“Рио-2016” олимпийн тав дахь өдрийн тойм

“Рио-2016” олимп зургаа дахь өдрөө  амжилттай үргэлжилж байна.  Өчигдөр  манай тамирчдаас   жүдогийн эрэгтэйчүүдийн 90 кг-д Л.Отгонбаатар, эмэгтэйчүүдийн 70 кг-д Ц.Наранжаргал, хүндийн өргөлтийн М.Анхцэцэг, боксын  эрэгтэйчүүдийн 56 кг-д  Э.Цэндбаатар,64 кг-д Б.Чинзориг нар хүч сорилоо.

Л.Отгонбаатар V байрт шалгарлаа

Эрэгтэйчүүдийн 90 кг-д Л.Отгонбаатар хүрэл медалийн төлөө барилдаж  БНХАУ-ын жүдоч Чен Шинжаод юүко үнэлгээгээр дийлдэн, V байрт шалгарлаа.Эхний тойрогт гоц мөргөсөн Л.Отгонбаатар удаах даваануудад Нидерландын бөхийг цэвэр, олимпийн мөнгөн медальт, ДАШТ-ий алт, хүрэл медальт Кубийн бөх Эшли Гонзалесыг ялж, шөвгийн наймд шалгарсан юм.Улмаар хэсгийн аваргын төлөө Гүржийн бөх В.Липартелианийд торгуулиар дийлдэн, дагах тойрогт барилдахаар болсон ч Азербайжаны Маммадали Мехдиевтэй барилдаж юүко үнэлгээгээр ялж, хүрэл медалийн төлөө барилдах болзол хангасан юм.

Ц.Наранжаргал тэмцээнээ өндөрлөв

Рио-2016 олимпийн наадмын жүдо бөхийн эрэгтэйчүүдийн 90 кг, эмэгтэйчүүдийн 70 кг-ийн медальтнууд өчигдөр тодорсон. Эмэгтэйчүүдийн 70 кг-д  Ц.Наранжаргал зодоглосон. Манай бөх А хэсэгт орсон. Тэрбээр эхний тойрогт Гүржийн Е.Стамтай оноолт таарч, вазаригаар дийлдэн тэмцээнээ орхив.

Хүндийн өргөлтийн тамирчин М.Анхцэцэг VIII байрт шалгарлаа

  “Рио-2016” олимпийн хүндийг өргөлтийн тэмцээн үргэлжилж буй. Тус тэмцээний эмэгтэйчүүдийн 69 кг-д Азийн аварга, залуучуудын ДАШТ-ий алт, хошой мөнгөн медальт Мөнхжанцангийн Анхцэцэг өрсөлдөж, огцмоор 106, түлхэлттэй өргөлтөөр 131 кг өргөж, VIII байрт шалгарлаа.

Э.Цэндбаатар эхний тойрогт яллаа

“Рио-2016” олимпийн боксын тэмцээн үргэлжилж байна. Өчигдар манай  эрэгтэйчүүдийн 56 кг-ын тэмцээн эхэллээ. Энэ жинд манай тамирчин ОУХМ Э.Цэндбаатар эхний тойрогт Кенийн тамирчинг 3:0-ээр яллаа.

Б.Чинзориг эхний тойрогт яллаа

Бразилийн Рио Де Жанейро хотноо үргэлжилж буй зуны олимпын наадамд манай тамирчин Армийн дэлхийн аварга ОУХМ Б.Чинзориг 64 кг-д Катарын тамирчин Тарумалингамтай Туласитай тулалдлаа. Манай тамирчин гурван үеийн турш илт давуу ялж, 16-д шалгарлаа. Тэрбээр дараагийн удаад оросын тамирчинтай энэ сарын 14-нд тулалдах юм.

Ц.Соёл-Эрдэнэ  FACT.mn