Хүн бүрийг ажил дээр амжилтанд хүргэх 7 ур чадвар
Ажлын ертөнцөд ур чадвар гэдэг бол бараа,үйлчилгээ, мөнгөтэй адил юм. Та хэр их ур чадвартай байна, тэр хэрээр үнэ цэнэтэй ажилтан байна гэсэн үг бөгөөд илүү их боломжит ажил олгогчдын анхаарлыг татна гэсэн үг. Тэр хэрээр илүү их мөнгө олох чадвартай болж, хүсэн хүлээж байсан ажилдаа орно гэсэн үг. Харамсалтай нь, олон ажилтнууд тусгай ур чадвар туршлага дутмаг байх нь бий. Жишээ нь, кодчилогч олон төрлийн программын хэлийг суралцах хэрэгтэй байж магадгүй. Олон төрлийн программын хэлийг сурснаар таныг илүү онцгой албан тушаалд очих боломжийг олгож болгох ч ерөнхий ур чадвар ч бас маш чухал. Дараах 7 үндсэн ур чадвар ямар ч албан тушаалын ямар ч хүнд тустай байх болно. Ажил олгогчид тусгай ур чадвараас илүү дараах ур чадварыг чухалчлан авч үзэх тал бий. Тиймээс дараах ур чадвартай ажилчид бусдаас илүү үнэлгээ авч болно шүү.
- Үр дүнтэй харилцаа
Та хэн ч бай, хаана ч ажилладаг бай, ямар ч албан тушаалд ажилладаг бай харилцаа амжилтын маш чухал хүчин зүйл. Үйлчлүүлэгчтэйгээ харилцах харилцаа ч бай, дарга, хамт олонтойгоо харилцах харилцаа ч бай харилцаа гэдэг маш чухал. Утсаар, бичгээр, нүүр тулан биечлэн уулзах гэх мэтчилэн харилцаа олон хэлбэртэй байдаг. Өнөөгийн ертөнцөд харилцаа олон төрөл хэлбэртэй болсон ч үндсэн утга агуулгаа алдаагүй байгаа билээ. Хэлэхийг хүссэн зүйлээ нягт нямбай, зохистой, үр дүнтэй байдлаар зөв арга хэрэгслийг ашиглан илэрхийлж сурах нь чухал.
- Зохион байгуулалт ба менежмент
Зохион байгуулалтын ур чадвар аливаа ажлыг зохистой гүйцэтгэхээс өмнө тавигддаг чухал ур чадвар юм. Зохион байгуулалттай байна гэдэг бол ажлаа цаг хугацаанд хийж чадна гэсэн үг. Ажлаа илүү үр дүнтэй эрэмбэлж, асуудлыг асуудал болохоос өмнө идэвхитэй шийдэх шийдлүүдийг олох чадвартай байна гэсэн үг. Бусад хүмүүсийг шууд удирдахгүй ч гэсэн ямар ч албан тушаалд менежментийн ур чадвар чухал. Жишээ нь, та нөөц бололцоо, цаг хугацаагаа илүү сайн зохицуулж, менежмент хийдэг байснаар ажлын ачааллаа сайн зохицуулж чадна гэсэн үг. Зохион байгуулалт, менежментийн ур чадваргүйгээр ихэнх ажилчид алдаа гаргах, бүтэлгүйтэх нь элбэг.
- Хэлэлцээр хийх
Хэлэлцээр гэдэг бол хоёр тал харилцан итгэл үнэмшил, итгэлцэлтэйгээр хийгддэг зүйл. Бараг бүхий л албан тушаалд энэ ур чадвар хэрэгтэй байдаг. Жишээ нь, та ажлын ярилцлаганд орлоо гэхэд хэлэлцээр хийх ур чадвартай байснаар сайн ажлын байранд орох, өндөр цалин, өрсөлдөх цалин урамшуулал хүртэх боломжтой болно гэсэн үг. Тухайн ажилтай уялдуулан шинэ үйлчлүүлэгчээ хамгаалах, боломжит түншүүдтэй хэлэлцээр хийх гэх мэт зорилгоор хэлэлцээр хийх ур чадвараа ашиглаж болно шүү дээ. Гэхдээ боломжит байдлаар байр сууриа илэрхийлж, үйл ажиллагааны зардлаа бууруулах тал дээр энэ чадварыг ашиглаж болно.
- Шүүмжлэлт сэтгэлгээ
Шүүмжлэлт сэтгэлгээ гэдэг бол тухайн орчин нөхцлийн боломжит дутагдалтай тал буюу алдааг олж, асуудлыг шийдвэрлэх процесс гэсэн үг. Шүүмжлэлт сэтгэлгээ нь боломжит асуудлыг шийдэх бүтээлч шийдлийг олох, муу нөхцөл байдалд хурдан үнэлгээ хийх, томоохон системд томоохон хэв маягийг олж таних гэх мэт практик талын хязгааргүй олон хэрэгслүүдтэй. Шүүмжлэлт сэтгэлгээтэй хүмүүс гадаад нөлөө байхгүй бол системийг батлах, шинжилгээ хийх, асуудлыг шийдвэрлэх зэргээр системийг боломжит хувилбараар сайжруулж байдаг.
- Багийн ажиллагаа ба төлөөлөл
Зарим ажлын байранд бусдаас илүү хамтын ажиллагаа хэрэгтэй байдаг. Ажлын байрны зарим түвшинд багийн ажиллагааг зохицуулах хэрэгтэй болдог. Та ажлаа эхлүүлэхдээ дарга удирдагчид болон хамтран ажиллагсадтайгаа хамтран ажиллах хэрэгтэй байж болох юм. Гэхдээ ирээдүйд доод шатны ажилтнуудаараа төлөөлөл бий болгох боломжтой ч байж болох юм. Бусадтай хэрхэн үр дүнтэй ажиллахыг мэдэж, хувь хүний давуу талыг ашиглахыг олж мэдсэнээр тухайн слабарт амжилтанд хүргэхэд шаардагдах гол түлхүүр ч байж болно. Ажлын группуудтэй хэрхэн ажиллахыг илүү сайн мэдсэнээр хамтаар ажиллах чадвартай болно. Багаар ажиллах ур чадваргүйгээр үйл ажиллагаа удааширч ч болно.
- Судалгаа ба шинжилгээ
Судалгаа, шинжилгээний ур чадвар бараг бүхий л ажлын байранд чухал болж байна. Маркетерууд, маркетингийн менежерүүд боломжит зах зээлийн үр ашгийг үргэлж судалж, шинжилж байдаг. Борлуулалтын ажилтнууд боломжит борлуулалтыг судалж, шинжилнэ. Инженерүүд боломжит шинэ технологийг судалж, шинжилнэ. Хувийн туслахууд хүртэл янз бүрийн аяллын төлөвлөгөөг судалж, шинжилж байдаг. Мэдээллийг хурдан олж, үнэлэх чадвартай байх нь ямар ч ажлын байранд чухал үүрэг гүйцэтгэдэг.
- Өөртөө итгэх итгэл
Өөртөө итгэх итгэл гэдэг зан чанар мэт санагддаг ч түүнийг ур чадвартай адил олж, хөгжүүлж, сайжруулах боломжтой аж. Зарим талбарт та өөртөө итгэх итгэлийг бодит туршлагаар сайжруулж болох ба олон давтахын хэрээр илүү өөртөө итгэлтэй болж болно. Бусад талбарт өөртөө итгэх итгэл таны дадал, туршлагын бүтээгдэхүүн нь болж болох юм. Жишээ нь, та биеийн хэлэмжээ сайжруулах, илтгэх чадвараа сайжруулах, эерэг сэтгэлгээг хөгжүүлэх тал дээрээ ажиллаж байгаа бол та өөртөө итгэлтэй хүн болж чадна. Тогтмол үйлдлийн үр дүнгээр өөртөө итгэх итгэлийг олох боломжтой. Өөртөө итгэх итгэл ихээхэн хүндлэл, нягт нямбай байдал, үр ашигтай байдалд ч хүргэж болно.
Мэргэжлийн ертөнцөд та энэ мэт зарим ур чадварыг цаг хугацааны явцад туршлагаар эзэмшиж болох боловч ихэнхдээ тэдгээр ур чадварыг олж, эрэлхийлж, олж эзэмшиж, сайжруулах хэрэгтэй. Хувь хүний эдгээр тал бүрийг сайн хөгжүүлж чадвал ажилд орох, албан тушаалдаа амжилтанд хүрэх боломжтой болно.
Source: Цэрэндулам
URL:
