Хятад эрчүүдийг Монгол бүсгүйтэй суухыг уриалжээ

Сүүлийн үед монгол бүсгүйчүүд Хятад эрчүүдийг нөхрөөрөө сонгон гэр бүл болж буй талаарх нийтлэл хятадын northnews.cn сайтад гарчээ. Уг нийтлэлд нийтлэлд хятад залуутай гэр бүл болсон гурван эмэгтэйн амьдралыг өгүүлсэн байна. Тэд бүгдээрээ БНХАУ-ын Эрээн хотод гэр бүлийн хамт аж төрж амьдардаг.

Нийтлэлийн эхний баатар Шүрмаа нь Дорноговь аймгийн Замын-Үүд сумын иргэн юм. Тэр өдөржин нөхрийнхөө ажилд туслаж, тэргэнцрээр хайрга чулуу зөөдөг аж. Гэвч тэр “Монголд очихгүй” гэж ярьдаг ажээ. Энэ тухайгаа тус нийтлэлийг бичсэн сэтгүүлчтэй ярилцах үедээ “Монголд гурил гэхэд л хоёр дахин илүү үнэтэй. Харин Хятад Монголыг бодвол сайхан. Одоо ч идээшин дасаж байна даа” хэмээн ярьсан байна. Шүрмаагийн нөхөр БНХАУ-ын иргэн Жан Гуйлин барилгын салбарын ажилчин бөгөөд сард 3000 юанийн цалин авдаг ажээ.

Жан Гуйлин Шүрмаатай суухын тулд ар гэрт 2000 долларыг инж болгон өгчээ. Ер нь хятад эрчүүд монгол хүүхнүүдтэй суухдаа дуртай байдаг аж. Учир нь монгол хүүхнүүдийг маш бага инжээр авч суудаг учраас тэд олзуурхдаг гэнэ. Харин хятад хүүхэнтэй суухын тулд дор хаяж 30 мянган доллар инжинд өгдөг юм байна. Тиймээс хятад эрчүүд санхүүгийн бэрхшээлээс үүдэн хожуу гэрлэдэг юм байна.

Нийтлэлийн хоёр дахь баатар нь Цэцгээ гэх эмэгтэй. Тэр Шүрмаагийнхаас ялгаатай нь баян нөхөртэй. Тиймээс Монгол улсаас гар урлал, бэлэг дурсгалын зүйлс Эрээн хотод зарж борлуулдаг аж. Тэр Эрээний зах дээр өөрийн гэсэн гоо сайхны бараа, бэлэг дурсгалын зүйлсийн дэлгүүр ажиллуулдаг байна. Нөхөр нь сэтгүүлчид гэрэл зургаа авахуулахаас татгалзсан байна.

Тус сайтад мэдээлснээр “Монгол улс эмэгтэйчүүдийн тоогоороо эрчүүдээс илүү Азийн цорын ганц улс. Тиймдээ ч нэг эрэгтэйд гурван эмэгтэй ноогддог гэх судалгааг тус улсын Үндэсний статистикийн хорооноос гаргасан байдаг. Ер нь монголд эмэгтэйчүүд гэр бүл болох нь амаргүй, өрх толгойлсон эмэгтэй хэвийн үзэгдэл” гэж онцолжээ.

Харин гуравдахь баатарыг Туяа гэдэг. Тэр нөгөө хоёр эмэгтэйгээсээ насаар залуу, өндөр гоолиг, үзэсгэлэн төгөлдөр нэгэн ажээ. Нөхөртэйгөө БНХАУ-д Англи хэлний сургалтанд хамрагдаж байхдаа танилцжээ. Одоо харин БНХАУ-д ажиллахад хэрэгцээ шаардлагатай хэмээн хятад хэлийг эрчимтэй судалж байгаа аж.

Түүнчлэн, тус нийтлэлд “Монгол бүсгүйчүүд мөнгө, байр, машин, эд хөрөнгө барагтаа л бол сонирхдоггүй. Тэдэнд хятад эрчүүдийн ажилч хичээнгүй зан таалагддаг юм. Тиймээс хятад эрчүүд ээ, Монгол улс руу яваарай, монгол бүсгүйчүүдтэй танилцаарай гэж зөвлөе” гэжээ.

Б.Дэжид

Эх сурвалж: Gereg.mn