Хууль зүй, дотоод хэргийн сайд аа, сэтгэл зүрх тань өвдөхгүй байна уу?
Гадаадын жуулчид Улаанбаатар хотод юу үзэх гэж ирдэг вэ. Ховдын Цэнхрийн агуй, Сүхбаатарын Ганга нуурыг үзэх гэж ирдэг хэмээн бодож байна уу. Үгүй дээ. Монголын хэдэн охидоор зугаацах гэж л ирдэг. Аялах, жуулчлах нэрээр ирэгсдийг угтсан бүхэл бүтэн оюутан охидын арми энд байна.
Тэдний нэр, хаяг, утас “Сүнжин гранд”, “Эрхүүгийн амралт”, “Марко поло” гэх мэт газруудад бий. Эдгээр газруудад дан ганц гадныхан ирээд байдаггүй. Тансаг зэрэглэлийн шөнийн цэнгээний газрууд архи, пиво зараад ашигтай байж чадахгүй. Шөнийн цэнгээний газрууд охидын биеийг үнэлүүлж ашиг олохоос гадна гучин хувийг нь авдаг байх юм.
Биеэ үнэлдэг бага насны охидын талаар анхны сурвалжлага гармагц Номин гэдэг охин утасдаж байна. “Чи муу юу бичээд байгаа юм бэ. Намайг хамгаалдаг босс найзууд ч бий. Жинхэнэ янхнуудаа бич” гээд томорч гарав. Эмээтэйгээ цуг Сансарт амьдардаг, аав, ээж нь хороололд байдаг юм билээ. Лицей сургуулийн охин гэхэд ямар айхтар эвдрээ вэ. Бидэн рүү утсаар элдэв хараал урсган үе тэнгийнхээ жаахан охидыг өөртэйгээ хамт зарж хувь хүртэж суугаа тэр охин насанд хүрэхээрээ яах бол. Гаднаас нь харахад эргэж харахаас өөр аргагүй дэндүү сайхан, царайлаг, өндөр нуруутай, өхөөрдөм. Харин бие сэтгэл нь аль хэдийнэ эвдэрч гүйцсэн, насанд хүрсэн хэр баргийн эмэгтэйгээс гарахааргүй айхтар санаа гарах аж.
Эцэг эхчүүд өсвөр насны охидоо давтлагатай, хичээлтэй гэж боддог байх. Тэгвэл охид чинь биеэ үнэлээд л явж байгаа. Өндөр гуалиг охид загвар өмсөгч болохыг мөрөөддөг. Энэ хүсэл мөрөөдөл дээр нь топ модель эгч нар тоглож биеийг нь үнэлүүлдэг байх юм. Алтны уурхайн эзэд утас цохиод “Манай нэг найз ирчихлээ. Гайгүй биетэй “цонхоо хагалуулаагүй” охид хэрэгтэй” гэхэд л гүйцээ.
“Илбэт цурхайн” үүрэг гүйцэтгэгч олны танил “шулам”-уудыг хууль хяналтынхан хэдий болтол харсан ч хараагүй юм шиг явах вэ. 40 мянган ам.долларын “Ренж ровер” биеэ үнэлж байж уначихаад хэвлэлээр “Урлагийн буянаар унах унаатай болсон” гэж хэлээ хазлах “Хүүхдийн порно” одыг яалтай билээ.
Үндсэн сэдвээсээ хазайгаад явчихлаа. 14-18 насны биеэ үнэлдэг охидууд сүлжээ болон өргөжсөн. Оюука гэдэг охин гэхэд өдгөө 18 настай гэхэд хөхөндөө силокон шахуулчихсан байгаа юм. Туранхай эцэнхий гэж жигтэйхэн. Тэгээд нэг өрөө байр хороололд хөлслөөд суучихжээ. 5-8 үйлчлүүлэгчтэй. Түүнээс биш бар, ресторанаар хэсээд үнэ хаялцаад явахгүй.
Хичээл тарлаа. Үйлчлүүлэгч нар луугаа пороолдоход л нэг нь хариу бичнэ. Тэгээд бүгдийг нь хуваарийн дагуу дуудан ирүүлж хоногийн 50 мянган төгрөгөөр сексддэг байх юм. Энэ охин долоо хоногт дор хаяж 200 мянган төгрөгийн орлоготой. Тэр мөнгөөрөө таксидаад, хувцас хунарт үрээд дуусна. Гадаадын иргэдтэй бол 150 ам.доллар гээд өсөөд явчих жишээтэй.
Орифлеймын сүлжээ гэдэг шиг биеэ үнэлэгч охидын холбоос бат бөхөөс гадна нууцална гэж жигтэйхэн. Өөрсдийн үйлчлүүлэгчээс өөр хүний утас авахгүй. Нэг үйлчлүүлэгч 2-3 хүн дагуулж ирнэ. Яг л ийм сүлжээгээр биеэ үнэлэгч охид вирус мэт хурдацтайгаар тархаж байгаа билээ. Бага насны охидыг зарсаар байгаад хаустай болчихсон хүн ч байх юм.
Хамгийн өндөр үнэ хүрдэг ийм бизнесийг эрхэлдэг нөхдүүд цагдаагийн хамгаалалтад байдаг гэсэн яриа бий. Хэд хэдэн дууны клипэд тоглосон хэрнээ биеэ үнэлдэг, 16 настай Энхмаа гэдэг охинтой уулзсан юм. Тэрээр “Миний утасны дугаар бүх зочид буудлын жижүүр, менежерт бий. Буудалд буусан хүн жижүүрээс хүүхэн сурагладаг. Тэр үед над руу утасдаад үнэ тохирно. Тохирохгүй бол очихгүй. Надад 88-тай гурваас дөрвөн дугаар бий. Ангийнхан, гэрийнхэн залгадаг дугаар байдаг. Оройхон хэрд үйлчлүүлэгч нартай холбогдох утсаа залгадаг” гэж ярьсан юм.
Бас Цэцэг гэдэг охин интернэтээр биеэ үнэлдэг гэж байгаа. Гэртээ интернэттэй учраас чаатлаад үнэ хаялцуулна. Тэгээд хамгийн өндөр үнэ хэлсэн чаатлагчдад дүрсээ илгээдэг байна. Ийм маягаар биеэ үнэлдэг охид олширчээ. Эцэг, эх нь охиныгоо өрөөндөө хичээлээ давтаж байгаа гэж бодохоос өөрийгөө үнэ хаялцуулж байгааг мэдэх ч үгүй.
Бас дөрвөн оронтой утастай дугаарт “Массаж хийнэ” гэсэн зар тавьчихдаг охид бий. Ийм охид биеэ үнэлэгч гэдгийг бүгд мэддэг учраас дөрвөн оронтой утас руу залгадаг худалдан авагчид байдаг. Дунд сургуулийн, оюутны, загварынхны гэсэн биеэ үнэлэгчид зах зээл дээр гараад ирсэн учраас “Улаанбаатар” зочид буудал, Ард кино театрын өмнөх биеэ үнэлэгчид ажилгүй болжээ.
Цагдаагийнхан “Ард түмний амьдрал ахуй сайжирч, ажлын байр бий болсон учир охид бүсгүйчүүл биеэ үнэлэх явдал арилж байна” хэмээн мэдээлж байгаа юм даа. Хамгийн эмгэнэлтэй нь “Онгон охидын дуудлага худалдаа”, “Дунд сургуулийн охидын сүлжээ”-г харсаар байж хууль хяналтынхан чив чимээгүй.
Хууль зүй, дотоод хэргийн сайд Ц.Нямдорж хэдэн жилийн өмнө сэтгүүл дээр гарсан шалдан хүүхний зурагтай тэмцэхээ илэрхийлж байсан. Гэтэл бодит амьдралд арван дөрөвтэй охин биеэ үнэлээд явж байгааг сайдтан юу гэж болгоохсон бол. Охид бүсгүйчүүлээ ийм байдалд хүргэсэн учраас албанаасаа огцорсон ч багадах билээ. Таны ач зээ болох нялх охид хэдэн халтар төгрөгийн төлөө биеэ үнэлж явж байвал таны сэтгэл зүрх өвдөхгүй гэж үү. Биеэ үнэлэгч, насанд хүрээгүй эдгээр охидын талаар хангалттай дуулсан биз. Заяа нь мэдэг гээд зүгээр л зөнд нь хаях уу. Энэ асуултад танаас өөр хэн хариулах юм бэ.
“Охид садарлаваас төр мөхөхийн шинж” гэсэн утгатай үг ном сударт л үлдэж Оюу толгой, Таван толгойн хишиг буянгүйгээр биеэ үнэлээд явчих охидыгоо яалтай билээ дээ. Мөн насанд хүрээгүй охиноо та ариухнаараа талын цэцэг шиг хэвээрээ гэж бодож байгаа бол үгүй байж мэдэх нь. Ялангуяа ядуу дорой айлын охид гэхээсээ илүүтэй хөрөнгөлөг чинээлэг айлын охид жаргалдаа ташуурч хөнгөн амьдралыг сонгож байна. Насанд хүрсэн биеэ үнэлэгч ч одоо бүр өнгөрч. Арван дөрвөн настай охиныг захиалж унтдаг гаж донтон ч байдаг.
Охидыг ингэж эвдэж хар нялхаар нь бузарлаж буй хүмүүс нь насанд хүрэгчид. Тэр дундаа олны танил, мөнгөтэй хөрөнгөтэй хүмүүс ч тэдний дунд байдаг аж. Мөн гадны хөрөнгө оруулагч нэртэй олны мэдэх дуулианы эзэд ч охид бузарлагчдын эгнээнд нэгдэнэ. Насанд хүрээгүй хүнийг садар самуунд уруу татах нь хууль бус гэдгийг хэн ч мэдэх хэрнээ үүнийг сахиулах ёстой хууль хяналтын байгууллагынхан хаана юу хийгээд явна вэ.
ӨДРИЙН СОНИН ЭРЭНСУРВАЛЖЛАХ, ТОЙМЧДЫНАЛБА
URL:
