“Сэлмэн” цамхагт Монголын таван баян амьдрах нь

-МАХН-ын дарга Н.Энхбаяр 22 дугаар давхарт аль хэдийнэ төвхнөөд амжсан гэнэ-

Сүүлийн жилүүдэд Улаанбаатар хотод тэнгэр баганадсан шилэн барилгууд сүндэрлэх болсон. Тэдгээрийн дундаас хоёр барилга олон хүний сонирхлыг татсаны нэг нь  Л.Гүндалайн “нерв”-ийг барж, жагсаал цуглаантай эхэлсэн MCS-ийн Д.Оджаргалын “Шангрила”, нөгөө нь Ерөнхийлөгч асан Н.Энхбаяр, түүний гэргий О.Цолмон нарын эхлүүлсэн гэгддэг “Blue Sky”. Зэрэг шахам эхэлсэн ч “Шангрила” нь түрүүлж нээлтээ хийж, Монголын баячуудын цуглардаг, үйлчлүүлдэг тансаг газрын тоог нэгээр нэмсэн. Тэндхийн ресторан, баар, зоогийн газар болон үйлчилгээний газруудынх нь үнэ ханш толгой эргэм өндөр. Тэглээ ч мөнгөтэй хүмүүс үйлчлүүлж, бэл бэнчингээ гайхуулдаг юм гэсэн. Харин “Сэлмэн барилга”, “Заазууран барилга”, “Дарвуулт хөлөг”, бүр хошноор “Жирэмсэн эмэгтэй” гээд янз бүрийн нэр, хоч зүүж байсан “Blue Sky” багагүй хугацаанд дуншсаны эцэст удахгүй ашиглалтад орох гэж байна. Хүн бүрийн сонирхож байгаа энэхүү цамхгийн загвар өвөрмөц гэдгийг бүгд мэдэх байх. Харин доторхи тохижилт, зохион байгуулалт ямар байгаа, хэдэн төрлийн үйлчилгээ эрхлэх гээд нарийн ширийнийг олон хүн сонирхож байгаа нь мэдээж. Тиймээс өчигдөр “Blue Sky” цамхгаар “тагнуулдаж”, доторхи орчинтой нь танилцлаа.

“Blue Sky” цамхгаар аялсан минь

“Blue Sky Tower” буюу “Хөх Тэнгэр Цамхаг” нь Монгол Улсын хэмжээнд загвар дизайны шийдэл, барилгын чанараараа тэргүүлэх, нийслэл хотын өнгө үзэмжийг чимэх онцгой содон бүтээн байгуулалт болж буй  гээд хэлчихэд буруудахгүй байх.  Одоогоор дотор заслын ажил нь  ид өрнөж байгаа энэхүү цамхаг тун удахгүй ашиглалтад орох гэж байгаа аж. Бага зэрэг идэвхийлэн ажиллавал шинэ жилийн өмнө бүрэн ашиглалтад орох бололтой. Гаднах тохижилтын ажил бүрэн дууссан болохоор дотор заслын ажил цаг агаараас шалтгаалахгүй болохоор тэр шүү дээ. Сүхбаатарын тал­бай талаасаа орж болох ч бү­рэн ашиглалтад орсны дараа ха­шаагаа авч, тэр талын хаалгаа бү­рэн нээх аж. Харин одоо бол ертөнцийн зүгээр урд тал, бай­гууллагаар яривал арын хаалгаараа орж байгаа юм бай­на. Хаалгаар дөнгөж ороход цэл­гэр том талбайтай танхим угтлаа. Танхимын дунд хоёр ногоон канттай, хар хослол өмссөн хоёр  угтагч ширээний ард сууж харагдав. Угтагч бүс­­гүйчүүдийн хажуугаар чи­­мээгүйхэн өнгөрөх гэсэн бо­ловч хэдэн давхарт гарч хэн­тэй уулзах гэж байгаа талаар баа­хан шалгаав. “Хүнтэй уулзах гэж явна” гэх  зэргээр аргалж байж арай гэж орлоо. Дөнгөж орсон даруйдаа л жаал зугаа юм судаллаа. Улаан­баатар хот­доо хамгийн өндөрт тоо­цог­дох “Blue Sky Tower” цог­цолбор нь 105 метр өндөр, 25 давхраас бүрдэх бөгөөд олон улсын таван одтой зочид буудал, А зэрэглэлийн оффис, цөөн тооны пентхаус орон сууцнаас гадна төрөл бүрийн худалдаа, үйлчилгээний газруудыг нэг дор цогцлоосон иж бүрэн цам­хаг бололтой. Юуны түрүүнд гуравдугаар давхарт гарч ор­чинтой нь танилцлаа. Энэ дав­харт хурлын болон хүлээн авал­тын гэмээр том танхимууд олон байв. Ид засвар нь өр­нөж байна. Мөн дэлхийн жи­шигт хүрсэн фитнесс клуб, саун хийгдэж байгаа ту­хай тэнд байсан хүмүүс ам урал­дан ярьж байна.  Хэдий гүй­цэд ашиглалтад ороогүй ч гэ­сэн орчны тохижуулалт, гэрэл­түү­лэг, дизайн нь өвөрмөц, ча­нартай, үзэмжтэй, арай л өөр харагдаж байсан юм. Дараа нь В2 давхар руу буулаа. Тэнд ца­мх­гийн бүхий л сантехник, цахилгааны сүлжээ байдаг аж. Өнөөх нийслэлийнхний яриад байдаг хонгилын системийн жижигрүүлсэн хувилбар. Одоо­хондоо цамхгийн ажилчид энэ давхарт үдийн цайгаа уудаг юм билээ. Өөр онц сонирхоод байх юм байсангүй. Харин В1 давхарт цамхгийн бүхий л үйлчилгээний газрууд байрлаж байгаа аж. “Vegas” шөнийн клу­бээс эхлээд буудлын цагаан хэ­рэглэлийг угааж, индүүдэх цех, хоол ундыг бэлтгэх гал тогоо гээд л хөвөрнө. Шөнийн клуб нь нэг дор 1000 гаруй хү­нийг хү­лээн авах чадалтай, орчин үеийн бүхий л техник хэрэгслээр хан­гагдсан нь харагдаж байсан. Одоогоор шөнийн клубт ажил­лах ажилчдын сургалт тухайн ор­­чиндоо явагдаж байгаа гэнэ лээ.

Тансаг зэрэглэлийн ресторанд хооллож, усан санд сэлж, фитнесээр хичээллэх гэнэ

1-4-р давхар тэр чигээрээ үйлчилгээний газруудаар дүү­рэн байх гэнэ. Тансаг зэ­рэг­лэлийн ресторанууд, “Lobby lounge”, “Blue Sky” lounge, фит­нес, дэлгүүр гээд л. Нэг­дүгээр давхарт  тансаг зэрэг­лэ­лийн дэл­гүүрүүд байх аж. Тан­саг брэн­дийн бүтээгдэхүүн, ди­зай­нерын бутик дэлгүүрийн үйл ажиллагаа явуулахад  зориулан  730 гаруй квадрат метр талбай бэлдээд байгаа гэсэн. Худалдан авах өндөр чадвар бүхий “Blue Sky Tower”-ийн зочид үйлч­лүүлэгчдийн  өмнө танай үүд хаал­га нээгдэх боломжтой уч­раас түрээслэгчдийг найр тавин урьж байгаа бололтой юм.
Харин хоёрдугаар давхарт баар, ресторан, зоогийн газрууд нэг дор байрлах юм байна. Бүр тодруулбал, Ази, Европ хоолны ресторанууд тусдаа байх аж.  Тэр дотроо япон, хятад хоолны ресторанууд ч тус тусдаа байр­лах ажээ.  “Japanese Specialty Restaurant” хэмээн нэрлэсэн тан­саг ресторанд та тансаг бө­гөөд өвөрмөц орчинд япон үн­дэсний хоолыг амтлах аж. Хамгийн сонирхолтой нь хоол идэж байх зуураа мэргэжлийн тогоочийн хоол хийх урлагийг харж бахдах боломжтой гэж байгаа. За тэгээд VIP танхим болон бусад үйлчилгээ байх нь мэдээж.
Хамгийн эхэнд орсон гурав­дугаар давхарт юу байгаа та­­лаар өгүүлсэн. Хурлын тан­хи­мууд нь гэхэд 200 гаруй  зо­­чин зэрэг хүлээн авах хүчин ча­далтай тухай инженерүүд нь ярьж байгаа гэнэ.   Зөвхөн хурал гэлтгүй хүлээн авалт, гэр бүлийн хурим найр, баяр ёслол, шинэ бүтээгдэхүүн үйлчилгээний нээлт гэх зэрэг бүх төрлийн үйл ажиллагааг явуулах бо­ломж­­той байхаар тэрхүү тан­­химуу­дыг тохижуулж эхэлж байгаа аж.  Танхим  дуу дүрс­­н­ий хамгийн дэвшингүй тех­­ник тоног төхөөрөмжөөр бү­­рэн тоноглогдсон ба суудлын тоо болон зохион байгуулалтыг ту­хайн үйл ажиллагаанд орол­цож буй хүмүүсийн тоо, хүсэлт шаард­лагатай уялдуулан өөрч­лөх боломжтой байх аж.
Мөн энэ болон дөрөвдүгээр давхрын зарим хэсэгт спа, саун, жакуззи, фитнес зал, 6х20 метр хэмжээтэй усан сантай клубүүд байрлаж байгаа юм. Саунд суусныхаа дараа бүлээн устай усан санд сэлсэн шиг амрах, фитнесээр хичээллэх боломж байна.

Наймдугаар давхарт албан байгууллагууд хэдийнэ төвхнөжээ

Энэ цамхагт албан оффис бай­гаа тухай дээр өгүүлсэн. Тэг­вэл 4-8-р давхар хүртэл ал­бан байгууллагын оффис байх аж.  Одоогийн байдлаар 4, 5, 6-р давхрын засвар дуусаа­гүй байна. Харин долдугаар дав­харт зарим нэг байгууллага орж эхэлж байна. Наймдугаар давхрын оффисын засал аль хэдийнэ дуусчээ. Ямар байгууллагууд энд үйл ажиллагаа явуулж байгаа нь сайн мэдэгдсэнгүй. Учир нь ямар ч гадны хүн оруулахгүй байна билээ.  Ямар ч байсан оффисуудыг өндөр чанарын агааржуулалтын систем, бүрэн автомат утаа илрүүлэгч, галын дохиолол, бороожуулагчийн систем, температурын нарийн тохиргоотой халаалтын системээр тоноглосон нь харагдаж байсан. Аль ч давхарт нь элдэв өнгийн паар байхгүй. Бүх давхрыг таазнаасаа халдаг байхаар зохицуулж өгсөн байна билээ.

Зочид буудал нь цагийн 60-70 ам.доллар

Цамхагийн 9-18-р давхар тэр чигтээ тансаг зэрэглэлийн зо­чид буудал. Зочид буудлын зас­варын ажил бараг дуусч бай­гаа юм байна. Дээд давх­рууд руу гарах боломж алга. Ха­рин эрийн сайнаар явж байж есдүгээр давхарт гарч зо­чид буудлын өрөөнүүдийг со­нирх­лоо. Одоохондоо матра­саар дүүр­гэсэн харагдав. Өрөөнүү­дийн орон дээр тавих гэж байгаа бо­лолтой юм. Тэнд ажиллаж байгаа хүмүүсийн ярьж бай­гаа­гаар дээд давхруудын тохи­жилт, засвар дууссан гэнэ. Өрөө болгон 32-42 инчийн LCD телевиз болон бусад зүйлсээр тоноглогдсон. Дэвссэн ширдэг нь л гэхэд нэг ам метр нь 200 гаруй мянган төгрөгийн үнэтэй эд гэнэ.  Нийт 200 гаруй том, жижиг өрөө байгаа ажээ. Энэ­хүү өндөр зэрэглэлийн зо­чид буудалд ганцхан цаг тухла­хад 60-70 ам.доллар байх гэнэ.

Н.Энхбаярын хөршүүд

Цамхгийн 19-23-р дав­харт тансаг зэрэглэлийн пент­хау­сууд байх бололтой. До­тоод заслыг хийж байгаа хү­мүү­сийн хэлж  байгаагаар “Blue Sky Tower” дахь орон суу­цууд нь тансаг амьдралын цоо шинэ ертөнцийг нээж бай­гаа бөгөөд  зөвхөн дэлхийд хо­вор өндөр зэрэглэлийн үл хөд­лөх хөрөнгийн үнэ цэнийг мэд­рэх цөөн тооны хүмүүст зо­риулагдсан юм байна.  Шал­наас тааз хүрэх өргөн уудам цонх, гайхалтай сайн зохион бай­гуулалт, хээнцэр тансаг до­тоод засал тохижилтоос гад­на онцгой цогц үйлчилгээ энэ орон сууцанд байх ажээ.  Орон сууцны давхрууд руу гадны хүн битгий хэл доторхи ажилчид ч орж болдоггүй гэсэн. Ганц хоёр дарга, албаны хүмүүс нууц цахилгаан шатаар гардаг юм байх. Мөн нэг давхарт нэг л айл буюу цамхагт нийтдээ тавхан айл амьдрах боломжтой гэж ярьж байна лээ. Сураг сонсох нь ээ, МАХН-ын дарга Н.Энхбаяр 22 дугаар давхарт аль хэдийнэ төвхнөөд амжсан гэнэ лээ. Мөн Даян аварга Г.Өсөхбаяр, мэргэжлийн сү­мо­гийн 68 дахь их аварга Д.Даг­вадорж нар түүнтэй хөрш бо­лох сурагтай.  Хэрвээ энэ үнэн бол Монголын таван баян “Blue Sky”-д амьдарч, жинхэнэ тансаг орчинд амар жимэр аж төрөх бололтой.

Хотыг 24 давхраас тольдох боломж

“Blue Sky Tower”-ийн хам­гийн дээд 23-24-р давхруудад “Blue Sky lounge” байрлах бө­гөөд Улаанбаатар хотын өнгө үзэмжийг урд өмнө хэзээ ч харж байгаагүй өндрөөс со­нир­хох боломжийг эндээс олж болох юм байна. Уг нь ажилч­­дын ярьж байгаагаар 24-р давхарт орон сууц байгаа гэж байсан ч үнэн хэрэг дээрээ “Blue Sky lounge” байрлаж байгаа аж. Найз нөхөдтэйгөө тайван тухтай орчинд амарч, хөгжмийн аялгууг сонсонгоо хөнгөн зууш, ундаагаар үйлч­лүүлэх зуураа нийслэлийг хам­гийн өндрөөс тольдох боломж нээг­дэх ажээ.

н.пунцагболд