Завхан аймгаас хамгийн олон генерал төрөн гарчээ

Монгол Улсад генерал цол бий болсны 72 жилийн ой тохиож байна. Энэ хүрээнд генералуудад хүндэтгэл үзүүлэх арга хэмжээ Чингисийн талбайд боллоо. Энэ жилийн арга хэмжээг Онцгой байдлын Ерөнхий газраас зохион байгуулсан.

Анх манай улсад 1944 оны дөрөвдүгээр сарын 28-нд Ардын сайд нарын Зөвлөлийн тогтоолоор цэргийн гарамгай 11 зүтгэлтэнд цэргийн дээд цол хошууч генерал, дэслэгч генерал, хурандаа генерал гэсэн цолыг олгож эхэлсэн түүхтэй. Тэр цагаас хойш Монгол Улсын хэмжээнд зэвсэгт хүчин, цагдаа, онцгой байдал, тагнуул, хилийн цэрэг, шүүхийн шийдвэр гүйцэтгэх байгууллагуудаас нийт 180 гаруй генерал цолтон төржээ. Өдгөө 87 генерал амьд сэрүүн байна. Дашрамд сонирхуулахад, Завхан аймгаас 22 генерал цолтон төрсөн бөгөөд өдгөө Монгол Улсын хэмжээнд хамгийн олон генералтай аймгаар тодроод байна.

О.Сайхан