Сэтгүүлчдийн саналыг тусгасан хуулийн төсөл өргөн барина

Ерөнхийлөгчийн санаачлан, боловсруулсан “Хэвлэл мэдээллийн эрх чөлөөний тухай” хуулийн төслийг тун удахгүй УИХ-д өргөн барихаар болжээ. Энэ талаар Ерөнхийлөгчийн хэвлэлийн төлөөлөгч С.Батзаяагаас тодрууллаа.

-Саяхан Засгийн газраас Хэвлэл мэдээллийн эрх чөлөөний тухай хуулийн төслийг УИХ-д өргөн барьсан. Гэтэл Ерөнхийлөгчийн санаа­чил­­сан энэ хуулийн төсөл­тэй ан­дуурагдаад байгаа болол­той?
-Ерөнхийлөгчийн санаа­чил­сан Хэвлэл мэдээллийн эрх чөлөөний тухай хуулийн төсөл бэлэн болсон. Ойрын үед УИХ-д өр­гөн барина. Харамсалтай нь зарим  хүн Засгийн газрын өргөн барьсан хуулийн төсөл­тэй андуураад байгаа юм. Уг нь  зүйл заалтаасаа эхлээд ялгаатай шүү дээ. Засгийн газар төслөө өргөн барьсны дараа бид харж, танилцсан.
-Тухайлбал юугаараа ялгаатай гэж?
-Зөвхөн хуулин дээрээ төв­лөрөөд сэтгүүлчдээр “Ир­гэний танхим”-д гурван ч удаа нээлттэй хэлэлцүүлсэн. Энэ хуультай холбоотойгоор ту­хайл­бал “…хүний нэр төр гүтгэх…” гэдэг нь аль хуулинд байх вэ. Эрүүгийн гэмт хэрэг мөн үү, биш үү. Бүр хасах ёстой юу гэх зэргээр хэлэлцсэний эцэст боловсруулсан. Ингээд харьцуулаад харвал олон ялгаа бий. Өөрөөр хэлбэл Ерөн­хийлөгчийн санаачилсан Хэвлэл мэдээллийн эрх чөлөөний тухай хуулийн төсөлд сэтгүүлч, хэвлэл мэдээллийн бай­гуул­лагынхны саналыг илүү­тэйгээр тусгасан.
-Тэгвэл яагаад хүмүүс Засгийн газрынхтай андуурлаа гээд байгаа юм бэ?
-Харьцуулж хараагүй болохоор андуураад байгаа юм болов уу. Ерөнхийлөгч санаа­чилж байсан хуулийн тө­сөлдөө сэтгүүлчдийн саналыг авсан. Тэгснээ түүнийгээ хасаад, Засгийн газартай нийлүүлээд УИХ-д өргөн барьчихлаа гэж ойлгоод байх шиг байна.
-Хоёр төслийг харьцуулж харах нь чухал гэж хэлэх гээд байна уу?
-Тийм ээ. Засгийн газрын өргөн барьсан болон манай хуулийн төсөлтэй чөлөөтэй танил­цаж болно шүү дээ.
-Ерөнхийлөгч санаачилсан хуулиндаа эрх мэдэл авч үл­дэх нь гээд байгаа?
-Нөгөө л андуурч ойлгосноос үүдсэн хэрэг. Засгийн газрын өргөн барьсан төслийн дөрөв­дүгээр бүлэг, хэвлэл мэ­дээл­лийн зөвлөл гэсэн хэсэг бий. Энэ бүлгийн 12.8-д “Зөв­лөлийн бүрэлдэхүүнд орох хэв­лэл мэдээллийн бай­гуул­лагын удирдлага, үүсгэн бай­­гуу­лагчдыг төлөөлсөн гурав, сэтгүүлч нарыг төлөөлсөн таван гишүүнд сэтгүүлчийн эрх ашиг, хэвлэл мэдээллийн чиглэлээр үйл ажиллагаа явуулдаг төрийн бус байгууллагууд, иргэдийг төлөөлсөн гурван гишүүнд хүний эрхийг хангах чиглэлээр үйл ажиллагаа явуулдаг төрийн бус бай­гууллагууд тус тус нэр дэвшүүлж, Монгол Улсын Ерөнхийлөгчид санал болгоно” гэж бий. Үүнээс үзэхэд тухайн санал болгосон хүнийг нь Ерөнхийлөгч томилохоор байгаа юм. Тиймээс өөрөө хууль санаачилчихаад өөртөө эрх мэдэлтэй байхаар тусгалаа гээд байгаа болов уу. Харин Ерөн­хийлөгчийн санаачилсан хуулийн төслийн “Дөрөвдүгээр бүлгийн 15.1-т Хэвлэл мэдээл­лийн байгууллагын хараат бус байдлыг хангах, түүний үйл ажиллагаатай холбогд­сон өргөдөл, гомдлыг хянан шийдвэрлэх, зохицуулах чиг үүрэг бүхий Хэвлэл мэдээллийн зохицуулах зөвлөл байна. 15.2-т Зөвлөл нь хэвлэл мэдээл­лийн байгууллагын үүсгэн байгуулагч, хувь ний­лүүлэгч, сэтгүүлч, хэвлэн ний­т­лэх үйл ажиллагаанд орол­цогч бусад этгээд, олон ний­тийн төлөөллөөс бүрдэнэ” гэж тус­гасан.