Балчир дарга Д.Мөнхтөр бусдын үгээр будаа тээж явна

Нэгхэн жилийн өмнө “Eagle” телевизд дадлага хийж байсан залуу Шударга бус өрсөлдөөн, хэрэглэгчийн төлөө газрын даргаар томилогдсон нь олны дургүйцлыг төрүүлж байсан нь саяхан.

Тэгвэл нам дагаж гүйсээр албан тушаалын аятайхан бялуу хүртэж чадсан Д.Мөнхтөр ажлаа авсан даруйдаа хэрэг тарьсан тухай шуугиан гарч эхэлсэн. Тодруулбал түүнийг газрын дарга бүсгүйгээ өдөж хоргоогоод зогсохгүй, занаж загнадаг талаар цахим хуудаснаа мэдээлэл гарсан юм. Энэхүү мэдээллийг хүн бүр л “Тэгнэ ээ, тэр” гэх байдалтай хүлээн авсан нь нууц биш. “Залуу хүн төрийн өндөр албыг хашиж болохгүй нь юу билээ” гэсэн ууч сэтгэл олон нийтэд байсан учраас туршлагагүй, овилгогүй, омголон даргыг төдийлөн шүүмжлэлээр булалгүй өнгөрсөн. Гэвч шинэхэн даргад өөрийн унагаасан нэр хүндээ сэргээх ямар нэгэн үйлдэл хийх шаардлага тулгарсан нь мэдээж. Ард түмэн, хэрэглэгчдийн тусын тулд гэх шошго наах шалтаг бүхнийг тэр хайсны эцэст Мобиком компаний 20 төгрөгөөр дугаар зарсан, “Юнивишн” компани интернетийн үйлчилгээндээ өөрчлөлт хийсэн, Дүнжингарав худалдаааны төв болон нефтийн үнэтэй холбоотой маргааныг шүүрэн авчээ. Ингэхдээ Мобикомыг хэдэн тэрбум төгрөгөөр торгож, “Юнивишн”-ийн интернэтийн өөрчлөлтийн талаар өөрөө ямар ч мэдээлэл байхгүй хэдэн цаас эргүүлж тойруулж уншиж байгаа харагдсан. Анх удаа Шударгын индэрт “хэрэглэгч” Амарсайхан, Батхүү нар үг хэлж хөөрхий ШӨХТГ-ын нялх дарга маань бусдын ашиг сонирхлын хэрэглүүр болсноо ойлгосон ч юм уу үгүй ч юм уу бүү мэд. Хүний үгээр үг хийх, бусдын гар хөл болох гэдэг бол төрийн ажил биш гэдгийг шинэхэн дарга ойлгож амжаагүй л байгаа бололтой.