“Корпорайт” зочид буудалд гарсан галыг унтраалаа

Хан-Уул дүүргийн 15 дугаар хороонд байрлах “Корпорайт” зочид буудалд гал гарлаа гэсэн дуудлагын дагуу Нийслэлийн Аврах анги, Чингэлтэй дүүргийн Аврах, гал унтраах 10-р анги, Хан-Уул дүүргийн Аврах, гал унтраах 14-р ангийн албан хаагчид очиж шуурхай ажиллаж галыг унтраагаад байна.

Онцгой байдлын албан хаагчдыг очиход тус зочид буудлын суурийн давхарт байрладаг цахилгаан хуваарилах самбарын цахилгааны утаснаас гал гарч, цахилгааны утсаа даган долоон давхар хүртэл шатаад байсан аж.

“Корпорайт” зочид буудлынхан тухайн үед үйл ажиллагаа явуулаагүй байсан гэж мэдэгдээд байгаа ч гал түймрийн улмаас хоёр иргэн угаартсан байдалтай байсныг Яаралтай түргэн тусламжийнхан эмнэлэгт хүргэхээр авч явсан байна.

Одоогийн байдлаар галыг бүрэн унтраасан ч өрөөнүүд утаагаар дүүрсэн тул хайгуулын ажиллагаа явуулж байна.