Хувьцааны мөнгөө жорлон руу битгий асгаарай иргэдээ

Олон жилийн өмнө иргэд хувьцаа авсан байдаг ч хувьцаа эзэмшигчдийн талаар ямар ч ойлголтгүй байсны улмаас цэнхэр, ягаан тасалбараа тэг эс хийгээд орхисон түүхтэй.

Харин 2011 онд Монгол Улсын иргэн бүрд “Эрдэнэс Таван толгой” ХК-ийн 1072 хувьцааг өгсөн. Энэ хувьцааг сонгууль далимдуулж нэг амь орууллаа.

Засгийн газар “Эрдэнэс Таван толгой”-н 323 ширхэг хувьцааг нэрлэсэн үнээр нь иргэдээс худалдаж авах асуудлыг хэлэлцэн шийдвэрлэсэн юм. Тодруулбал, Монгол Улсын иргэдэд эзэмшүүлсэн “Эрдэнэс Тавантолгой” ХК дахь өөрийн эзэмшлийн хувьцаагаа худалдах хүсэлт гаргасан иргэний эзэмшиж байгаа 1072 хувьцааны 30 хувьтай тэнцэх буюу 323 ширхэг хувьцааг нэрлэсэн үнээр нь иргэдээс худалдаж авч байна. Эхний ээлжийн иргэд хувьцааныхаа мөнгийг аваад эхэлчихсэн.

“Эрдэнэс Таван толгой” ХК-ийн 1072 ширхэг хувьцааны 30 хувийг Засгийн газарт худалдах иргэд өнгөрөгч даваа гарагаас арилжааны банкнуудад хүсэлтээ гаргаж эхэлсэн бөгөөд баасан гарагийн мэдээллээр 650 мянган иргэн хувьцаагаа худалдах хүсэлтээ банканд гаргасан байгаа ажээ. Эхнээсээ мөнгөө авцгааж байна. Хамгийн гол нь нийтлэлч Баабар гуайн хэлснээр “Олсон мөнгөө бүгдээрээ хувааж аваад жорлон руу асган нийтээр архидан согтуураад өнгөрөх вий” гэдгийг дахин сануулмаар байгаа юм.

Мөнгийг олохоос илүү зарцуулахад ухаан зарах хэрэгтэй гэдэг. Тэгэхээр иргэд хувьцааны мөнгөө юунд хэрхэн зарцуулах эсэхээ сайтар бодолцож байж үрэх хэрэгтэй байх. Аливаа гэр бүлийн мөнгөтэй байх нэг үнэс бол хадгаламж байдаг. Болж өгвөл хувьцааны мөнгөө аваад банканд хадгалчихвал яасан юм бэ. 100 мянган төгрөг гэдэг бага мөнгө биш. Та 300 мянган төгрөг биш юм гэхэд 100 мянгаа хүүхдийн нэр дээр хугацаатай хадгаламж нээгээд орхичихвол таны мөнгө арвижна. Зарцуулах гэж байгаа бол хамгийн хэрэгтэй, шаардлагатай байгаа бодит зүйлээ аваарай. Дахин сануулахад хувааж, аваад жорлон руу битгий асгаарай.

Г.Наран-Од