Шүрэнгийн цахилгаан станц баригдах эсэхийг буриадууд шийднэ

Сэлэнгэ мөрөн дээр баригдах Шүрэнгийн усан цахилгаан станцыг баригдах эсэхийг ОХУ-ын буриад ард иргэд шийдэх нөхцөл байдал үүсчээ. Манай тал “барина” гэдэг байр сууриндаа бат зогсч байсан хэдий ч ОХУ-ын талаар Байгаль нуурын экосистемд муугаар нөлөөлнө гэж шалтаглан зогсоохыг янз бүрээр оролдож байсан юм.

ЗХУ задарсны дараа ОХУ хил дамнан урсдаг гол мөрний талаар баримтлах бодлогын талаар тусгасан “Усны конвенц” гээчийг хөрш орнуудтайгаа байгуулсан байдаг. Хоёр улсын хил дамнан урсаж байгаа гол мөрөн дээр аливаа байгууламж байгуулах болбол заавал зөвшилцөж байж шийднэ гэсэн утга бүхий энэ конвенцид манай улс 1995 онд нэгдэж орсон аж. Тиймээс оросууд энэ конвенцийн хүрээнд эрдэмтдийн хамтарсан баг гаргаж, Байгаль нуурын экосистемд нөлөөлөх нөлөөллийг судлах зэргээр багагүй ажилласан. Гэхдээ ОХУ-ын зүгээс санал болгосон Байгаль нуур орчмын иргэдэд нээлттэй сонсгол хийх саналаас зайлсхийж байсан юм. Тэгвэл хоёр улс энэ талаар зөвшилцөлд хүрч, нутгийн иргэдэд сонсгол хийхээр болсон талаар хойд хөршийн хэвлэлүүдэд мэдээллээ.

Түүнд бичсэнээр бол манай тал Байгаль орчмын тосгодод очин нээлттэй сонсгол хийж, сэлэнгэ мөрөн дээр баригдах усан цахилгаан станц Байгаль нуурт ямар ч хохирол учруулахгүй гэдгийг батлах ёстой юм байна. Дараа нь санал хураалт явуулж, зөвшөөрсөн тохиолдолд станцаа барих гэнэ. Харин татгалзвал Шүрэнгийн усан цахилгаан станц баригдахгүй гэнэ. Нутгийн иргэдийн ярьж байгаагаар бол Байгаль нуурын орчимд байдаг тосгоны худгийн ус сүүлийн жилүүдэд огцом доошилсон бөгөөд загас жилээс жилд ховордож байгаа гэнэ. Хэрвээ манай тал нийтийн сонсгол явуулж, орон нутгийн иргэдээс санал хураахыг зөвшөөрсөн нь үнэн бол Шүрэнгийн цахилгаан станц төслийн хэрэгжилтэд тавигдах саад нэгээр нэмэгдэх нь зайлшгүй болж байна.

ОХУ-ын Ерөнхийлөгч В.Путин өчигдөр улсынхаа бэлгэ тэмдэг болсон байгалийн үзэсгэлэнт газруудыг хамгаалах хөтөлбөр боловсруулахыг холбогдох газруудад даалгасан бөгөөд эдгээр газрын тоонд Байгаль нуур багтжээ.

Х.Батсайхан

Эх сурвалжийн линк: http://eagle.mn/r/20718