29 дүгээр сургуулийн багш нар дохионы хэлний мэдлэг муу гэдгээ хүлээн зөвшөөрчээ
БСШУСЯ-ны Төрийн нарийн бичгийн дарга Б.Баярсайхан, НИТХ дахь МАН-ын бүлгийн дэд дарга Ц.Байгалмаа болон холбогдох албаны хүмүүс өнөөдөр Нийслэлийн Сүхбаатар дүүргийн 29 дүгээр сургуулийн багш ажилчид, сурагчидтай уулзлаа.
Тус сургуулийн сурах орчин болон хүүхдүүдийн зөрчигдөж буй эрхийн талаар сүүлийн өдрүүдэд хэвлэл мэдээллийн хэрэгслээр гарах болсон. Сурагчдын зүгээс багш нарын дохионы хэлний мэдлэгийг сайжруулах, сурагчидтай зүй бусаар харьцаж, тэдэнд гар хүрч, хэл амаар доромжилдог, ажлын байран дээр архидан согтуурдаг гэх мэт асуудлыг хөндөж тавьсан юм. Уг асуудлаар БСШУСЯ, НИТХ дахь МАН-ын бүлгээс анхаарал хандуулан, яаралтай арга хэмжээ авч, ажлын хэсэг байгуулан ажиллаж байгаа юм. БСШУСЯ-ны Төрийн нарийн бичгийн дарга Б.Баярсайхан өнөөдөр ажлын хэсгийн дүгнэлтийг тус сургуулийн багш, сурагчдад уншиж танилцуулав. Ажлын хэсгийн гаргасан дүгнэлтийг маргааш хэвлэлийн хурлаар дамжуулан олон нийтэд ил болгох аж.
НИТХ дахь МАН-ын бүлгийн дэд дарга хэлэхдээ, “НИТХ дахь МАН-ын бүлгээс энэ асуудалд онцгой анхаарч ажлын хэсэг байгуулан хяналт шалгалтын ажлыг хийж байна. Миний бие ажлын хэсгийг ахлан ажиллаж байгаагийн хувьд сургуулийн нөхцөл байдалтай газар дээр нь ирж танилцаж, багш, сурагчдын санал бодол болон БСШУСЯ-наас гаргасан ажлын хэсгийн дүгнэлтийг сонслоо. Нийслэлийн хүүхэд гэр бүлийн хөгжлийн газраас судалгаа явуулсан. Гаргасан дүгнэлтүүдийг үзэхэд багш ажилчдын мэдлэг боловсролыг дээшлүүлж, ажлыг сайжруулах зайлшгүй шаардлага байгаа нь харагдаж байна. Түүнчлэн 29 дүгээр сургуулийн хашаанд 2015 онд Газрын тухай хууль зөрчиж, газар олгосон байсан. Үүнийг Нийслэлийн Засаг дарга С.Батболд өчигдөр цуцлах шийдвэр гаргалаа. Энэ газрыг сургуулийн хүүхдүүдэд зориулж тохижуулах ажлыг шат дараатай хийх болно” хэмээн ярив.
БСШУСЯ-ны Төрийн нарийн бичгийн дарга Б.Баярсайхан, “БСШУСЯ-наас гаргасан ажлын хэсэг дүгнэлтээ гаргаад өнөөдөр тус сургуулийн багш сурагчдад танилцууллаа. Хүүхдүүдийн хөндөж тавьсан асуудлууд бүгд ямар нэгэн үндэслэлтэй, бодитой гэдэг нь батлагдсан. Багш нарын хувьд дохионы хэлний мэдлэг, чадвар муу гэдгээ хүлээн зөвшөөрсөн. Манай яамны зүгээс дахин “Ажил сайжруулах” ажлын хэсэг байгуулаад богино хугацаанд багш нарын мэдлэг боловсролыг дээшлүүлэх, ажил сайжруулах төлөвлөгөө гаргаад ажиллаж байна” хэмээв.
Мөн багш нарын ёсзүйн тал дээр яамнаас онцгой анхаарч ажиллана. Ирэх найдугаар сар гэхэд зөвхөн 29 дүгээр сургууль гэлтгүй бүх цэцэрлэг, сургуулийн багш нарт ёсзүйн сургалт явуулах зорилго тавиад, төлөвлөгөө боловсруулан ажиллаж байгаа гэдгийг БСШУСЯ-ны Төрийн нарийн бичгийн дарга Б.Баярсайхан тодотгож байв хэмээн Нийслэлийн ЗДТГ-ын Хэвлэл мэдээлэл, олон нийттэй харилцах хэлтсээс мэдээллээ.
URL:
