1,2 тэрбум баррель нөөц бүхий газрын тосны орд илрүүлжээ

Аляска мужид 1.2 тэрбум баррель нөөц бүхий газрын тосны орд илрүүлжээ. Дэлхийд томоохонд тооцогдох Испанийн газрын тосны “Repsol” тус ордоос өдөрт 120 мянган баррель газрын тос экспортлох боломжтой гэж тооцоолсон байна. Сүүлийн 60 жилийн хугацаанд жил бүр дунджаар 400-500 газрын тосны орд шинээр нээдэг байсан бол 2016 онд ердөө 174 орд илрүүлсэн гэж Америкийн “HIS Markit” гэдэг зөвлөгөө өгөх компанийн тайланд дурджээ. Газрын тос, хийн компаниуд геологи хайгуулын ажилд зарцуулах хөрөнгийн хэмжээгээ багасгаснаас гадна томоохон ордуудыг илрүүлэх нь улам бүр хэцүү болж буйг шинжээчид онцолж байна. Тэдний тооцоолсноор, өнгөрсөн онд илрүүлсэн ордуудын нөөц 8.2 тэрбум баррель байжээ. Ордыг илрүүлснээс хойш олборлолт эхлэх хүртэл дунджаар 5-7 жил өнгөрдөг байна. Түүнчлэн газрын тосны хайгуулын салбар хямралд орсон нь эрчим хүчний эх үүсвэрийн өсөн нэмэгдэж буй эрэлт хэрэгцээг ойрын хэдэн арван жилийн хугацаанд Америкийн занараар хангахад хүрч болзошгүй гэсэн таамгийг шинжээчид дэвшүүлж байна. Сүүлийн жилүүдэд хайгуул, өрөмдлөгийн ажил далай тэнгисийн ордуудад төвлөрөх болсон бөгөөд нэг цооногийн өртөг 150 сая ам.долларт хүрч магадгүй байгаа аж. Таван цооног өрөмдөхөд ердөө нэгээс нь л газрын тос гарах магадлалтай байдаг гэнэ. Харин занарын цооногийн өрөмдлөгийн өртөг дунджаар 4-10 сая ам.долларт багтдаг төдийгүй олборлолтыг ердөө хэдхэн долоо хоногийн эхлэх боломжтой байдаг. Харин далайд цооног өрөмдөхөд дунджаар таван жил шаардлагатай аж.

ҮНДЭСНИЙ ШУУДАН