Дараагийн урвагчид МАН-ын залуучууд уу?

УИХ-ын гишүүн МАХН-ын ганц ганцаарддаггүй дайчин О.Баасанхүү өөртөө хань олсон бололтой. Түүний үгний жинг зузаалж намынхаа хүчийг нэмэхээр Н.Энхбаяр хөдөлсөн гэнэ. Энэ тухай О.Баасанхүү ”МАН-ын зургаан гишүүн манай намд орохоор ярьсан гэж хэлсэн шүү. Манайд ирэх зам нь улам засагдаж байгаа. Би хэзээ ч худлаа ярьдаггүй. Та нар харин цагаас нь өмнө юм мэдэх гээд зарим зүйлийг хурданд нь оруулах гээд байх юм. Ямар ч байсан зургаан гишүүн МАХН-д орно гэдэг тодорхой. Ерөнхийлөгчийн сонгуулиас өмнө бол орж ирэхгүй байх. Ерөнхийлөгчийн сонгуулийн дараа хөдөлгөөнд орно. Шударга бусын хонгилоор хэн ч явахыг хүсэхгүй. Гэхдээ УИХ-ын гишүүн Ц.Даваасүрэн, Д.Тэрбишдагва, Ч.Улаан нар биш шүү. Ц.Даваасүрэн гишүүн дээр очоод “Та МАХН-д орохоор ярьсан юм уу” гэж асуугаад бүр уурлуулчихсан байна лээ. Хөөрхий тэр хүний орж, гардаг хугацаа болсон. Нэг намаасаа гараад, нэг бие дааж үзээд, зөндөө л юм боллоо шүү дээ. Бид ч гэсэн тэр хүмүүсийг тайван байлгамаар байна. Тийм хүмүүстэй бид ярихгүй. Оръё ч гэсэн манай намын хаалга хаалттай” хэмээн мэдэгдсэн. Түүний энэ мэдэгдэлтэй холбоотойгоор МАН-аас МАХН-д урвах зургаан хүнийг хэвлэл мэдээллийн хэрэгсэлүүд хайж эхэлжээ. УИХ-ын их хурлын гишүүнд МАН-аас олон нийтийн итгэл хүлээж сонгогдсон бүхэл бүтэн зургаан хүн мулт үсэрч МАХН-ыг бас ч гэж давгүй суудалтай сөрөг хүчин болгох гэж байгаа нь үнэн бөгөөд МАН-ын удирдлагууд ч энэ тухай сөрөг арга хэмжээ авч урваж шарваж болох хүмүүстэйгээ уулзаж ярилцаад эхэлсэн гэнэ. Улс төрийн хашир туршлагатай энэ намаас урваж шарваж, эргэж буцаж үзсэн Д.Тэрбишдагва, Ч.Улаан нарын араас орох ахмадууд бараг байхгүй. Тэгэхээр шинээр сонгогдсон памперстэй гишүүд урвагч болох өндөр магадлалтай гэсэн үг. Залуучууд дундаа сайдын суудалд заларсан Н.Номтойбаяр бол яасан ч МАН-аас гарахгүй нь тодорхой. Өөрийн карьерийн хамгийн өндөр цэгээс огцом доошоо унах шийдэл Номт хүүгээс гарах учиргүй. Тэгвэл эдгээр зургаан хүний тоонд УИХ-ын гишүүн Т.Аюурсайхан, Д.Гантулга, Х.Болорчулуун, О.Содбилэг, А.Сүхбат, Г.Мөнхцэцэг гэх зургаан хүний нэрс хамгийн өндөр магадлалтай хэмээн яригдаж байгаа гэнэ. Албан тушаалын наймаагаар гаршсан Н.Энхбаяр мэдээж хоосонгүй сандал ширээ амлан байж МАН-аас хүн урвуулж чадна. Хаана эрх ашгийн цоорхой байна тэр сиймхийг алдалгүй олж харж чаддаг Намбарвантанд энэ ажил шинэ зүйл ерөөсөө ч биш.

С.Амаржаргал

Үндэстэн агентлаг