ОХУ-ыг тогтоон барих нь Пентагоны гол зорилго
- АНУ-ын БХЯ Ойрын ирээдүйд хэрэгжүүлэх төлөвлөгөө гаргажээ -
АНУ-ын Зэвсэгт хүчин ирэх зургаан жилд Европ тивд баримтлах бодлогоо тодорхойлжээ. Түүндээ зургаан асуудалд төвлөрч ажиллана хэмээн эрэмбэлсний нэгдүгээрт ОХУ-ын аюул заналыг тогтоон барих зорилт бичигджээ. Хойд хөршийн “Взгляд” сонинд энэ талаар мэдээлсэн байна.
Төлөвлөгөө боловсруулагчид АНУ-д гаднаас учирч болох аюул заналыг зүг чигээр нь “Өрнө”, “Дорно”, “Хойд” хэмээн гурав хуваажээ. Өрнөөс ирэх аюул занал гэдэг нь ойлгомжтой, алан хядагчид, дүрвэгчид бол “Дорно”, “Хойд” зүгээс ирэх хамгийн том аюул занал нь ОХУ-ын геополитикийн ашиг сонирхолтой холбоотой аж. Тодруулбал, Зүүн Европт явуулж байгаа газар нутгаа тэлэх бодлого, Арктикт цэрэг зэвсгийн хүч хуримтлуулж байгаа зэрэг нь голлон нөлөөлсөн байна.
АНУ-ын БХЯ-ны Европын асуудал эрхэлсэн албаны захирагч, генерал Филип Бридлав энэ талаар хийсэн мэдэгдэлдээ ОХУ-ыг “даагаа нэхэхийг хүссэн” гэж тодотгосон нь анхаарал татсан. Тэрээр энэ үгээрээ Ерөнхийлөгч Б.Обамагийн “ОХУ ЗХУ-ыг сэргээн босгохыг санаархаж байна” гэдэг шүүмжлэлийг сануулсан бололтой. Учир нь төлөвлөгөөнд 2015 оныг “АНУ, ОХУ-ын харилцааны хувьд, “Хүйтэн дайн”-аас хойшхи хамгийн хүнд жил байсан” гэж тодорхойлсон байсан юм.
ОХУ, АНУ-ын хооронд дайн дэгдэж болзошгүй гэсэн яриа доод төвшинд олонтаа сонсогддог байсан бол саяхнаас илүү дээд төвшинд шилжлээ. ОХУ-ын Үндэсний аюулгүй байдлын зөвлөлийн нарийн бичгийн дарга Н.Патрушев ойрмогхон өгсөн ярилцлагадаа “АНУ ОХУ-ын байгалийн баялагт шунаж, задлахыг оролдож байна. Тэд дэлхийд ноёрхох байр сууриа үүрд хадгалахыг хүсэх нь ойлгомжтой, тиймээс ОХУ хүчирхэг байх нь тэдэнд ашиггүй. Харин ч сул дорой байж, задран унах нь илүү хэрэгтэй” хэмээн өрсөлдөгчөө ил шулуунаар шүүмжилсэн. В.Путины хамгийн ойрын итгэлт хүн, залгамжлагчаар нь тодрох өндөр магадлалтай хүн ингэж хэлсэн нь дэлхий нийтийн анхаарлыг татсан юм.
Эх сурвалж: Ардын эрх
URL:
