Ашигт малтмалын чиглэлээр 9 компани үйл ажиллагаа явуулж байна

УИХ-ын чуулганы нэгдсэн хуралдаанаар  Хилийн тухай хуулийн шинэчилсэн найруулгын төслийг үргэлжлүүлэн  хэлэлцэж байна.  Хэлэлцэж байгаа асуудалтай холбогдуулан гишүүд асуулт тавьж, үг хэлж байгаа юм. Гишүүдийн асуултад ХЗДХ-ийн сайд С.Бямбацогт хариулж байна.

УИХ-ын гишүүн Б.Мөнхбаатар:

-Гадаадын иргэн харъяатын асуудлыг цаашид яах вэ? Хилийн шалган нэвтрүүлэх албыг хилийн цэрэг хариуцах ёстой. Гэтэл үүнийг цэргийн харъяаллаас  гаргаж, Гадаадын иргэн харъяат руу шилжүүлж, энгийн болгосон.  Үүнээс үүдээд хил дээрх зөрчлийг бүрэн шийдэж чадахгүй байна.

-Хилийн тухай хуулиар Гадаадын иргэн харъяатын Шалган нэвтрүүлэх албыг Хил хамгаалах байгууллагад шилжүүлж байгаа. Хил хамгаалах байгууллага хуулийн хүрээнд үйл ажиллагаагаа явуулдаг байсан. Гадаадын иргэн харъяатын байгууллага энгийн алба. Гадаадын иргэн харъяатын байгууллагын чиг үүрэг байдаг.  Тийм учраас чиг үүргүүдээ гүйцэтгэх ёстой. Олон улсын боомтууд дээр зөвхөн гадаадын иргэд орж ирсэн тохиолдолд анхаарах асуудал байдаг. ОХУ, Монгол Улс хоёр хоорондоо визгүй зорчдог болсон. Ингэснээр тухайн боомтуудад гадаадын иргэн харъяат алба байх эсэхийг хэлэлцэж байна.

УИХ-ын гишүүн Х.Баделхан:

-Хилийн бүсийг 100 км татах шалтгаан юу вэ? Энэ 100 км-ийг нааш нь татахаар ашиглах орд газар байгаа юу. Чөлөөт бүсийн асуудал энэ хуулийн төсөлд хэрхэн туссан бэ? Хил дамнасан зурвас бүсэд чөлөөт бүс байгуулах бол зөвшөөрлийг хаанаас авах вэ?

-Өнөөдөр нийт нутаг дэвсгэрт 46 боомтод 4.3 сая иргэн, 1.6 сая тээврийн хэрэгсэл, 1.1 сая вагон зорчдог.  Шалган нэвтрүүлэхтэй холбоотой олон зөрчил гарсан.  Тиймээс Шалган нэвтрүүлэх байгууллагыг Хил хамгаалах газарт шилжүүлэхээр болж байна. Хил хамгаалах алба нэртэй үйл ажиллагаа явуулдаг.  Хилийн зурвас 15 км байгаа. Энэ нь Хил хамгаалах газрын онцгой хяналтад байна. Хилийн бүсгүй болсноор олборлолт, ашигт малтмал явуулах нь гэсэн хардлага шаардлагагүй.

ХХЕГ-ын дарга, хошууч генерал Ц.Сэргэлэн:

Хилийн зурвас бүсэд худалдаа үйлчилгээ, бизнесийн чиглэлээр нийт 81 аж ахуй нэгж үйл ажиллагаа явуулдаг. Үүнээс ашигт малтмалын чиглэлээр 9 аж ахуй нэгж үйл ажиллагаа явуулж байгаа. Хилийн бүсэд хориглосон, хязгаарласан зүйл байдаггүй.

Чуулганы хуралдаан үргэлжилж байна.

Н.Энх

http://www.shuud.mn/content/read/476584.htm