8% зээлийн урьдчилгаа төлбөрийг шийдэх арга замууд

Өнгөрсөн есдүгээр сард шинээр 850 зээлдэгч ипотекийн зээлд хамрагдсанаар нийт зээлдэгчдийн тоо 87925-д хүрчээ.  Гэвч өдгөө найман хувийн хүүтэй зээлийн олголт зогсоод хоёр сартай хэртэй хугацаа өнгөрч байна. Энэ хугацаанд зээлд хамрагдах хүсэлтээ өгсөн олон хүмүүс хүлээлтийн байдалтай байгаа. Гэвч 80 м.кв хүртэлх талбайтай орон сууцны зээлээ ч санхүүжүүлэх эх үүсвэргүй байтал саяхан  100 м.кв хүртэл болгох шийдвэрийг гаргалаа.

Монголбанкны хувьд “80 м.кв хүртэл талбайтай орон сууцны зээлээ санхүүжүүлээд л явна. Хэрэв 100 м.кв болгож нэмэгдүүлэх юм бол Засгийн Газар эх үүсвэр олж ирж санхүүжилтийг шийднэ биз” гэх байр суурийг хэдэнтээ  илэрхийлсээр ирсэн. Тэгвэл өнгөрсөн долоо хоногт орон сууцны ипотекийн зээлийн асуудлыг Ж.Эрдэнэбатын Засгийн газар өөр дээрээ авч явах, эх үүсвэр гаднаас татах шийдэлд хүрсэн тухай эх сурвалжууд мэдээлж буй.

Нөгөөтэйгүүр, Засгийн газар ирэх дөрвөн жилийн мөрийн хөтөлбөртөө ипотекийн зээлийг үргэлжлүүлэхээр тусгаж өгсөн. Тиймээс цаашид ипотекийн зээлийн үргэлжлэх нь тодорхой. Харин  эх үүсвэрийг хэрхэн шийдэх нь  одоогоор хэлэлцээрийн шатанд явж байна. Ингээд 8% зээлийн урьдчилгаа төлбөрийг  хэрхэн шийдэж болох тухай мэдээллийг хүргэе.

-Урьдчилгаа төлбөрийн оронд байр барьцаалж болдог уу?

-Болно. 8%-ийн хүүтэй зээлийн урьдчилгааны оронд өөрийн өмчлөлийн байр барьцаалж болно
-Урьдчилгаа төлбөрийн оронд хөдөө байгаа орон сууцаа барьцаалж болох уу?
-Боломжтой. Гэхдээ таны зээл авах гэж буй банк барьцаанд тавих орон сууц байгаа газар (тухайн аймагт гэх мэт) салбартай байх ёстой болно.
-Урьдчилгаа төлбөрийн оронд хашаа байшин барьцаалж болох уу?
-Болохгүй
-Хамаатныхаа байрыг барьцаалж болох уу?
-Ураг төрлийн холбоотой ээж аав, төрсөн ах эгч дүү нар тань өөрсдийн өмчлөлийн орон сууцтай бол түүнийг барьцаалж, 100% зээл авч бас болно. Банк бүр дээр үүнийг харилцан адилгүй шийдэж байгаа.
-Урьдчилгаа төлбөрийн оронд аав, ээжийнхээ байрыг барьцаалж болох уу? 
-Ураг төрлийн холбоотой ээж аав, төрсөн ах эгч дүү нар тань өөрсдийн өмчлөлийн орон сууцтай бол түүнийг барьцаалж, 100% зээл авч бас болно. Банк бүр дээр үүнийг харилцан адилгүй шийдэж байгаа. Хэрэв тухайн байрны өмчлөлийн гэрчилгээн дээр таны нэр давхар бүртгэгдсэн бол урьдчилгаа төлбөрийн оронд барьцаалах бүрэн боломжтой.

-Авах гэж байгаа байрныхаа ордерыг барьцаанд тавьж болох уу?
-Хүмүүсийн дунд ийм буруу ойлголт яваад байгаа. Таны авах гэж байр угаасаа таны авах зээлийн барьцаанд тавигдана. Харин урьдчилгаа төлбөрийн оронд авах гэж буй байрнаасаа өөр байр барьцаанд тавих боломжтой.
-Өмчилсөн газраа барьцаанд тавьж болох уу?
-Болохгүй.
-Хуучны байр барьцаалж болох уу?
-Банкууд ихэвчлэн ашиглалтын хугацаа нь дуусаагүй (40 жил болоогүй) байруудыг барьцаанд авдаг. Тэгэхээр ашиглагдаад 40 жил болоогүй байруудыг барьцаалах боломжтой.
-Урьдчилгаа төлбөрөө аав ээжийнхээ дэмжлэгтэй бүрдүүлсэн байж болохгүй юм уу?
-Болно. Гол нь тэр мөнгөө буцаан төлөх шаардлагагүй гэдгийг банкинд нотлохын тулд бэлэглэлийн гэрээг аав, ээжтэйгээ байгуулсан байх шаардлагатай. Мөнгөө дансаар дамжуулан хүлээн авсан бол банкинд нотлоход илүү хялбар байх болно.

Б.Алтжин