АН-ын дарга З.Энхболдын “хилэнг” хөдөлгөсөн Л.Цандэлэг, Т.Хасбаатар тэргүүтэй 6 гишүүн намаасаа “хөөгдлөө”

АН-ын дарга, УИХ-ын дарга З.Энхболд өчигдөр нэгэн сонирхолтой шийдвэр гаргажээ. Тодруулбал, тэрбээр Төмөрбаатарын Хасбаатар, Лхагваагийн Цандэлэг тэргүүтэй нэр бүхий зургаан гишүүнээ намаасаа хөөжээ.

Намаасаа “хөөх” болсон шалтгаан нь намын үзэл баримтлал, мөрийн хөтөлбөр, бодлогыг хэрэгжүүлэх, Үндсэн дүрэм болон түүнд нийцүүлэн гаргасан бусад журам, шийдвэрийг дагаж мөрдөх үүргийг биелүүлээгүй, төрийн сонгуульд бусад намаас болон бие даан нэр дэвшиж байгаа тул дээрх гишүүдийг Ардчилсан намын гишүүнчлэлээс хассугай” гэжээ.

Ийнхүү сонгуулийн өмнө Ардчилсан намын олон гишүүн намаасаа “хөөгдөж” бас гарч байна. Өнгөрсөн хугацаанд УИХ-ын гишүүн асан Батын Батбаатар намын дарга З.Энхболдтойгоо нэр дэвших ажиллагаанаас болж муудалдцан намаа орхисон. Учир нь нэр дэвших эрхийг нь ҮЗХ-ны хурал дээр хүчингүй болгож өөр хүнийг нэр дэвшүүлсэн нь түүнийг намаасаа гарахад хүргэсэн юм. Улмаар тэрбээр Баянгол дүүрэгт хуучин даргынхаа эсрэг үзэхээр болоод байгаа. Тэгвэл энэ удаад мөн л нэр дэвших ажилтай холбоотойгоор дээрх зургаан гишүүнийг Ардчилсан намаас хөөжээ. Иргэдийн дунд “тариаланч” гэдэг нэрээрээ танигдсан Л.Цандэлэгийн хувьд сүүлийн өдрүүдэд намынхаа эсрэг олон зоригтой мэдэгдлүүдийг хийсэн.

Саяхан тэрбээр “Женко Х. Баттулга, Р.Гончигдорж, С.Эрдэнэ,  С.Баярцогт нар бүгд идсэн уусан юмтай. Тэд хоорондоо чиний тэрийг чинь ярина, энийг чинь ярина гээд нэгнийгээ барьцаалсан улс. Биднийг доор зургаан цаг суулгаж байгаад өөрсдөө өдөржин хуралдаж, хэнийг хасахуу, алийг оруулах уу, чиний найз хүүхэнийг оруулах уу гэх мэтээр бүх зүйлээ тохирчихсон байсан. Яагаад гэвэл эдгээр асуудлыг хурлаар буюу зааланд яривал уначихна гэж тэд айсан. Гэтэл ҮЗХ-ны гишүүн бид нар жил болгон сая төгрөг төлдөг хэрнээ ганцхан удаа үг хэлэх боломж олддог юм. Манай нам хуралдаж чаддаггүй, З.Энхболд намын дарга бишээ, одоо болтол томилогдож чадаагүй, ҮЗХ-оороо орохоор уначих гээд байдаг. Тэгээд ҮЗХ-гоо хуралдуулдаггүй, үнэхээр дампуурсан нам” хэмээн хэвлэлд ярилцлага өгсөн юм.

Магадгүй намаасаа хөөгдөх болсон шалтгаан нь энэ яриатай нь ч холбоотой байж болзошгүй. Учир нь тэрбээр бусад хүмүүс шигээ өөр намаас эвсэл бие дааж сонгуульд оролцоогүй. Харин эвгүйхэн хэлсэн дээрх үгс нь намын даргынхаа дургүйг хүргэсэн бололтой.

Т.Хасбаатарын хувьд АН-ын гишүүд дэмжигчдийн холбооны тэргүүнээр ажиллаж байсан нэгэн. АН-д шинэчлэл хийх ёстой хэмээн ярьж ирсэн түүнд энэ удаад АН-аас нэр дэвших квот олдоогүй. Үүнийг нь эсэргүүцсэн тэрбээр бие дааж нэр дэвшихээр болсон нь ийнхүү намаасаа хасагдахад хүргэв.

Ер нь АН-ынхан өнгөрсөн дөрвөн жилийн турш дотоодын “тэмцэл”, хэрүүл шуугианаасаа болж нэлээд асуудалд ороод байгаа. Одоо болтол намын даргаа булаацалдаж, намын удирдах шатны эрх мэдлээ булаацалдаж байгаа гэдгийг улс төрийн хүрээний учир мэдэх эрхмүүд байнга ярьдаг. Тэгвэл тэд хамгийн чухал үедээ дотооддоо асуудлаа шийдэж чадахгүй, савнаасаа халиаж нэр нүүрээ барж эхлэв бололтой. Ямартаа нэр дэвших эрхийг нь хүчээр булаасан гэж үзсэн эрхмүүд нь намынхаа эсрэг байр суурь илэрхийлсэн. Энэ нь З.Энхболд даргад нь таалагдаагүй учир ийнхүү “хөөж” орхилоо. Үүнийгээ тэд дотоод ардчилал гэж ойлгодог боловч үнэн хэрэгтэй “шуудайд хийсэн үхрийн эвэр шиг” аашилцгааж Монгол төрөөр талцан тоглож байна шүү дээ.

Ч.Ган /ZALUU.COM/