“Сентерра Гоулд”-ийн бие төлөөлөгч шүүгчээс татгалзжээ

“Сентерра Гоулд” компанийн Сэлэнгэ аймгийн Мандал сумын нутагт орших Ноён ууланд эзэмшдэг лицензийг хүчингүй болгуулах асуудлаарх “Ноён уулаа аваръя” хөдөлгөөний нэхэмжлэлтэй шүүх хурал өчигдөр Нийслэлийн Захиргааны хэргийн шүүхэд боллоо.

Захиргааны хэргийн шүүх дээрх лицензүүдийг хүчингүй болгож, байгаль орчны хохирлыг төлүүлэх гэсэн анхан шатны шүүхийн шийдвэрийг зөв гэж үзжээ. Харин “Сентерра Гоулд” компанийн бие төлөөлөгч шүүх буруу шийдвэр гаргасан хэмээн мэдэгдэж, улмаар шүүгчээс татгалзсан байна. Нэхэмжлэгч талаас тус компанийн Гацууртын ордод эзэмшиж байгаа ашиглалтын хоёр лицензийг хууль бусаар олгосон, түүнийг цуцлах үндэслэлтэй хэмээн үзэж шүүхэд хандсан байдаг.

“Сентерра Гоулд” ХХК Ноён ууланд 3000 орчим га газрыг хамарсан дөрвөн тусгай зөвшөөрөл эзэмшдэг. Түүний хоёр нь ашиглалтынх, хоёр нь хайгуулын лиценз юм. Гацууртын орд дахь лицензүүд хууль зөрчсөн гэдэг нь шүүхээр эцэслэн тогтоогдсон тохиолдолд тус компани Ноён ууланд үйл ажиллагаа явуулах эрхгүй болох юм.

Ч.Олдох

Зууны мэдээ