Нүүрснээс спирт гаргаж авах технологийг Хятадад амжилттай туршжээ

Хятадын эрдэмтэд нүүрснээс этанол гарган авах анхны үйлдвэрийн шугамыг зохион бүтээжээ. Энэ тухай БНХАУ-ын ШУА-ийн мэдээлэлд дурдсан байна.

Уг технологийг Ляонин мужийн Далянь хотын химийн физикийн хүрээлэнгийн эрдэмтэд Shaanxi Yanchang Petroleum компанитай хамтран гарган авчээ. Тус үйлдвэрийг энэ оны 1 дүгээр сард ашиглалтанд оруулсан бөгөөд хоёр сарын турш тогтвортой ажиллаж, найдвартай технологи болохыг батлан харуулсан байна. Тус үйлдвэр жилд 100 мянган тонн спирт гарган авах хүчин чадалтай ба эцсийн бүтээгдэхүүнд эзлэх этилийн спиртийн хэмжээ 99,71 хувь ажээ.

“Энэхүү шинэ технологи нь үр ашигтай бөгөөд ирээдүйд тулгарах газрын тосны нөөцийн хомсдолыг нөхөж чадна. Мөн энэ технологи нь манай орны спиртийн үйлдвэрүүдийн түүхий эдээс хамаарах хамаарлыг багасгаж, эрчим хүч, хүнсний аюулгүй байдлын баталгааг хангах юм” гэж БНХАУ-ын ШУА-ийн ерөнхийлөгч Бай Чуныли ярилаа.

Дээрх мэдээлэлд дурдсанаар, Хятад улсад өнөөгийн байдлаар жилд 2,5 сая орчим тонн биоэтанол /түлш шатахуун болгон ашиглах этилийн спирт/ үйлдвэрлэж байгаа аж.

Этанолыг хими, хүнс зэрэг үйлдвэрлэлийн салбар, түүнчлэн эмнэлэгт  ашигладаг билээ.

О.Барс

Эх сурвалж: Монцамэ