Иран газрын тосны олборлолтоо дөрвөн сая баррельд хүргэнэ

2017 оны гуравдугаар сарын 20 гэхэд хоногт олборлох газрын тосны хэмжээгээ дөрвөн сая баррельд хүргэнэ гэж Ираны Үндэсний газрын тосны компанийн тэргүүн Али Кардор мэдэгдэв. Гэтэл ОПЕК-ийн Тегерантай хийсэн гэрээнд олборлолтыг 3.8 сая баррелиас хэтрүүлэхгүй гэж заасан байна. Али Кардор жилийн эцэс гэхэд газрын тосны экспорт хоногт гурван сая баррельд хүрнэ гэдэгт итгэлтэй байгаагаа илэрхийлжээ. 2016 оны арванхоёрдугаар сард Европ руу экспортлох газрын тосны хэмжээ дээд үзүүлэлтэд хүрч, хоногт 0.9 сая баррель болж байжээ. 2016 оны арваннэгдүгээр сарын сүүлчээр ОПЕК-ийн гишүүн орнууд Австрийн Вена хотод хуралдаж, хоногт олборлох газрын тосны хэмжээг 32.5 сая баррель болгож бууруулах шийдвэрийг гаргасан юм. 2017 оны эхний хагас жилийн хугацаанд тус байгууллагын гишүүн орнууд хоногийн дундаж олборлолтыг 1.2 сая баррелиар бууруулна гэж мэдэгдэж байсан билээ. Харин Иран Улсыг энэ хязгаарлалтад хамруулсангүй, учир нь тус улс олон улсын хоригоос чөлөөлөгдөөд удаагүй байгаа юм. ОПЕК-ийн зүгээс олборлолтоо 90 мянган баррелиар нэмэгдүүлж, хоногт 3.797 сая баррель нефть олборлохыг Иранд зөвшөөрчээ. Түүнчлэн Нигери болон Ливи Улсад олборлолтоо бууруулахгүй байхыг зөвшөөрсөн аж.