Нефтийн ханш дахин буурчээ

Нефть олборлогч бусад орон хэлэлцээрийг нь дагаж мөрдсөн тохиолдолд нефтийн олборлолтоо нэгдүгээр сарын түвшинд барина гэж Саудын Араб, ОХУ тохиролцсон хэдий ч өчигдөр нефтийн ханш дахин буурсан байна.

Саудын Араб болон ОХУ-ын сайд нар Венесуэл, Катарын сайд нартай Доха хотноо уулзаж, хэлэлцээрийг байгуулжээ.

Таван хувиар өсөөд байсан брент маркийн нефтийн ханш 3.2 хувиар буурч, нэг торх нь 32.33 доллар болсон бол АНУ-ын түүхий нефтийн үнэ хоёр хувиар буурч, 29.14 доллар болсон байна.

2014 оны зургадугаар сард нефтийн үнэ оргилдоо тулж, 116 доллар хүрч байсан билээ.

“Нефтийн олборлолтыг нэгдүгээр сарын түвшинд барих нь зах зээлд хангалттай. Нефтийн ханшид огцом эргэлт хийхийг бид хүсэхгүй байгаа бөгөөд бид эрэлтийг л хангах хүсэлтэй байна. Мөн бид нефтийн ханшийг тогтворжуулах хүсэлтэй байна” гэж Саудын Арабын Нефтийн сайд Али аль-Найми мэдэгджээ.

Нефтийн ханшийг тогтворжуулахын тулд Венесуэлийн Нефтийн сайд Еулогио Дель Пино олборлолтыг хязгаарлах саналыг дэмжихээр нефть олборлогч орнуудад айлчилж байна.

Нефтийн зах зээлийг тогтворжуулахын тулд Венесуэл болон бусад орон түүхэн хэлэлцээр байгуулсан гэж тэрбээр мэдэгджээ.

Д.Нямтулга

Эх суралж: Монцамэ