 200 мянга орчим доллар Америкаас гуйвуулгаар ирж байсан. Мөн хүнээр дамжуулж, биеэр явуулж байгаа, контейнерт эд бараа болгоод явуулж байгаа эд барааг тооцвол илүү их дүн гарна. Гэтэл ганц Америкаас биш шүү дээ, Солонгос, Европ, Турк, Японоос хэдий хэрийн хөрөнгө мөнгө орж ирж буйг бид тооцоолох аргагүй. Харь оронд хөлсөө дуслуулан олсон монгол залуусын аав ээж, ах дүү, үр хүүхдүүддээ шилжүүлдэг эдгээр хөрөнгө мөнгө нь өдий хүртэл Монголын эдийн засагт маш том тулгуур болж ирсэн.

Түүнээс гадна шинэ технологи, соёл сурч тэр мэдсэн сурсанаа эх орондоо экспортолж байна. Улсаас ямар ч татаас дарамтгүйгээр янз бүрийн ажил мэргэжил эзэмшиж байна. Дээр нь Монголоо сурталчилж байна. Төсвийн мөнгө хулгайлаад байгаа нөхөдтэй харьцуулах аргагүй эх оронч хүмүүс гадаадад байгаа гэж болно. Гэхдээ бас харь оронд оччихоод “Төөрч төрсөн эх орондоо ирлээ” гэж ярьдаг хүн ч мэр сэр байдаг л юм. Гэвч тэд маш цөөхөн.

- Цагаач иргэдээ дэмжих талаар өмнөх хөрш их сайн байдаг гэж сонссон..?

- Хятадууд айхтар бодлоготой. Цагаач хятадынхаа хүчийг бүрэн дүүрэн ашигладаг. Манайх шиг хэдэн арван мянгаар ярихгүй, хэдэн арван саяар тоологдоно шүү дээ, тэд чинь. Би Америкийн 10 гаруй мужийн 140 орчим жижиг хот тосгоноор явж үзсэн. Захын бөглүү тосгонд буй ганц хоолны газар нь China buffet л байдаг. China buffet-гүй тосгон надтай лав таараагүй. Америкчууд хооолонцор улс. Хятадууд тэрийг нь ашиглаад Америкийн тэр их том зах зээлээс асар их хөрөнгө босгож байна. Цагаачид иргэддээ зориулсан банк, их дээд сургууль хүртэл байгуулсан. Цагаачид нь зээл аваад хоолны газар ч болов нээж, богино хугацаанд хөл дээрээ босдог. Их дээд сургуульд сурвал дэмждэг, янз бүрийн нийгэмлэгүүд их байдаг. Манайх бол цагаач иргэдээ бараг л зөнд нь хаячихдаг. Төрийн бодлого илэрхий дутагддаг. Сонгуулийн санал хэрэгтэй болохоор нэг санаж байх шиг байна.

.

Монголчуудын эрхшээж асан XIII зуун бол яах аргагүй Аугаа эрин юм.

.

- Яриагаа бид таны “Аугаа эрин” номын тухай эхлүүлсэн. Төгсөхдөө ч мөн адил төгсгөе гэж бодож байна. Та романыхаа нэрийн талаар манай уншигчдад тайлбарлаж өгөөч.

- Нэрийн бичлэгээс нь эхлэе. Орчин цагийн Монгол хэлний дүрэмд “Аугаа” гэдэг үг байхгүй, харин “агуу” гэж бичих хэрэгтэй гэж зарим нэг хүн шүүмжилж байна. Уг нь монголчууд бид тэнгэрийн явдлыг “Аугаа” гэдэг байжээ. Харин газрын их үйл хэрэг, их хүмүүсийг бол “Агуу” гэдэг байжээ. Бид өнөөдөр тэнгэр, дээд их хүч хийгээд оюун санаа, дотоод ертөнцийн гүн шүтэлцээ хамаарлаа мэдрэх, мэдэхээ байгаад “Аугаа” гэдэг сайхан үгээ мартчихаа юу даа.

Тэгээд тэнгэрийн явдлыг л “Аугаа” гэдэг юм бол бидний өвөг дээдсийн эрхшээж асан тэр XIII зууны үйл явдал бол яах аргагүй Тэнгэрийн явдал, Тэнгэрийн санаа юм. Монголчуудаар дамжуулан Мөнх тэнгэр өөрийн засаглалаа хүн төрөлхтөнд тогтоосон үе. Тиймээс л тэр эрин үеийг “Аугаа эрин” гэж нэрлэхээс аргагүй. Үүнийг маш олон шинжээр өгүүлж болно. Их хаад маань зүгээр л нэг хөөргөн сэтгэлгээнд хөтлөгдөөд “Мөнх Тэнгэрийн хүчин дор” гэж зарлиг тамгаа эхлүүлж байсангүй. Үүний цаана том танин мэдэхүй, аугаа их сүр хүчний эрхшээлд буйгаа мэдэрсэн мэдрэмж, түүнийг төлөөлж буйдаа итгэсэн итгэл найдвар байдаг.

- Чухам ямар ямар тодорхой шинжүүд байна вэ?

- Мань мэтийг хэлбэл “Чи битгий худлаа яриад бай” гэж дайрах нь их юм. Харин гаднын хүн хэлбэл дуугүй байх. Ийм л боолын мэт дорд сэтгэлгээ биднийг нэлээд хэмжээгээр эзэмдэж дээ. Бас ч дундуур нь бөө, зайран, тэнгэр тайлагч нэртэй янз бүрийн болсон болоогүй хүмүүс орж ирж Монголчуудын уламжлалт тэнгэр шүтлэгийг ов заль, мэдлэггүй болхи байдал, хадуурсэн хийрхэлтэйгээ хольж хутгаад буртагласан нь их болсон учир өөрсдийнхөндөө итгэхэд нэн бэрх болсон тал ч бий.

Өнөөх их гүн ухаантан Хегел ”Хүн төрөлхтөний түүх Дорноос, тэр дундаа Монголоос эхэлдэг. Нүүдэлчин Монголчууд хүн төрөлхтөнд оюун санааг бэлэглэсэн” гэсэн утгатай үг хэлсэн нь бий. Ингэхэд түүхийн эхлэл ярих аваас Эртний Мисир болоод Хоёр мөрний түүхрүү харах болно. Бас Грек, Ромын түүх гэх мэтээр. Гэтэл яагаад Монголоос түүх эхэлдэг гэж…?

Мөн Юлуй Чуцайн хөшөөнд “Умард зүгт Чингис хаан төрийг жинхэнэ утгаар нь цогцлоов” гэсэн утгатай үг бий гэдэг. Төрийн үүсэл ярих юм бол дахиад л эртний Мисир, Месопатамийн хөндий, Махонжодерогийн соёл иргэншлийн үе буюу бараг хэдэн мянганы өмнөх үе рүү очих болно. Тэгвэл яагаад Монголчууд Төрийг жинхэнэ утгаар нь цогцлоов гэж хэлж байна вэ?

Энд оюун санааны болон төрийн анхдагч эхлэлийн тухай биш, харин төр ямар байх ёстойг, оюун санааны мөн чанар гэж юу болох тухай ярьж буй хэрэг юм. Чухам жинхэнэ утгаар нь цогцлооно гэдэгт л тэр Тэнгэрийн төрийн мөн чанар нь байгаа. Энд олон шинжийг хэлж болох ч хаана ч, хэзээ ч алагчилалгүй үйлчилдэг шударга ёсонд суурилсан суурь мөн чанар бий. Гол шинж нь энэ. Романдаа энэ л шинжийг ямар нэгэн хэмжээгээр илэрхийлж, мэдрүүлж, шингээхийг эрмэлзсэн. Гэхдээ одоо зөвхөн эхний боть л явж байгааг анхаарна биз ээ.

- Танд их баярлалаа. Уран бүтээлийн амжилт хүсье.

Ярилцсан Өлзийдэлгэр

Эх сурвалж: “Сэрүүлэг” сонин