Э.Энхмөнх БНХАУ-ын телевизийн “The Brain” шоуны ялагч боллоо

Өнгөрсөн амралтын өдөр Монголын оюун ухааны академийн тамирчин, ой тогтоолтын ОУ-ын их мастер Э.Энхмөнх БНХАУ-ын Нанжин хотноо зохион байгуулагдсан “The Brain” ой тогтоолтын аварга тодруулах телевизийн нэлээд том шоу нэвтрүүлэгийн ялагч болсон байна. Түүний хувьд эхний шатандаа “X-Team” буюу Австрали, Перу, Испани, Шведийн шилдэг тамирчидтай нэг баг болон өрсөлдсөн бол төгсгөлийн шатандаа багийн гишүүд хоорондоо өрсөлдөж, манай тамирчин ялалт байгуулжээ.

Тэрбум гаруй хүнтэй хойд хөршийн ой тогтоолтоороо шилдгээр шалгарсан хүмүүс болон дэлхийн ой тогтоолтын аваргууд хүч үздэг энэхүү сонирхолтой телевизийн шоуг нэг оройд бараг 300 сая хүн үзэж сонирхдог гэх судалгаа байдаг аж.

Манай тамирчны хувьд Монголын Оюун Ухааны Академийн захирал Х.Хатанбаатартай хамт Хятад улсыг зорьжээ. Дашрамд өгүүлэхэд манай тамирчин Э.Энхмөнхийг тэмцээний эхэлсэн цагаас хойш “Монгол бүргэд” хэмээн дуудах болжээ.

Б.Төгөл