29 дэх Ерөнхий сайдыг томилно

Монгол Улсын 29 дэх Ерөнхий сайдад УИХ-ын гишүүн Ж.Эрдэнэбатын нэрийг дэвшүүлсэн. Хоёр хоногийн өмнө хуралдсан МАН-ын Бага хурлаас олонхын саналаар Сэлэнгэ аймгаас УИХ-д хоёр дахь удаагаа  сонгогдоод буй Ж.Эрдэнэбат гишүүнийг Ерөнхий сайдад нэр дэвшүүлсэн юм. Өчигдөр Ерөнхийлөгч Ц.Элбэгдоржтэй уг асуудлаар зөвшилцсөн билээ.

Тэгвэл өнөөдөр УИХ-ын дарга М.Энхболд чуулганыг зарлан хуралдуулж, шинэ Ерөнхий сайдаа үүрэгт ажилд нь томилохоор зэхэж байгаа аж. Учир нь Ерөнхийлөгч наадмаас урьтаж УИХ-ын дарга болон Ерөнхий сайдын томилгоог хийх чиглэл өгсөн. Тиймээс өнөөдөр наадмын өмнө хамгийн сүүлийн ажлын өдөр учир ийнхүү асуудлыг шийдвэрлэхээр зэхэж байна.

Ж.Эрдэнэбат гэдэг сонголт яригдаж эхлэх үеэс зарим хүмүүс залуу хүн тавих гэж байна хэмээх яриаг өрнүүлж байсан. Гэвч магадгүй энэ сонголт энэ цаг үеийн хамгийн зөв сонголт байх. Учир нь эдийн засаг нь уналтад ороод буй энэ цаг үед улсын төсвийг гольдролд оруулж, эдийн засгийн оновчтой тооцоотойгоор удирдана явуулах биз. Тэрбээр өнгөрсөн парламентын үед найман сар Сангийн сайдын албыг хашиж үзсэн. Ингэхдээ олон шинэ өөрчлөлт, ашигтай үзүүлэлтүүдийг бий болгож чадсан хэмээн улс төрийн хүрээнийхэн дүгнэдэг.

Тиймээс Ерөнхий сайдад томилогдохоор нэр дэвшээд буй Ж.Эрдэнэбат “элгээрээ хэвтээд” буй эдийн засгийг буцаан сэргээнэ гэдэгт маш олон хүн итгэж байна. Ирэх жилээс эхлэн монголчууд бид бүхэн хатуу сорилттой тулгарна. Энэ бүх хариуцлагыг хүлээж ачааны хүндийг үүрч гарах хүн бол Ж.Эрдэнэбат.

Ч.Ган /ZALUU.COM/