Б.НАРАНБААТАР БУНДЕСЛИГТ ЗОДОГЛОЖ БАЙНА

ДАШТ-ий мөнгө, хүрэл медальт, Монгол Улсын гавьяат тамирчин Б.Наранбаатар Германы чөлөөт бөхийн лигийн тэмцээнд Зарбрукен хотын “KSV Kollerbach” багийн нэрийн өмнөөс барилдаж байна. Бундеслиг нь Германы гэх тодотголтой боловч тив, дэлхийн шилдгүүд хүч сорьдог, албан бусаар Европын лиг гэгддэг тэмцээн юм. Намбаагийн хувьд ноднин тус багт хүчин зүтгэхдээ нийт есөн барилдаан хийснээс наймд нь ялж, багаа плей-офф шалгарахад голлох үүргийг гүйцэтгэсэн юм.

Тэрбээр энэ жил дахин “KSV Kollerbach”-ийн нэрийн өмнөөс барилдаж байгаа бөгөөд аравдугаар сарын 22-нд клуб нь “ASV Mainz 88”-ыг 19:16-гаар хожиход эсрэг багийн Атмир Хромовыг 0:2, 0:2, 5:2, 7:0, 1:0- ээр ялжээ. Дараа нь 29-нд “RWG Mombris-Konigshofen” багт 15:25-аар ялагдахад манай тамирчин Владимир Дубовтой таван үе барилдаж, 0:1, 0:1, 1:0, 1:0, 0:3-аар дийлдэн, 30-нд “TSV Musberg” багийг 29:9-өөр буулган авахад жингийн өрсөлдөгчөө гурван үед 1:0, 3:0, 2:0- ээр хожжээ.

Харин өнгөрсөн бямба гаригт дөрөвдүгээр тойргийн барилдаанаа хийж, өрсөлдөгч багийн Робин Пельцерийг 4:0, 6:0, 5:0-ээр илт давуу буулган авав. Баг нь энэ тойрогт 23:13-аар давамгайлсан байна. Гавьяат маань тавдугаар тойргийн барилдаанаа энэ сарын 12-нд “KSK Konkordia Neuss” багийн эсрэг хийх ажээ. Сонирхуулахад, Бундеслиг нь тамирчид жингээ үзүүлээд шууд дэвжээнд гарч барилддаг, нийт таван үе барилддагаараа онцлогтой юм.