Гаалийн байцаагчдаа хянаж байх ёстой хүн нь өөрөө авлига авч байгаад үйлдэл дээрээ баригджээ

Авлигатай тэмцэх газрын үйл ажиллагаа илт сэргэж, төрийн албан хаагчдыг “намнаж” эхэллээ. Тодруулбал, АТГ-ын гэнэтийн шалгалтанд гаалийнхан хэт олноор бүдэрч, зарим нь үйлдэл дээрээ баригдсан тухай өмнө нь мэдээлж байсан билээ.

Тэгвэл өнгөрөгч гуравдугаар сарын 30-ны өдөр гаалийн байцаагчдыг хянаж байх үүрэгтэй Гаалийн зөрчилтэй тэмцэх газрын дарга М гэгчийг АТГ-аас саатуулсан байна. Тэрээр энэ албан тушаалд очоод нэг жил ч болоогүй байгаа аж.

М нь бусдаас авлига, хээл хахууль авч байгаад үйлдэл дээрээ баригдсан гэх мэдээллийг хуулийн байгууллагаас өгч байгаа аж. Түүнийг Замын-Үүд боомтод ажиллаж байх үед нь АТГ-ын 20 гаруй албан хаагчид гэнэтийн шалгалт хийж баривчилсан байна. Түүнтэй хамт хэд хэдэн байцаагчийг саатуулсан гэх мэдээлэл бий. Энэ тухай Авлигатай тэмцэх газраас албан ёсоор мэдээлэл өгөх байх гэж найдаж байна.