Бидэнд шинэ улс төрийн зүтгэлтэн хэрэгтэй

“Улс төрч дараагийн сонгуулийг бодож байдаг бол, улс төрийн зүтгэлтэн дараагийн үе(Generation)-ийн талаар бодож байдаг” гэх мэргэн үг байдаг. Ганц энэ өгүүлбэр л чухамдаа улс төрч, улс төрийн зүтгэлтэн хоёрын том ялгааг хамгийн энгийнээр тайлбарласан нь энэ. Өөрийгөө би улс төрчөө хэмээн бардамнан ярих өчнөөн хүнтэй би таарч байсан. Чухамдаа тэд энэ үгийнхээ гаргалгааг мэдэхгүйд л учир нь байгаа юм. Харин улс төрийн зүтгэлтэн гэж хэн вэ? Гол учир нь “ЗҮТГЭЛТЭН” гэх ганц үгэнд л багтах аж.

“Зүтгэх, хийх, бүтээх, хөдөлмөрлөх”. Та анзаарав уу, угтаа бүгд нэг санааг илэрхийлж байгааг. Энд л гол зангилаа буй. Тэгвэл эрхэм уншигч танд монгол орныхоо төлөө гэсэн зүтгэлтэй шинэ залуу улс төрийн зүтгэлтнүүдээс онцолж нэгэн эрхмийн ажил мэргэжлийн замналаас хуваалцъя гэж саналаа.

МАН-ын залуу генсек Жамьянгийн Мөнхбат нь Арын сайхан Хангай нутгийн унаган хүүхэд. Тэрээр бусдын л адил хөдөө талын хөрсөнд тоглож хүн болсон нэгэн гэдэг. Архангай аймгийн Тунгалагтамир хоршооллын найман жилийн 2 дугаар дунд сургуулийг төгссөн. Мөн тус аймгийнхаа “Авьяас хөгжүүлэх тусгай сургалттай цогцолбор” сургуульд 10 жилээ дүүргэж, дээд боловсролыг МУИС-д Улс төр судлаач, нийгмийн ухааны багш мэргэжлээр төгссөн. Мөн АНУ-ын Жоржтауны их сургуулийн Англи хэлний бэлтгэл ангид суралцаж шат дараалсан боловсролыг эзэмшжээ.

Хоёрдугаар курсын оюутан ахуй цагтаа буюу 1999 онд анх МАН-д элсэн орж тэр цагаас л эхлэн түүний улс төрч байх замнал тууштай эхэлсэн гэж хэлж болно. Тэрээр 2002-2003 онд УИХ-ын даргын ажлын албанд зохион байгуулагч, 2003-2004 онд УИХ-ын даргын шадар туслах, 2005 онд Ерөнхийлөгчийн тамгын газарт референт, 2005-2007 онд МАН-ын дэргэдэх Нийгмийн Ардчилал Монголын Залуучуудын Холбоо /НАМЗХ/-ны Ерөнхий нарийн бичгийн дарга, 2008-2010 онд Монголын залуу үеийн хөгжлийн ассоциацийн ерөнхийлөгч, 2010-2011 онд МАН-ын Удирдах зөвлөлийн дэргэдэх Улс төрийн бодлогын байнгын хорооны дэд дарга, 2011 оны 6 сараас МАН-ын төв хэвлэл “Монголын үнэн” сонины Ерөнхий эрхлэгч, 2012 оны 10 сараас МАН-ын нарийн бичгийн дарга, Удирдах Зөвлөлийн гишүүн,2013 оноос одоог хүртэл МАН-ын Ерөнхий нарийн бичгийн даргын хариуцлагатай албыг нэр төртэйгөөр хашиж байна.

Шинэ залуу шилдэг улс төрийн зүтгэлтний хувьд түүний ажил мэргэжлийн замнал нь хэн нэгнээр татуулаад гэнэт гараад ирээгүй зөвхөн өөрийн хийж чадах, зорьж тэмүүлж буй бүгдээр зүтгүүр хийнэ алхам алхмаар урагшлан залуу хүнийхээ хувьд хийж бүтээх их хүсэл тэмүүллээр өнөөдрийн Монголын улс төрийн ууган хүчин болох Монгол ардын намын ерөнхий нарийн бичгийн даргаар ажиллаж байгааг нь хэлэх нь зүйтэй болов уу гэж санана.

Ж.Мөнхбатад МАН гэдэг том хөлөг онгоцны жолоог атгаж, хар бор хамаг ажлыг хийх хангалттай туршлага, чадамж, хамгийн гол нь эр зориг, сэтгэлийн хат бий. Тэрбээр шинэчлэлийн төлөө, шударга ёсны төлөө өлсгөлөн зарлах, жагсаал цуглаан зохион байгуулахад тэргүүнд нь явж байсныг олон нийт мэднэ.Энд л түүний улс төрийн амбицыг зөвтгөх шалтгаан оршиж байгаа бус уу.

Тэрээр улс төрийн намын ууган хүчин болох МАН-ын тулгын чулуунаас түшилцэж төр, ард түмнийхээ төлөө зүтгэх эрхэм үүрэг түүнд ноогджээ. Тэрээр энэ үүргээ ч өндрөөр ухамсарлаж, нэр төртэйгөөр биелүүлж яваа.

Үнэн хэрэгтээ Ж.Мөнхбатын үеийнхэнд МАН-ын Ерөнхий нарийн бичгийн даргаа ажиллана гэдэг “жижиг амбиц” биш ээ. Тэр үүгээрээ үеийнхнээсээ ялгарч тэднээр хүрээлүүлж чадсан. Тиймээ бидэнд ийм л шинэ улс төрийн “зүтгэлтэн” зайлшгүй хэрэгтэй байгааг нийгэм, улс орон маань сануулж буйг эрхэм уншигч та мэргэн ухаандаа тунгаан биз ээ.

О.Заяа