“Эрдэнэс Таван толгой” компанийн нөхцөл байдал хүнд байхад ХУВЬЦААГ яагаад худалдаж авах болов?

Монгол Улсын Засгийн газар 2012 онд “Эрдэнэс Таван Толгой” ХК-ийн нийт хувьцааны 20 хувь болох гурван тэрбум ширхэг хувьцааг иргэн бүрт хуваарилсан билээ. Ингэснээр нэг иргэнд 1,072 ширхэг хувьцаа ногдсон юм.  Тодруулж хэлбэл, “Хүний хөгжил сан”-гаас иргэн бүрт 1.5 сая төгрөгийг бэлэн болон бэлэн бус хэлбэрээр олгохоор өмнөх засгийн үед шийдвэрлэсэн байдаг ч хэдэн жил дамнан чимээ тасарсан.

Тэгвэл мартагдах шахсан хувьцаа сонгуультай зэрэгцэн амь орж “Эрдэнэс Тавантолгой” ХК-ийн 1072 ширхэг хувьцааны 30 хувийг худалдаж авах шийдвэрийг өнгөрсөн долоо хоногт  Монгол Улсын Засгийн газраас гаргав. Энэхүү шийдвэр мэдээж иргэдэд таалагдаж өчигдрөөс эхлэн Засгийн газарт хувьцаагаа зарах хүсэлтэй байгаа иргэд  арилжааны банкуудад бичиг баримтаа бүртгүүлж, дансаа нээлгэж эхлэв.

Харин дээрх шийдвэрийг  Монголын Үнэт Цаасны Арилжаа Эрхлэгчдийн Холбоо болон мэргэжилтнүүд эсэргүүцэж байгаа юм. 

Тодруулбал орд эзэмшигч  “Эрдэнэс Таван толгой” компанийн нөхцөл байдал яг үнэндээ хүнд байгаа аж. “2014 оны жилийн эцсийн санхүүгийн тайлан нь  гэхэд 700 тэрбум төгрөгийн өртэй, 100 гаруй тэрбум төгрөгийн алдагдалтай  ажилласан байна.  Ийм байтал хөрөнгийн биржид гаран, үнэ хүргэх боломжгүй.  Өөрөөр хэлбэл, 1072  ширхэг хувьцаа “Эрдэнэс Таван толгой”  компанийн балансан дээр байхгүй. Хаана ч байхгүй хувьцааг  засгийн газар аваад, зараад байна” гэдгийг мэргэжилтнүүд хэлж байгаа юм.

Ш.Аагий

Эх сурвалж:Breakingnews.mn