СОНГИНОХАЙРХАН ДҮҮРГИЙН МОНГОЛ АРДЫН НАМААС УРИАЛГА ГАРГАЛАА

Монголчууд зуун зууны туршид эвлэлдэн нэгдэж байхдаа хамгийн хүчтэй байсныг түүх бэлээхэн гэрчилж байгаа билээ. Өнөөдөр Д.Тэрбишдагва гишүүн “Монгол Ардын хувьсгалт нам,  Монгол Ардын нам хоёр бол үсэрсэн цус, тасарсан мах” хэмээн мэдэгдэж ууган намдаа эргэн ирж байгаагаа зарласан явдлыг Сонгинохайрхан дүүргийн Монгол Ардын нам талархан хүлээн авч байна. 90 жилийн түүхтэй Монгол улсын тусгаар тогтнолын баталгаа болсон Монгол Ардын нам түүний мянга мянган гишүүд эвлэлдэн нэгдэж нэгэн зүгт урагшаа харан улс орныхоо ирээдүйн сайн сайхны төлөө хоёргүй сэтгэлээр зүтгэх түүхэн цаг хугацааны өмнө ирээд байна.

Нийслэлийн хүн амын дийлэнх олонх оршин суудаг Сонгинохайрхан дүүргийн Монгол Ардын нам Д.Тэрбишдагва гишүүн болон Монгол Ардын хувьсгалт намын гишүүд дэмжигчид сэтгэл зүрхээрээ өнгөрсөн хугацаанд нэг байсаар ирсэн гэдгийг дуулгахад таатай байна. Ийм ч учраас дүүргийн хөрөнгө оруулалт, бүтээн байгуулалтын томоохон асуудлууд дээр тус дүүргээс сонгогдсон Монгол Ардын нам, Монгол Ардын хувьсгалт намын гишүүд хамтран зүтгэж ирсэн билээ. Иймээс Сонгинохайрхан дүүргийн Монгол Ардын намын мянга мянган гишүүд болон удирдлагууд, Д.Тэрбишдагва гишүүн болон Монгол Ардын хувьсгалт намын гишүүд, дэмжигчид эвлэлдэн нэгдэж, өнөөгийн Монголын улс төрийн тогтворгүй ороо бусгаа байдалд цэг тавихаар хамтран ажиллана гэдэгт итгэн талархан уриалж байна.

СОНГИНОХАЙРХАН ДҮҮРГИЙН МОНГОЛ АРДЫН НАМЫН ХОРОО